Silempwale ni Matheyo

24 Emaara Yesu aakhumaawe mutemplu, atthareli awe yaamwaattamela weera emoonihere matekeliwo a empa ya Muluku. 2 Vano, Yesu aahaakoha: “Keera munnoona itthu sootheene iya?” Nto, kinnooleelani ekhaikhai weera: enoophiya mahiku nihinrowaaya ohala nluku vasulu va nluku nikhwaaya nihimorihelinwe vathi.”

3 Ekilantheene vamwaako wa Oliveira, atthareli awe yaamwaattamela enamukoha: “Munleele liini sinkelaaya weereya itthu iya ni teevi eri ethoonyero ya owa* wanyu ni emalihero ya itthu soonanara sa elapo ela?*

4 Yesu owaakhula enre: “Mwiikosoope weera ahikhale anaawoototheni, 5 woona weera mahiku ene yaawo, enoowa atthu antxipale mwa nsina naka yeeraka: ‘Miyo ka Kristu’, ni enimwaawoka atthu antxipale. 6 Munimwiiwa ikhotto ni mitthenka sa ekhotto mapuro oovirikana. Muhituthuwe, okhala weera itthu iya sintthuneya weera ikhumelele, mene khaiyene omala wa elapo.

7 “Muloko onoowana ni muloko mukina ni elapo ni elapo ekina; nave tho enoothowa yootxa ni enookhumelela otetereya* wa elapo mapuro oovirikana. 8 Sootheene iya mapatxerero a soohooxa.

9 Atthu enimookumiherani maxupo ni owiivani, Nave ­munimwiittiwa ni maloko ootheene mwaha wa nsina naka. 10 Nave-tho, atthu antxipale enoohiya omuroromela Muluku ni enrowa waavarihaka akhwaaya ni enkela wiittanaka mukina ni mukhwaawe. 11 Enookhumelela maprofeta oowootha antxipale, enkela waawokaka atthu antxipale; 12 nto, mwaha woowaatxeerereya ohiiweleliwa malamulo, nsivelo na atthu antxipale nnoovukuwa. 13 Mene ole oneera avilele mpaka okhwipi, onoovuluxiwa. 14 Ni mitthen­ka sooreera sa Omwene, sinaalaleiwe elapo yootheene weera atthu evahiwe onamoona* yeereya eyo, elapo ela enoomala.

15 Vaavo munkelaanyu woonaka seereyaka itthu soonanara seiyo sinnanariha itthu, yeeyo aahimmaawe profeta Daniyeli, ereene nipuro nootteela, (ole onsoma ontthuneya okhalano miruku weera iiwexexe muulumo ala), 16 vano ale enkela okhala oYudeya, etthawele omwaako. 17 Ole aneera akhale vasulu va empa, ahikhuruwele vathi weera akuxe itthu siri mpaani mwawe, 18 ole aneera akhale omatta, ahitthikele owan­nyawe weera akuxe maleya awe. 19 Ootakhaliwa athiyana oorupala ni ale eneera ewaamwiheke anamwane aya mahiku ene yaale! 20 Mwilipihereke ovekela weera etempu munkelaanyu otthawa ehikhale eyiita naari nihiku na esaabadu; 21 nto, enookhumelela maxupo matokweene ehin­tale weereya ovinyera ephattuwelo ya elapo mpaka vano, naari khenkela otthikela weereya veeli. 22 Mene mahiku awo yahaavukulinwe, khaavo eera avuluxiwe, menento mwaha wa oothanliwa mahiku awo enoovukuliwa.

23 “Menento, wakhala weera mutthu onooweerelani: ‘Kristu ori va! naari: ‘Iwe!’ muhimwaakhulele. 24 Mwaha wooweera, enookhumelela makristu ni maprofeta oowootha, ni awo eneereke opaka ithoonyero ni miiriira weera yaawoke atthu, wawereya, ni oothanliwa ene. 25 Mureye maaru, miyo kohooleelani itthu iya sihinaaye weereya. 26 Vano, atthu yaweerelani: ‘Owo ori onikareni!’, muhirowe; naari: ‘Owo ori mpaani!’ Muhaakhulele. 27 Hiihaale ntoko overunya onkhumaaya ninkhuma nsuwa onaara mpaka onkela nsuwa, hiiho tho, onaakhale owa* wa Mwaana a Mutthu. 28 Vari murutthu, tanrowaayavo othukumana axaaka.*

