Cossa che la Bìblia la dise sora esser generoso?
La risposta dela Bìblia
La Bìblia la ne incoraia a dar cose ai altri de volentiera e cola motivassion giusta. Anca la dise che dar cose ai altri l’è bon par quei che i riceve e par quei che i dà. (Proverbi 11:25; Luca 6:38) Gesù el ga dito: “Ghen’è de pi felicità in dar che in ricever.” — Ati 20:35.
Quando che esser generoso ghe piase a Dio?
Dio el ghe piase quando demo qualcossa ai altri parché volemo. La Bìblia la dise: “Fà cada un come el ga dessidio nel so cuor, nò sensa voia o par forsa, parché Dio el ama quel che el dà con alegria.” — 2 Corinti 9:7.
Dar de cuor fà parte dela “maniera de adorar a Dio” che ghe piase a lu. (Tiago 1:27) Quando semo generosi coi poareti, semo drio laorar con Dio, e lu el vede questa generosità come una roba data in préstio par lu. (Proverbi 19:17) La Bìblia la insegna che Dio el ndarà benedir la persona generosa. — Luca 14:12-14.
Quando che esser generoso no ghe piase mia a Dio?
Quando l’è fato cole motivassion sbaliade. Par esémpio:
Par farse veder. — Mateo 6:2.
Par ricever qualcossa indrio. — Luca 14:12-14.
Par proar comprar la salvassion. — Salmo 49:6, 7.
Quando quel che l’è dato l’è doperà par robe che Dio el òdia. Par esémpio, saria sbalià dar soldi a qualchedun che ndarà guastarli nel giugo, par doperar droghe, o par bever massa. (1 Corinti 6:9, 10; 2 Corinti 7:1) Anca no saria giusto dar soldi a qualchedun che el pol laorar par viver ma no’l vol mia. — 2 Tessalonissensi 3:10.
Quando una persona la assa la so fameia de banda par esser generosa coi altri. La Bìblia la insegna che i paroni de fameia i ga de tender par che la so fameia sempre la gàpia quel che la ga de bisogno. (1 Timòteo 5:8) Saria sbalià se un paron de fameia el ghe desse tante cose ai altri che la so pròpia fameia la scominsiesse a patir. Gesù el ga condanà quei che i disea che tuto quel che i gavea l’era un “presente par Dio” come scusa par nò dar quel che i so genitori de pi età i gavea de bisogno. — Marco 7:9-13.