Cossa la Bìblia la dise sora guera nuclear?

Nel mondo, ghen’è ancora el perìcolo de suceder una guera nuclear, parché i paesi pi poderosi i ga sempre de pi arme nuclear. Par quela che le persone le resta preocupade. Tante le ga fin paura de che doperar sol una arma nuclear pol scominsiar una guera nuclear in tuto el mondo che finirà fora cola Tera. El Boletim de Cientistas Atômicosa dise che “ghen’è sempre el perìcolo de una guera nuclear”.

Sarà che una guera nuclear la pol pròpio suceder? Se la sucede, cossa sarala dela Tera? E come podemo darghene fora cola paura de una guera nuclear? Cossa la Bìblia la dise?

In questo artìcolo

Sarà che la Bìblia la parla sora guera nuclear?

La Bìblia no la parla pròpio sora guera nuclear. Ma ghen’è el perìcolo de una guera nuclear par causa de come che le ze le persone e quel che sucede nel mondo, come l’era belche scrito nela Bìblia.

Varda quel che l’è scrito nela Bìblia e fà una comparassion con quel che l’è drio suceder nel mondo ancoi:

Testo dela Bìblia: I dissìpoli de Gesù i ghe ga domandà: “Quando che ndarà suceder queste cose e qual che sarà el segnal dela to presensa e del fin del sistema de cose?” Gesù el ga rispondesto: “Nassion se levarà su contra nassion e regno contra regno”. — Mateo 24:3, 7.

Cossa sucede nel mondo: Tanti paesi i ze drio far cada volta de pi guere, anca quei che i ga arme nuclear.

“El mondo l’è drio restar cada volta pi violento nei ùltimi ani. Ghen’è sempre de pi guere.” — Projeto de Dados de Localização e Eventos de Conflitos Armados.b

Testo dela Bìblia: “Nel tempo del fin, el rè del sud e el rè del nort i scominsiarà a urtarse un al altro”. — Daniel 11:40.

Cossa sucede nel mondo: Ghen’è tanti paesi che i se ‘urta’, o sia, che i va un contra el altro par deventar i pi poderosi del mondo, pròpio come la Bìblia la disea. Anca se questi paesi no i ze drio far guera drito un contra el altro, lori i seita a far pi forte le so arme nuclear.

“Nei ùltimi diese ani ghen’è stà de pi guere intrà i paesi. Anca i paesi pi grandi i se mete in queste guere.” — Programa de Dados de Conflito da Universidade de Uppsala.c

Testo dela Bìblia: “Nei ùltimi giorni ghen sarà tempi crìtichi, difìcili de soportar. Parché le persone . . . no le sarà disposte a far acordi, le sarà caluniadore, sensa autocontrolo, crudele”. — 2 Timòteo 3:1-3

Cossa sucede nel mondo: Come tante persone ancoi, i governanti del mondo no i ze disposti a far acordi. E invesse de proar risolver i so problemi in pace, i fà minasse un contra el altro e i dopera pròpio la forsa. Par quela che ghen’è cada volta de pi el perìcolo de una guera nuclear.

“Se no catemo una maniera de laorar ben un colaltro, le guere le sarà cada volta pedo.” — S. Saran e J. Harman, Fórum Econômico Mundial.d

Sarà che Dio el assarà suceder una guera nuclear?

La Bìblia no la dise mia. Ma la dise che, nei nostri giorni, “le persone le vedaria robe de spaurarse”. (Luca 21:11) Un esémpio l’è stà le bombe atómiche molade nela Seconda Guera Mondial. La Bìblia la spiega parché che Dio el assa che le guere le suceda. Par imparar de pi, varda el vìdeo Parché che ghen’è tanto sofrimento?

La Tera la sarà destruta?

Nò. Anca se i òmini i doperesse arme nuclear nantra volta, Dio no’l ndarà mai assarli finir fora cola vita nela Tera. La Bìblia la dise che el nostro pianeta Tera mai sarà destruto e sempre ghen sarà vita qua.

“La Tera la resta par sempre.” — Eclesiasti 1:4.

“Geovà, el Creador del cielo, el vero Dio, quel che el ga fato la tera e la ga creada, quel che la ga fata pròpio firme e che no la ga creada par gnente ma par le persone viver nela.” — Isaia 45:18.

Tanti i pensa che nel futuro la Tera la sarà tuta rovinada, e che poche persone le viverà qua e le ndarà tribolar par restar vive par causa dei resultadi de una guera nuclear. Ma la Bìblia la dise che Dio el ndarà rangiar tuto el mal che l’è stà fato nela Tera par causa dele guere.

“El deserto e la tera seca i restarà contenti. El deserto el restarà contento e el ndarà fiorir come el assafron.” — Isaia 35:1.

Persone drio laorar insieme e contente nte un paradiso nela Tera. — Dio el vol che vivemo felice nte un paradiso nela Tera

Nostro Creador el ga fato la Tera cola maraveiosa capacità de rangiarse ela sola. Ancora cossita, Dio el ndarà doperar el so poder par assarla a posto nantra volta. Ela la sarà par sempre un posto maraveioso par i umani i viver. — Salmo 37:11, 29; Apocalisse 21:5.

Come darghene fora cola paura de una guera nuclear?

