Gesù l’è un sasserdote che el ne capisse del tuto

1-2. (a) Parché Geovà el ga mandà so Fiol qua ala Tera? (b) Cossa che ndaremo imparar in questo stùdio? (Ebrei 5:7-9)

INTORNO de 2 mila ani indrio, Geovà el ga mandà so caro Fiol qua ala Tera. Parché? Parché par meso del sacrifìssio de Gesù, lu el pol perdonar i nostri pecati, darne speransa de viver par sempre e finir fora con tuto el sofrimento che Sàtana el ga fato vegner fora. (Gio. 3:16; 1 Gio. 3:8) E Geovà anca el savea che, dopo che Gesù el vegnesse ala Tera, lu el podaria deventar un sasserdote che capisse ancora meio quel che sentimo e quel che infrontemo. Gesù l’è deventà Sasserdote Prinsipal quando lu el se ga batesà nel ano 29.a

² In questo stùdio, ndaremo veder come quel che Gesù el ga visto e el ga infrontà qua nela Tera lo ga giutà a deventar un sasserdote ancora meio. Alora, se semo desanimadi par causa dei nostri sbali o de un pecato che ghemo fato nel passà, studiar come Gesù l’è el meio sasserdote che ghen’è ne giutarà a seitar a pregar a Geovà e a esser so amighi. — Ledi Ebrei 5:7-9.b

GESÙ L’È VEGNESTO ALA TERA

3-4. Cossa che Gesù el ga assà indrio quando l’è vegnesto ala Tera, e come che l’era la so vita qua?

³ Arquanti de noantri ga belche cambià tante robe nela vita. Par esémpio, tanti i ga assà indrio la so casa e i ze ndati de star distante dela so fameia e dei so amighi. Sicuro che no l’è stà mia fàcile. Ma gnanca una persona ga bio tanti cambiamenti nela vita compagno a Gesù. Parché che podemo dirlo? Parché Gesù l’era el àngelo pi importante quando l’era nel cielo. Geovà lo amea tanto e lo gavea scoliesto par giutarlo a far tante bele robe. (Sal. 16:11; Pro. 8:30) Ma Filipensi 2:7 mostra che lu el ga assà indrio “tuto quel che el gavea” nel cielo e l’è vegnesto viver qua nela Tera in meso a persone imperfete.

⁴ Pensa nei primi ani de Gesù qua nela Tera. Noantri savemo che lu l’è nassesto nte una fameia pròpio poareta parché i so genitori i ga dato sol due pìcoli osei come sacrifìssio nel témpio. (Lev. 12:8; Luc. 2:24) Quando el rè Erode el ga savesto che Gesù l’era nassesto, lu el ga volesto coparlo. Par quela, Giusepe e Maria i ga bio de scampar via par el Egito. (Mat. 2:13, 15) Alora, sicuro che la vita de Gesù qua nela Tera la era tanto difarente de quela che lu el gavea nel cielo!

5. (a) Cossa che Gesù el ga visto quando l’era qua nela Tera? (b) Come quel che Gesù el ga visto lo ga parecià par esser un sasserdote ancora meio? (Varda anca la ilustrassion.)

⁵ Intanto che Gesù l’era qua nela Tera, ghe fea tanto pecà veder come le persone le sofria. Par esémpio, lu sempre el vedea maladi, orbi, soti e persone che le ga sofrio tanto par causa dela morte dei so fioi. (Mat. 9:2, 6; 15:30; 20:34; Mar. 1:40, 41; Luc. 7:13) L’è vera che lu belche el vedea tute queste robe quando l’era nel cielo. Ma quando l’era qua nela Tera, lu el ga podesto capir del tuto come che le persone le se sentia e le dificoltà che le infrontea. (Isa. 53:4) E anca Gesù el ga infrontà dificoltà. Dele volte, lu el se sentia tanto straco, ansioso e el ga sofrio tanto quando so pare, Giusepe, l’è morto.

GESÙ EL GA MOSTRÀ AMOR ALE PERSONE

6. Cossa che ne insegna la professia de Isaia sora Gesù? (Isaia 42:3)

⁶ El profeta Isaia el ga dito che el Messia el mostraria amor e compassion a quei che i era come una cana che la era rota e un stupin che l’era ancora drio far fumassa. Dele volte, nele Scriture Ebraiche, quei che i ga forsa e una forte fede i ze comparadi a un bel giardin e a grande piante. (Sal. 92:12; Isa. 61:3; Ger. 31:12) Ma quei che i ze poareti e maltratadi i ze comparadi a una cana che la ze rota e a un stupin che l’è quasi drio smorsarse. (Ledi Isaia 42:3;c Mat. 12:20) Questa professia de Isaia la ga mostrà che Gesù el ndaria tratar le persone che le era maltratade con amor e compassion. E Gesù el ga fato pròpio questo. Quando l’era qua nela Tera, lu el ga mostrà amor a quei che i era maltratadi e poareti.

