Silempwale ni Matheyo
28 Nivirakaru nihiku na esaabadu, nihiku noopatxera na esemana okelaka nooxa, Maria Madalena ni Maria mukina, yaarowa oxekura nihiye.
2 Ottikinyeya wa etthaya waaheereya, woona weera nlaika na Yehova naakhuruwa, niphiyaka va nihiyeni naapirikixa nluku nikilaathela vasulu. 3 Makhalelo awe yaari ntoko etari ni soowara sawe saari soowaaraxa. 4 Atthu ale yaawehaweha nihiye na Yesu, yaahoova vantxipale mpaka okhwa maririmela* mwaha wa nlaika nne naakhurunwe.
5 Nto, nlaika naaweerela asithiyana ale: “Muhoove, miyo koosuwela weera nyuwo mummwaasa Yesu yoowo iivinwe vamwirini. 6 Owo khaavo va, oovinyererihiwa ntoko hiihaale aahimmaawe areene mukumi. Nkawani, moone nipuro murutthu awe waahiiwalaayavo. 7 Avinyaka, murowe moowaakuveya mwaaleele atthareli awe weera: ‘Owo oovinyererihiwa mwa alipa ookhwa ni weera oohoola okenle oGalileya. Ti weiwo munkelaanyuwo omoona.’ Ti yeeyo kaawenlaaka wooleelani.”
8 Asithiyana ale, yaakhuma omahiye moowaakuveya ni woova ni otteeliwa murima vantxipale, yaatthimaka erowaka waaleela atthareli awe. 9 Yesu aarowa okumana naawo ni aaweerela: “Salaama!” Awosa, yaamwaattamela enanvara manaani ni yaamukokhorela. 10 Yesu aaweerela: “Muhoove! Murowe, mwaaleele etthu ela asinnaka weera erowe oGalileya ni ti weiwo enkelaayawo okoona.”
11 Asithiyana ale eriki weetta nlelo, atthu akina yaawehaweha* nihiye na Yesu, yaarowa osidade waaleela asitokweene aanamakeya itthu sootheene seereñye. 12 Asitokweene aanamakeya ni asitokweene aayuda ethukumanakaru weera esuwele etthu yaakelaaya opaka, yaahaavaha anakhotto ale musurukhu wa eparatha 13 ni yaaweerela: “Muhimeke weera: ‘Atthareli awe yaarimoowa ohiyu nikonaka enamwiiya.’ 14 Ni wakhala weera kovernatore onimwiiwa etthu ela, hiyo nnoomuleela mpaka omuroromeliha. Vanonto, nyuwosa khamuntthuneya woova.” 15 Vano, anakhotto ale, yaakuxa musurukhu ole wa eparatha enarowa opaka ele yaarummwalaaya. Nto, yoowootha ela ennasuweliwa ni ayuda mpaka mahiku ahu ala.
16 Atthareli ale 11, yaarowa oGalileya mwaako yoowo Yesu aalenlaawe. 17 Emoonakaru, yaakokhora ohoolo wawe, mene akina yannahovela waari weera ti yoowo. 18 Yesu aawaattamela ni aaweerela: “Miyo, koovahiwa owera wootheene wiirimu ni elapo ela ya vathi. 19 Vanonto, murowe, mwaakhalihe atthu a elapo yootheene atthareli aka, mwaapatisaka ni nsina na Atiithi, Na mwaana, ni namunepa wootteela, 20 mwaaxuttihaka otthara itthu sootheene kooxuttinhaakani. Ni musuwele weera miyo kiri ni nyuwo mahiku ootheene mpaka emalihero ya itthu soonanara sa elapo ela.”*