Come le Testimònie de Geovà le dopera i donativi?
Noantri doperemo i donativi par mantegner el laoro de insegnar la Bìblia e giutar le persone quando sucede una desgràssia. El nostro prinsipal ogetivo l’è giutar le persone a deventar seghidore de Gesù Cristo. — Mateo 28:19, 20.
Noantri mai doperemo i nostri donativi par giutar qualchedun a deventar sior. Gnanca una Testimònia de Geovà la ciapa soldi par predicar de casa in casa o parché l’è un ansiano de una congregassion. Tuti quei che i serve nele nostre filiai e nela Sede Mondial e anca quei che i ze del Corpo Governante i fà parte de una òrdine religiosa e no i ciapa soldi par quel che i fà.
Arquante robe che femo
Produssion de publicassion: Tuti i ani, noantri tradusimo, stampemo e mandemo ale persone milioni de Bìblie e altre publicassion. E lore no ghe ocore pagar gnente. Anca, le persone le pol leder le nostre publicassion e vardar i nostri vìdei nel site jw.org e nel aplicativo JW Library sensa pagar gnente e sensa gnanca una propaganda.
Costrussion e manutension: In tuto el mondo, noantri femo su e rangiemo posti sémplisse che le persone le se riune par adorar a Dio. Anca noantri femo su e rangiemo le filiai e scritori de tradussion. Guastemo manco soldi parché volontari i fà quasi tuto el laoro.
Come tendemo dele nostre atività: I donativi fati anca i ze doperadi par tender dele atività fate nela Sede Mondial, nele filiai, nei scritori de tradussion e de quei che i viaia par incoraiar le congregassion.
Predicassion: Le Testimònie de Geovà no le riceve soldi par predicar le bone notìssie o par insegnar ai altri la “parola de Dio”. (2 Corinti 2:17) Compagno ai cristiani del tempo dei apòstoli, arquanti i ze scoliesti e i riceve trenamento par doperar la pi granda parte del so tempo par insegnar la Bìblia. Lori anca i riceve un posto de star sémplisse e un pìcolo aiuto par comprar le prinsipai robe che ghe ocore. — Filipensi 4:16, 17; 1 Timòteo 5:17, 18.
Insegno: I donativi i giuta a pagar i guasti dele nostre assemblee e congressi. Anca li doperemo par far àudio e vìdei sora assunti dela Bìblia. Organisemo anca scole par trenar ansiani e altre Testimònie de Geovà che le serve nel tempo integral. Cossita, i ze boni de far le so atività.
Aiuto quando ghen’è desgràssie: Ghe demo àqua, magnar e un posto de star par le persone che le ga passà par una desgràssia dela naturesa. Questo laoro volontàrio el giuta “a quei che par meso dela fede i ze nostri fradei e sorele” e anca a quei che no i ze mia Testimònia de Geovà. — Gàlati 6:10.