I GIÓVENI I DOMANDA

Cossa far se un amigo el me disgusta?

Cossa che te ghè de saver

Vien fora problemi fin intrà i amighi. Semo tuti imperfeti. Alora, fin el to meio amigo pol dir o far una roba che te disgusta. Ma anca ti te sì imperfeto. E, par dir la verità, sarà che ti no te ghè mai disgustà qualchedun? — Tiago 3:2.
Te pol restar disgustà par causa de quel che te vedi nela internet. Par esémpio, un gióveno de nome David el ga dito: “Dele volte, te sì drio sfrugnar nela internet e te vedi ritrati dei to amighi drio divertirse. Alora, te scominsi a domandarte parché no i te ga mia convidà. E cossita te te senti tanto disgustà.”
Te sì bon de darghene fora con questi sentimenti.

Cossa che te pol far

Pensaghe sora i to sentimenti. La Bìblia la dise: “No stà mia ofénderte suito, parché l’è el cuor dei stùpidi che el se ofende.” — Eclesiasti 7:9.

“Dele volte, te te nicordi che quel che la persona la ga fato no l’è stà tanto bruto cossita.” — Alyssa.

Pensaghe sora: Sarà che dele volte no te sì parmoloso? Cossa càtito de far un sforso par no badar massa i sbali dei altri? — Eclesiasti 7:21, 22.

Pensa parché che l’è bon perdonar. La Bìblia la dise: ‘L’è bel quando una persona la perdona le robe rugne che i ghe ga fato.’ — Proverbi 19:11.

“Anca se te ghè rason, l’è bon perdonar del tuto. Quando te fè cossita, no te seiti ricordar la persona de quel che ga sucedesto, e gnanca te la fè sentirse in colpa tuto el tempo. Dopo che te ghè perdonà, desmentega del assunto.” — Mallory.

Pensaghe sora: Sarà che quel che ga sucedesto l’è stà tanto bruto cossita? Sarà che no te pol perdonar par mantegner la pace? — Colossensi 3:13.

Assar el fredo vegner rento — La amicìssia la ze come un posto caldo che te protege del fredo nte un giorno de inverno. Seitar parlar de un problema l’è come seitar verder la porta e assar el fredo vegner rento.

Proa meterte nel posto de l’altra persona. La Bìblia la dise: “No sté preocuparve sol con quel che valtri volé, ma anca con quel che i altri i vol.” — Filipensi 2:4.

“Quando ghen’è amor e rispeto intrà ti e el to amigo, ti te ghè boni motivi par risolver el problema suito. Te ghè belche fato sforso par gaver questa amicìssia, e no te vol mia perderla.” — Nicole.

Pensaghe sora: Sarà che no te pol imparar gnente cola maniera de pensar de l’altra persona? — Filipensi 2:3.

Conclusion: Saver cossa far quando qualchedun te disgusta ndarà giutarte tanto nel futuro. Cossa che te cati de imparar a far cossita adesso?