Silempwale ni Luka

3 Eyaakha ya 15 wa olamulela wa Tiberio Sesare ni emaara Poncio Pilatu aaraawe namalamulela a oYudeya, Herodi* eera areene namalamulela a oGalileya, munna awe Filipe eera alamulelaka muttetthe wa Itureiya ni Trakonite, ni Lisaniya aari namalamulela a eTistritu ya Abilene, 2 Mahiku amutokweene aanamakeya Anas, ni Kaifa, Muluku aahuuluma ni Yohani mwaana a Zakariya onikareni.*

3 Nto Yohani aaheetteetta muttetthe wootheene woowaattamela mooloko Yordani, aalaleeraka atthu weera opatiso ethoonyero ya orukunuxa murima weera mutthu aleveleliwe soottheka sawe, 4 eyo yeereñye moovarihana ni ele elempwale eliivuru ya profeta Yesaya yeeraka: “Nsu na mutthu ninnakhuwela onikareni neeraka: ‘Mureherere ephiro ya Yehova! Mookolole misewe sawe. 5 Malitti eri ootheene enimuuheeleliwa, ni mwaako ori wootheene ni mattumuxa enoophwexiwa;* misewe sookhoromana* sinookhala soowookowa ni iphiro soothipeya sinookhala soowaataleleya; 6 ni atthu ootheene enimoona ovuluxa wa Muluku.’”*

7 Vano, Yohani anneerela muloko mutokotoko waatthu waaweela opatisiwa: “Nloko na evili, taani oolenleni weera munoowera otthawa isara sa Muluku sikhuvenle? 8 Tivanto, miteko sanyu soonihereke weera moorukunuxa murima. Muhipatxere ohima mweeraka, ‘Nookhalano tiithi ahu Abrahamu.’ Mweekhaikhai, Muluku pooti otatuxa maluko ala okhala anamwane Abrahamu. 9 Mweekhaikhai, maxato ori oolikaneene weera athikile mikakaari sa miri, miri sootheene sihiniima soowiima sooreera, inoothikiliwa ni ovonyeriwa vamooroni.”

10 Vano muloko mutokotoko waatthu waamukoha: “Nintthuneya weera nipakeke eheeni?” 11 Owaakhula enre: “Ole orino maleya meeli* onvahe mukhwaawe ohikhanleno, ole orino yootxa onvahe ole ohikhanleno.”‏ 12 Mpaka anamaliviha mpostu* yannawa weera epatisiwe ni yannamukoha: “Muhusiha, nintthuneya opaka eheeni?” 13 Yohani aawaakhula eeraka: “Muhiliviheke* mpostu* opwaha musurukhu onvekeliwa.”‏ 14 Nave-tho anakhotto yaamukoha yeeraka: “Nintthuneya weera nipakeke eheeni?” Owo aawaakhula aweerelaka: “Muhaahasuleke atthu,* muhimoothereke mutthu ni muhakalaleke ni ele munaakhelaanyu.”‏

15 Atthu ootheene yannanweherera Kristu ni yannuupuwela woohima sa Yohani yeeraka, “Neereke ola Kristu?” 16 Yohani aawaakhula ootheene ale aweerelaka: “Miyo kinoopatisani ni maahi, mene ottuli waka onnawa mutthu ooweraxa, ni miyo, nkiphwanenle otaphula mikoyi sa isantaaliya sawe. Owo onimoopatisani ni munepa wootteela ni mooro. 17 Owo oomukuxa apa mmatatani mwawe weera ammwalamwaxe tiriku ni iphepu, anaakwese nipuro ommukhupelaiyevo tiriku ni omwiiyaathi vantathani tiriku ooreera, mene iphepu onoorowa ohisa vamooroni ohintxipha.”

18 Vano Yohani annawooperera atthu ni masu mantxipale makina ni annavirelela waalaleera mitthenka sooreera atthu ootheene. 19 Nave Yohani, annamuximwela Herodi namalamulela mwaha wa Herodiya mwaariye Filipe munnawe Herodi, ni mwaha wa itthu sootheene soonanara aapankaawe, 20 nto mwaha wa yeeyo, Herodi aamutthukiha Yohani.

21 Nto Yohani aapatisakaru atthu ootheene, ampatisa-tho Yesu. Ariki ovekela, erimu yaahuleya, 22 ni munepa wootteela waamukhuruwela owo wooneyaka ntoko epompa,* ni nsu naakhuma wiirimu neeraka: “Nyuwo mwanaka oosiveleyaxa, mwa nyuwo kinnahakalala.”‏