Elizabeti aarupala

Saakwanela iyaakha 400 ixiri sa oYerusalemu sipakinweene. Namakeya Zakariya ni amwaarawe Elizabeti yaakhala waattamela iwe. Awo yaathelana mwa iyaakha sintxipale, ni khiyaatonko okhalano mwaana. Nihiku nimoha, Zakariya aavolowa mutemplu mootteela weera amuhisere Yehova rupani. Nto, nlaika Gabriyeli naakhumelela. Zakariya aahoova vantxipale, mene Gabriyeli aamweerela: ‘Ohoove Zakariya. Yehova ookiruma owa nno weera kooleele mitthenka sooreera. Amwaaraa Elizabeti enookhalano mwaana, ni owo onoorowa wiitthaniwa Yohani. Yehova oomuthanlela Yohani muteko woothanleya.’ Mene Zakariya ni Elizabeti yaahuuluvala vantxipale weera ekhaleno anamwane. Nto, Zakariya khaaroromenle etthu nlaika naamulenlaaya. Avinyaka, nlaika Gabriyeli naaheera: ‘Muluku tokirumme weera kooleele eyo. Mene okhala weera weyo khokiroromenle miyo, weyo khonrowa wuulumaka mpaka mwaana oyariwa.’

Zakariya aapisa mutemplu mootteela. Emaara owo aakhummaawe, atthu yaari vaate yaatthuna osuwela etthu yaamukhumelenle. Mene Zakariya khaawera wuuluma, owo aawera wuuluma paahi ni matata. Nto, atthu yaahoonelela weera Zakariya aahaakhela mitthenka sa Muluku.

Noovira etempu, ntoko hiihaale nlaika nuulummaaya, Elizabeti aarupala ni aamuyara mwaana mwaamulopwana. Asinthamwene awe ni amusi awe yaahakalala vantxipale ni yaahiwa omoona mwaana. Elizabeti aahima weera nsina na mwaana ole naarowa okhala Yohani. Mene awo yaaheera: ‘Khakhanle mutthu veemusini vanyu oniitthaniwa Yohani. Munvahe nsina na Zakariya mwaana owo. Nno nsina na apapawe.’ Avinyaka, Zakariya aakuxa ethaapwa ekhaanene ni aalepavo: ‘Nsina nawe onkela okhala Yohani.’ Mwa etempu ene yeele Zakariya aapatxera wuuluma! Atthu ootheene yaakhala oYudeya yaasuwela etthu yeereñye, ni awo yaapatxera wuupuwela ha: ‘Mwaana ola onkela okhala taani?’

Nto, Yehova aamweeriha Zakariya osareya munepa wootteela. Zakariya aaheera: ‘Avuwihiwe Yehova Muluku! Owo aamulaihera Abrahamu weera ammurumiha Mesiya weera anivuluxe. Yohani onrowa okhala profeta, ni muteko awe onrowa okhala waareherera atthu wa owa wa Mesiya.’

Etthu ekina-tho yoothanleya yeereñye ni muthiyana mukina a emusi ya Elizabeti, yoowo iitthaniwa Maria. Etthu heeni?