29 Moowaakuveya noomala ovira mahiku a maxupo matokweene, nsuwa nnootxipha, mweeri onoohiya waara, ithenyeeri inoomora wiirimu ni itthu siri wiirimu inoottikinyiwa. 30 Vano, enookhumelela wiirimu ethoonyero ya Mwaana a Mutthu, nave atthu amahimo ootheene enimwiikhupanyera ni enoomoona Mwaana a Mutthu awaaka mmahutteni wiirimu ni owera ni ovuwa otokweene. 31 Ni oruma otokotoko wa nipen­ka, owo onooruma malaika awe weera yaathukumanye oothanliwa awe wa iparte ixexe* okhuma okhwipi wa wiirimu mpaka okhwipi okina.

32 “Muxuttere nniphwanaphwaniho na mwiri wa ifiiku: vaavo itamphi inyowani sinpatxeraaya ophuwa makukhu, nyuwo munnasuwela weera elimwe yohaattamela. 33 Emoha-moharu, moona vale itthu sootheene iya seereyaka, musuwele weera Mwaana a Mutthu, ohaattamela vamulako. 34 Kinnooleelani ekhaikhai weera atthu a mahiku ala khenrowa omala itthu iya sihinaaye weereya. 35 Erimu ni elapo enoolakaseya,* menento masu aka enoovirelela okhala wa mahiku ootheene.

36 Woohima sa nihiku nno ni ewoora ene itthu iyo sinkelaaya weereya khaavo oosuweenle, nnakhala malaika a wiirimu nnakhala Mwaana a Muluku mene osuwenle paahi Tiithi. 37 Hiihaale ntoko yaaraaya mahiku a Nowa, hiiho tho onaakhale owa* wa Mwaana a Mutthu, 38 mwaha wooweera mahiku ale sihinaaye mirupi atthu yannatxa, yan­nawura ni alopwana yannathela ni athiyana yannathelihiwa, mpaka nihiku Nowa aavolonwaiye munikulani. 39 Awo khiyaapwantthe etthu mpaka ophiya epula ya mirupi yaakhumpe atthu ootheene. Hiiho tho onaakhale owa wa Mwaana a Mutthu. 40 Asilopwana eeli enaakhale omatta, mmoha onookuxiwa ni mukina onoohiiwa. 41 Asithiyana eeli eneexile vanxiloni, ni mukina onookuxiwa ni mukina onoohiiwa. 42 Tivawon­to, mukhale oowehaweha mwaha wooweera khamusuwenle nihiku Apwiya anyu eneeraaya ewe.

43 Mene tho mwiiwexexe ela, mwaneene vaate aasuwenle ewoora heeni ya ohiyu namwiiya oneeraawe awe, mwaneene vaate khaakela okona ni anweherera ni khaakela oomuhiya namwiiya avolowaka mpaani mwawe weera iiye. 44 Tivanto, mukhalesa oolikaneene mwaha wooweera Mwaana a Mutthu onwa ewoora nyuwo muhisuwenlaanyu.

45 Taani ori kaporo oororomeleya ni a miruku, yoowo othan­linwe ni apwiya awe weera aawehaweheke atthu awe ni waavaha yootxa etempu yoophwanelela? 46 Oohakalala kaporo owo oneera aphwanyiwe ni pwiya awe apakaka eyo. 47 Kinnooleelani ekhaikhai weera: Pwiya awe onoomuthanla kaporo owo weera akosoopeke mihakhu sawe sootheene.

48 “Mene wakhala weera kaporo owo oonanara murima onnuupuwela vamurimani vawe: ‘Apwiya ennapisa,’ 49 ni anapatxera waamana anamuteko asikhwaawe, otxa ni owura vamoha ni anamuhapaliwa, 50 pwiya, a kaporo owo, onkela owa nihiku ni ewoora kaporo owo ahaawehereraawe. 51 Ni pwiya owo onoomuttharuxa kaporo awe owo van­txipale ni onoomurihela nipuro na atthu oowootha ni weiwo onkelaawewo win­la ni okhuuriha maino awe.