‘Seité unidi par via del spìrito’
EL APÒSTOLO Paolo el ga dito ai fradei efesi che lori i gavea de seitar a ‘soportarse un al altro con amor e a sforsarse del tuto par seitar unidi par via del spìrito e gaver la pace che la une’. — Efe. 4:2, 3.
La union che ghemo la vien del spìrito. Questo vol dir che semo unidi par causa del spìrito santo de Geovà. Ma Paolo el ga dito che noantri ghemo de sforsarse par seitar unidi. Alora, tuti noantri ghemo de far el nostro meio par “seitar unidi par via del spìrito”.
Pensa nte un esémpio. Metemo dir che qualchedun te ga dato un auto novo de presente. Sicuro che te sì ti che te ghè de tenderlo e mantegner tuto a posto. Alora, se no te fè mia cossita e vien fora un problema nel auto, sicuro che la colpa no la ze de quela persona che la te ga dato questo presente.
Dela medèsima maniera, anca la union nela congregassion la ze un presente de Geovà e tuti noantri ghemo de sforsarse par mantegnerla. Par quela, se te ghè un problema con un fradel o sorela, te ghè de domandarte: ‘Son drio sforsarme par esser in union con questo fradel o sorela?’
‘SFORSEVE DEL TUTO PAR SEITAR UNIDI’
Come Paolo el ga dito, dele volte, no l’è mia fàcile seitar unidi quando qualchedun ne ofende. Sarà che quando ne sucede una roba cossita, sempre ghemo de ndar parlar cola persona? Fursi nò. Te pol domandarte: ‘Sarà che se mi vao parlar con ela, la situassion la restarà meio o pedo?’ Se vedemo che va restar pedo, l’è meio assar star. — Pro. 19:11; Mar. 11:25.
Te pol domandarte: ‘Sarà che se mi vao parlar cola persona, la situassion la restarà meio o pedo?’
Paolo el ga dito che ghemo de ‘soportarse un al altro con amor’. (Efe. 4:2) Un libro el ga dito che queste parole le vol dir che ghemo de “acetar le persone come lore le ze”. Alora, ghemo de acetar che i nostri fradei i fà sbali, come noantri. L’è vera che semo drio proar gaver la “nova personalità”, ma ancora no semo perfeti. (Efe. 4:23, 24; Rom. 3:23) Se pensemo cossita, sarà pi fàcile soportarse, perdonarse e seitar unidi.
Gavaremo la pace che la une nela congregassion quando perdonemo e se desmenteghemo de qualcossa bruta che i ne dise. La parola greca “pace che la une” in Efesi 4:3 la ze doperada anca in Colossensi 2:19 par dir “tendoni”. Savemo che i tendoni i fà la union intrà i ossi. Dela medèsima maniera, la pace e el amor ne giuta a seitar unidi coi nostri fradei, anca se no ne piase de qualcossa che i fà.
Alora, quando un fradel el ne dise qualcossa che no ne piase e che ne fà restar cativi, ghemo de proar capir parché el ne ga dito quela roba invesse de parlar mal de lu. (Col. 3:12) Ghemo de ricordarse che, come tuti semo imperfeti, anca noantri ndaremo ofender qualchedun. Cossita, saremo boni de “seitar unidi par via del spìrito”.