7-8. Come che Gesù el ga fato quel che l’è scrito nela professia de Isaia?

⁷ Mateo el ga mostrà che Gesù l’era pròpio drio realisar la professia de Isaia che la disea: “Lu no’l ndarà schissar una cana che la ze belche rota, gnanca el ndarà smorsar un stupin che l’è ancora drio far fumassa.” E Gesù el ga curà e giutà persone che le era maltratade e che no le gavea pi speransa de gnente. Par esémpio, Gesù el ga curà un omo che el gavea lepra. Sicuro che prima de esser curà, quel omo no’l gavea pi speransa de gaver salute e de star darente dei so amighi e dela so fameia. (Luc. 5:12, 13) Gesù anca el ga curà un omo che no’l scoltea gnente e che no l’era bon de parlar. Pensa come prima quel omo el restea desanimà de veder che i altri i ciacolea intrà de lori, ma lu no l’era bon de capir gnente. (Mar. 7:32, 33) E Gesù el ga giutà le persone anca de altre maniere.

⁸ In quela època, tanti giudei i credea che quei che i era maladi o desgrassiadi i era drio esser castigadi par causa dei so pecati o dei pecati che i so genitori i gavea fato. (Gio. 9:2) Par quela, quele persone le era maltratade e le restea tanto desanimade. Ma Gesù le ga curade e le ga giutade a veder che Geovà el se preocupea con lore. Cossa che questo ne insegna sora quel che Gesù el sente par noantri?

9. Come quel che dise in Ebrei 4:15, 16 ne assa sicuri che Gesù el ne capisse?

⁹ Ledi Ebrei 4:15, 16.d La parola greca “capir” in Ebrei la ze doperada par parlar de una persona che la ze bona de sentir el sofrimento dei altri. (Varda anca Ebrei 10:34, ndove Paolo el dopera la medèsima parola.) Quando ledemo sora i miràcoli che Gesù el ga fato, vedemo che lu l’era bon de capir del tuto el sofrimento dele persone. Lu el curea i maladi parché el se preocupea con lori e el volea giutarli e nò parché ghe tochea. Par esémpio, quando Gesù el ga curà un omo che el gavea lepra, lu el podaria gaverlo fato de distante. Invesse, lu el ga tocà in quel omo. Fursi l’è stà la prima persona che lo ga tocà in tanti ani. E quando Gesù el ga curà un omo che no’l scoltea gnente, lu lo ga menà via distante del bordel. Pensa anca in quel che ga sucedesto quando una dona la ga lavà i pié de Gesù cole so làgrime e li ga sugadi coi so cavei. Quela volta, un fariseo la ga tratada tanto mal parché la gavea fato bruti pecati nel passà, ma Gesù el ga difendesto quela dona. (Mat. 8:3; Mar. 7:33; Luc. 7:44) Gesù el ga mostrà amor e el ga sempre dato atension ai maladi e a quei che i ga fato bruti pecati. Alora, podemo esser sicuri che lu sempre el ndarà capir del tuto quel che noantri sentimo.

NOANTRI FEMO COMPAGNO A GESÙ

10. Come podemo giutar quei che i ze orbi o che no i scolta mia? (Varda anca la ilustrassion.)

¹⁰ Noantri se sforsemo par mostrar amor e compassion par le persone compagno Gesù el ga fato. (1 Pie. 2:21; 3:8) Anca se no semo boni de curar quei che i ze orbi o che no i scolta mia, podemo giutarli a deventar amighi de Geovà. Come? Noantri femo publicassion in de pi de 100 léngue de segnai. E giutemo quei che i ze orbi par meso de publicassion in braile in de pi de 60 léngue e par meso de vìdei con àudio descrission in de pi de 100 léngue. Cossita, quei che i ze orbi e quei che no i scolta mia i pol cognosser a Geovà e al so Fiol.