Arquante persone le ga tanta paura che suceda una guera nuclear che le pol fin sofrir con ansietà. Ma le promesse e i consili dela Bìblia pol giutar a darghene fora cola paura e cola ansietà.

La Bìblia la parla de un bel futuro par la Tera e par quei che i vive nela. Questa speransa la ze come una ‘àncora par la nostra vita’. Una àncora la giuta un barco a restar fermo in meso un temporal, e la speransa la ne giuta a restar manco ansiosi. (Ebrei 6:19) Nantra roba che podemo far par sentirse manco ansiosi l’è viver un giorno ala volta, sensa pensar massa in quel che podaria suceder nel futuro. Gesù el ga dito: ‘Basta a cada giorno le so dificoltà’. — Mateo 6:34.

Tuti noantri ghemo de tender dei nostri pensamenti e sentimenti. Par quela, ghemo de star atenti par no leder, vardar o scoltar informassion che ne fà restar ansiosi, come notìssie e idee dele persone sora le arme nuclear. Far cossita no vol mia dir che no bademo quel che l’è drio suceder. Invesse, vol dir che semo drio tender de no restar massa ansiosi con robe che no podemo mia controlar e che fursi gnanca le suceda.

“La ansietà la fà el cuor de una persona restar desanimà.” — Proverbi 12:25.

No stà mia sol pensar nele notìssie brute, ma toghete un tempo par pensar nele robe bone dela vita.

“Che el Dio che el dà speransa el ve fae gaver tuta la alegria e la pace par via dela vostra confiansa in lu.” — Romani 15:13.

Stampe: Un omo el varda avanti con confiansa. 1. De drio de lu, l’è drio suceder una guera, con avioni, arme nuclear e bombe. 2. Davanti de lu, ghen’è la Tera in pace, con monti, bei campi, un rio e osei. — La Bìblia la ne dà una speransa sicura de un futuro meio.

Imparar de pi sora le promesse de Dio pol darte speransa, alegria e pace.

Sará che la Bìblia la dise che el Armagedon sarà par via de una guera nuclear?

Arquanti i pensa che el Armagedon el sarà una guera nuclear in tuto el mondo. Una guera cossita ndaria finir fora con tuta la Tera.

Ma la Bìblia la dopera la parola “Armagedon” par parlar de una guera intrà Dio e tuti i ‘rè dela Tera’, o sia i governi umani.e (Apocalisse 16:14, 16) Una bomba atómica la finisse fora con tuto, ma el Armagedon no’l sarà cossita. Dio el va doperarlo par finir fora sol coi rugni. Cossita, tuti i poderà viver in pace e sensa paura. — Salmo 37:9, 10; Isaia 32:17, 18; Mateo 6:10.

Cossa che la Bìblia la dise sora el fin dele guere?

“Lu el finisse fora con tute le guere che ghen’è nela tera. El spaca el arco e la lansa e el brusa le carete nel fogo.” — Salmo 46:9.

Geovàf el ndarà mostrar che l’è pi poderoso che tuti i paesi che i fà guera quando el finirà fora cole guere e cole arme. Par far cossita, lu el ndarà doperar el so Regno, che l’è un governo nel cielo che ndarà governar tuta la Tera. — Daniel 2:44.

El Regno de Dio el ndarà insegnar le persone a viver in pace e union. No ghen sarà pi barufe intrà i paesi, parché tuta la Tera la gavarà sol un governo. Le persone mai pi le va imparar a far guere. (Michea 4:1-3) E lora, come sarà la vita nela Tera? Le persone “le se sentarà cada una soto la so vigna e soto el so figher, sensa nissuni par spaurarle”. — Michea 4:4.

a Tìtolo original: Bulletin of the Atomic Scientists.

b Tìtolo original: The Armed Conflict Location & Event Data Project.

c Tìtolo original: The Uppsala Conflict Data Program.

d Fonte: S. Saran and J. Harman, World Economic Forum.

e Varda el artìcolo “Cossa che la ze la guera del Armagedon?”

f Geovà l’è el nome de Dio. (Salmo 83:18) Varda el artìcolo “Chi l’è Geovà?”

El libro de Apocalisse el parla sora una guera nuclear?

Arquanti i pensa che el libro de Apocalisse el parla sora una guera nuclear che ndarà finir fora con tuta la Tera. (Apocalisse 6:14; 8:7-12; 16:1-21) Par esémpio, la parla sora ‘vegner do fogo del cielo sora la tera’. (Apocalisse 13:11-13) Ma le Testimónie de Geovà le capisse che questo testo l’è drio parlar sora bombe atómiche che le ze state doperade nela Seconda Guera Mondial, e no de una guera nuclear mondial.

Anca se el libro de Apocalisse el parla sora queste robe, el so ogetivo no l’è mia parlar sora i bruti detali dele guere. Quando te ledi el libro de Apocalisse, ricòrdate:

Questo libro tante volte el parla de maniera simbòlica. — Apocalisse 1:1.
El ogetivo del libro no l’è mia spaurar quei che i lo ledi. Invesse, quel che el dise dà felicità a quei che i lo capisse e che i lo mete in pràtica. — Apocalisse 1:3.

Par saver de pi, ledi el artìcolo: “Qual é o significado do livro de Apocalipse?”