Cossa che la Bìblia la dise sora pintarse e doperar gioie?

La risposta dela Bìblia

La Bìblia no la parla tanto sora questo assunto, ma no la dise mia che l’è sbalià pintarse, doperar gioie o altre robe par farse bei. Invesse de parlar tanto sora la aparensa, la Bìblia la dise che l’è pi importante darghe atension ale ‘qualità che no le se smarsisse e che ghemo par rento nel cuor, come la calma e la brandura’. — 1 Piero 3:3, 4.

Doperar gioie no l’è mia sbalià

• Brave done che adorea a Dio le doperea gioie. Vanti de maridarse con Isache, fiol de Abraon, Rebeca la ga doperà un anel de oro par el naso, pulsere de oro e altre gioie che la gavea guadagnà de Abraon. (Génesi 24:22, 30, 53) Anca Ester la ga fato ‘tratamenti par farse pi bela’ vanti de esser scoliesta par esser regina dela Pèrsia. (Ester 2:7, 9, 12) In questi tratamenti, pol esser che la ga doperà ‘cosmètichi’ o ‘diversi mestieri par pintarse’. — Nova Versão Internacional; Easy-to-Read Version.

• La Bìblia la compara gioie con robe bone. Par esémpio, la dise che “par quel che el scolta con atension, la coression che el sàbio el dà la ze come recini de oro”. (Proverbi 25:12) Anca, Dio el ga dito che el tratea la nassion de Israel come un omo che el dea pulsere, recini e un colar ala so noiva. La Bìblia la dise che queste gioie le ga assà la nassion ‘belìssima’. — Ezechiel 16:11-13.

Idee sbaliade sora pintarse e doperar gioie

Idea sbaliada: L’è sbalià pintarse parché la trista regina Gezabel la se pintea i oci. — 2 Rè 9:30.

Verità: Gezabel la era striona e la ga mandà copar tante persone. Ela la ze stata giulgada par causa dele brute robe che la fea, no parché la se pintea. — 2 Rè 9:7, 22, 36, 37.