Cossa la Bìblia la dise sora el Nadal?
La risposta dela Bìblia
La Bìblia no la dise el giorno che Gesù l’è nassesto, gnanca la dise che ghemo de selebrar el so aniversàrio. La Cyclopedia de McClintock e Strong la dise: “Dio no’l ga mandà selebrar el Nadal e no ghen’è gnente sora questa selebrassion nel Novo Testamento”.
Invesse, quando studiemo la stòria del Nadal, vedemo che el vien de costumi dela religion falsa. La Bìblia la mostra che Dio el resta disgustà se proemo adorarlo de una maniera che lu no’l aprova. — Ésodo 32:5-7.
Quala ze la stòria dei costumi del Nadal?
La selebrassion del aniversàrio de Gesù: I primi dissìpoli de Cristo “i vedea la selebrassion de aniversàrio come una cosa fata par persone che le pratichea la adorassion falsa. Par quela, no i selebrea el aniversàrio de Gesù.” — Ensiclopèdia Delta Universal.
25 de disembre: No ghen’è gnanca una prova de che Gesù l’è nassesto in questo giorno. Par quel che se vede, i lìderi dela Ciesa i lo ga scoliesto par esser darente o nel medèsimo giorno de una selebrassion dela religion falsa, fata nel primo giorno del inverno.
Darse presenti, far festa: La Encyclopedia Americana la dise: “Darente la metà de disembre, i romani i fea una festa de nome ‘Saturnàlia’. Tanti dei costumi del Nadal i ze vegnesti de questa festa. Par esémpio, far grande sene, darse presenti e impissar candele”. Anca, la Encyclopædia Britannica la dise che, nela Saturnàlia, “se fermea tuti i laori e tuto el comèrsio”.
Le luce de Nadal: De acordo con The Encyclopedia of Religion (La Ensiclopèdia dela Religion), persone dela Europa le decorea le so case “con luce e tanti tipi de pini” par selebrar el primo giorno del inverno e par parar via spìriti rugni.
Piante par decorassion: “Nela Europa, sasserdoti dei tempi antighi i doperea par far strionaria una pianta che ancoi se dopera come decorassion de Nadal. Anca, i adorea nantra pianta de questo tipo, come se la fusse una garansia de che el sol el ndaria ritornar”. — The Encyclopedia Americana.
Pin de Nadal: “Nei tempi antighi, tanti pòpoli dela Europa i gavea el costume de adorar piante, e i ga seità farlo dopo de deventar cristiani”. Una maniera che la adorassion de piante la seita fin ancoi la ze col costume de “meter un pin darente dela porta o rento dela casa nele selebrassion de disembre”. — Encyclopædia Britannica.