Le Testimònie de Geovà le ga cambià la Bìblia par assarla de acordo cole so credense?
Nò. Invesse, quando ghemo visto che le nostre credense no le era pròpio de acordo cola Bìblia, le ghemo cambiade.
Tanto tempo vanti de scominsiar a far la Tradussion del Novo Mondo dele Scriture Sacre in 1950, noantri belche studieino la Bìblia, dopereino le tradussion che ghen’era in quel tempo e dessideino in cossa creder de acordo con quel che l’era scrito nela Bìblia. Varda tre robe che fà tempo che le Testimònie de Geovà le crede e pensa se te cati che lore le ze de acordo con quel che la Bìblia la insegna.
Quel che credemo: Dio no l’è mia una Trinità. La revista La Tore de Vigia de Sion (Zion’s Watch Tower) de lùlio de 1882 la ga dito: “Quei che i lede questa revista i sa che noantri credemo in Geovà, in Gesù e nel spìrito santo. Ma no credemo mia che lori i ze tre dei nte una persona o, come altri i dise, che i ze un sol Dio in tre persone. Questo insegnamento el va contra la Bìblia.”
Quel che la Bìblia la dise: “Geovà, el nostro Dio, l’è un sol Dio.” (Deuteronómio 6:4, Versão Brasileira) “Par noantri ghen’è un sol Dio, el Pare. Tute le robe le ze de lu, e noantri semo vivi par causa de lu. Ghen’è un sol Signor, Gesù Cristo. Par meso de lu ghen’è tute le robe, e noantri semo vivi par meso de lu.” (1 Corinti 8:6, Almeida Revista e Atualizada) El pròpio Gesù el ga dito: “El Pare l’è pi grando de mi.” — Gioani 14:28, Almeida Revista e Atualizada.
Quel che credemo: No ghen’è mia sofrimento eterno nte un inferno de fogo. La revista La Tore de Vigia de Sion (Zion’s Watch Tower) de giugno de 1882 la ga doperà le parole de Romani 6:23 nel so tìtolo, che l’era: “El salàrio che el pecato el paga l’è la morte”. La revista la disea: “Questa frase la ze pròpio ciara e sémplisse. L’è strànio che tanti che i dise creder nela Bìblia come la Parola de Dio no i vol acetar questo insegnamento. Lori i crede e i dise che la Bìblia la insegna che el salàrio che el pecato el paga l’è una vita eterna de sofrimento.”
Quel che la Bìblia la dise: “La ànima che peca, questa la morirà.” (Ezechiel 18:4, 20, Almeida Revista e Atualizada) La punission par i nemighi de Dio no la ze sofrimento eterno, ma sì “destrussion eterna”. — 2 Tessalonissensi 1:9, Almeida Revista e Atualizada.
Quel che credemo: El Regno de Dio l’è un governo de verità, no sol una roba che ghen’è nel cuor. Sora el Regno de Dio, La Tore de Vigia de Sion de disembre de 1881 la ga dito: “Quando questo Regno scominsiar a governar nela Tera, l’è sicuro che tuti i altri governi dela Tera i sarà finidi fora.”
Quel che la Bìblia la dise: “Nei giorni de questi rè, el Dio del cielo el farà governar un regno che mai el sarà finio fora. E questo regno no’l sarà passà a nissun altro pòpolo. El ndarà farli a tochi e el finirà fora con tuti questi regni, e sol lu el restarà par sempre.” — Daniel 2:44, Almeida Revista e Atualizada.
Sarà che le Testimònie de Geovà le ga bisogno dela Tradussion del Novo Mondo par mostrar che le so credense le vien dela Bìblia?
Nò, parché noantri doperemo tante altre tradussion dela Bìblia nel nostro laoro de predicassion. L’è vera che quando studiemo la Bìblia cole persone noantri ghe demo a lore una Tradussion del Novo Mondo dela Bìblia. Ma anca semo contenti de studiar la Bìblia con quei che i vol doperar altre tradussion.