Atthu antxipale annakhala akristu

Yesu aahaaruma atthareli awe olaleera mitthenka sooreera, elapo yootheene ni awo yaahiiwelela. Eyaakha ya 47 Kristu awiiyeene, asinna a wAntiyokiya yaamurumiha Paulo ni Barnaba weetta mukwaha woorowa olaleera. Mukwaha owo, Paulo ni Barnaba yaalaleera mapuro mantxipale a wAsia Menor, ntoko oDerbe, oListra, ni wIkonio.

Paulo ni Barnaba, yannuuluma mitthenka sooreera wa atthu ootheene. Awo yannaalaleera ale yaari oopuha ni oohaawa, wa amiravo ni atthu oowuuluvala. Ni atthu antxipale yannamuroromela Yesu. Nihiku nimoha Pedru ni Barnaba yaamulaleera Sergio Paulo, kovernatore oKipro. Namaxitta mmoha aaheerera omukhoottihera. Nto Paulo aamweerela mulopwana ole: ‘Weyo wa mwiittani a Yehova!’ Mwa etempu ene yeele, namaxitta ole aapatxera ohoona. Emaara kovernatore onnaawe eyo, aatikhiniheya ni aalakela okhala mukristu.

Paulo ni Barnaba yaalaleera mapuro ootheene. Awo yannaxuttiha empa ni empa, mmerkaatu, mphironi, ni musinakooka. Emaara yaavinraaya esidade ya oListra, Paulo ni Barnaba yaamulamiha mulopwana mmoha oorakala. Atthu yonne miiriira iye yaapankaaya yuupuwela weera awo yaari amiluku ni yaapatxera waakokhorela. Mene Paulo ni Barnaba yaaheera: ‘Muhipakeke eyo. Hiyo atthu ntoko nyuwo, mmukokhoreleke Muluku paahi!’ Avinyaka, aYuda akina ni atthu oListra yaapatxera owuuluma moohireerela Paulo ni Barnaba. Mwa yeeyo, yaapatxera onvonya maluku Paulo ni yampurulela vaate va esidade. Awo yuupuwela weera Paulo aahookhwa, mene owo haakwiiye. Moowaakuveya asinna yaamukuxera osidade ni yaamukhavihera. Noovira etempu, Paulo aatthikela wAntiyokiya.

Eyaakha ya 49 Kristu awiiyeene, Paulo aatthikela-tho weetta mukwaha woolaleera. Woopatxerani aahaaxekura-tho veeli asinna a wAsia Menor. Avinyaka, aaheetta mapuro oorakamela mpaka wEuropa. Owo aarowa wAtena, wEfeso, wAfilipi, wAtesalonika ni isidade ikina. Sila, Luka, ni mmiravo iitthaniwa Timotheyo yaaheetta mukwaha vamoha ni Paulo. Awo yaapaka muloko ni yaakhavihera wunnuwa. Paulo aakhala eyaakha emoha wAkorinto ni aahaalipiha asinna. Owo aalaleera, aaxuttiha, ni aalepela ikaarta miloko sintxipale. Nave-tho Paulo annavara muteko woopaka mikottha. Noovira etempu, Paulo aathikela wAntiyokiya.

Eyaakha ya 52 Kristu awiiyeene, Paulo aapatxera weetta mukwaha wanaararu woolaleera. Owo aapatxenre wAsia Menor, ni aavirelela mpaka ophiya oFilipi. Avinyaka, aakhuruwela wAkorinto. Paulo aakhala iyaakha sintxipale wEfeso alaleeraka mitthenka sooreera, aalamihaka atthu, ni akhaviheraka muloko. Owo-tho annarowa oxikola opaka nyaha, atthu antxipale yiiwale nyaha iye yaakhala makristu. Alalenreene mapuro mantxipale, Paulo aarowa oYerusalemu.