11. Come che la organisassion de Geovà la ze drio far compagno a Gesù? (Ati 2:5-7, 33) (Varda anca la ilustrassion.)

¹¹ Dopo che Gesù l’è stà ressussità, lu el ga dato spìrito santo par tuti quei che i era riunidi par la Festività de Pentecoste. Cossita tute quele persone le ga scoltà le bone notìssie nela so léngua. (Ledi Ati 2:5-7,e 33.f) La organisassion de Geovà la se sforsa de far compagno a Gesù e giutar persone de tuti i posti e de tute le culture. Le nostre publicassion le ze fate in de pi de mila léngue. Arquante de queste léngue le ze doperade par poche persone. Par esémpio, ghen’è tanti tipi de léngue che i indi i parla. Arquante de queste léngue le ze doperade par poche persone. Anca cossita, ghen’è publicassion in de pi de 160 de queste léngue dei indi. Le nostre publicassion anca le ze fate in de pi de 20 léngue dei sigani. Miliari de persone che le parla queste léngue le ga scominsià a servir a Geovà.

12. Che altre robe la organisassion de Geovà la fà?

¹² La organisassion de Geovà anca la giuta quei che i sofre par causa dele desgràssie dela naturesa. Quando sucede robe cossita, miliari de fradei e sorele i ze pronti par giutar quei che i ga de bisogno. La organisassion anca la fà su posti ndove i fradei e sorele i pol riunirse par imparar de pi sora Geovà.

GESÙ EL POL GIUTARTE

13. Come che Gesù el ne giuta ancoi?

¹³ Gesù l’è come un pastor che tende tanto ben dele so piégore. Alora, lu el vol darte tuto quel che te ocore par gaver una forte amicìssia con Geovà. (Gio. 10:14; Efe. 4:7) Pol esser che, par causa de una malatia, de un sbàlio o de quel che un fradel o una sorela ne ga dito, se sentimo come un stupin che l’è quasi drio smorsarse o come una cana che la ze spacada. Fursi pensemo sol nel nostro sofrimento invesse de vardar la bela speransa che ghemo par el futuro. Se te sì drio sentirte cossita, ricòrdate che Gesù l’è drio veder tuto quel che te sì drio infrontar e el capisse tuto quel che te senti. Lu el vol tanto giutarte in quel che te ocore. Ma come che lu el fà questo? Gesù el pol darte la forsa che te ocore par ndar avanti. (Gio. 16:7; Tito 3:6) Lu anca el pol doperar i cari ansiani e altri fradei e sorele par incoraiarte e giutarte. — Efe. 4:8.

14. Cossa che te pol far quando te sì desanimà?

¹⁴ Se te sì drio sentirte desanimà, ricòrdate che Gesù l’è el nostro Sasserdote Prinsipal, e pensa come che lu el pol giutarte. Geovà el ga mandà so Fiol ala Tera par dar la so vita come sacrifìssio, ma anca par giutarlo a capir meio i problemi che infrontemo. Alora, quando semo desanimadi par causa dei nostri sbali e dei nostri pecati, podemo esser sicuri che Gesù el ga caro de giutarne. — Ebr. 4:15, 16.

15. Cossa che ga giutà un fradel a tornar servir a Geovà?

¹⁵ Gesù anca el dopera i fradei par giutar quei che i se ga fermà de servir a Geovà. (Mat. 18:12, 13) Varda quel che ga sucedesto con Stefano.g Lu l’è stà cavà via dela congregassion e l’è restà distante de Geovà par 12 ani. Ma lu el ga dessidio ndar nte una riunion. Lu el ga dito: “Me ga fato tanto fadiga ndar a quela riunion, ma mi volea far parte dela fameia de Geovà nantra volta. I ansiani che i ze vegnesti parlar con mi i me ga tratà tanto ben. Vanti, mi pensea tante volte che no gavea mia valor e che l’era meio desister de tornar servir a Geovà. Ma i fradei sempre i me ricordea che Geovà e Gesù i volea tanto che mi seitesse a sforsarme. Quando son tornà a esser una Testimònia de Geovà, tuti i fradei i ga ricevesto a mi e ala me fameia con tanto amor. La me dona la ga acetà studiar la Bìblia, e ancoi servimo a Geovà tuti insieme.” Sicuro che Gesù el resta tanto contento de veder che quei che i ga fato bruti pecati i se ga ciamà grami e i ze tornadi a Geovà!

16. Parché che l’è tanto bon saver che Gesù l’è el nostro Sasserdote Prinsipal?

¹⁶ Quando Gesù l’era qua nela Tera, lu el ga giutà tante persone. Alora, podemo esser sicuri che ancoi lu el ndarà giutarne sempre che ne ocore, e che nel futuro, lu el ndarà finir fora con tuto el sofrimento e el ndarà giutar le persone a esser perfete e a viver par sempre. Restemo tanto contenti de saver che Geovà el ga scoliesto el so Fiol par esser nostro Sasserdote Prinsipal!