Ekaarta ya Mukuttula Woolamulela

Asinna ni asirokora oosiveleya:

Nsivelo nraahuno ni Muluku ni atthu, ninnaneeriha ‘orowa . . . waapaka atthareli a maloko ootheene naapatisaka.’ (Math. 28:19, 20; Mar. 12:28-31) Nsivelo nraahuno ni atthu nookhalano owera. Nno nookhalano-tho owera woovara mirima sa atthu ‘athanleliwe ekumi yoohimala.’ — Mit. 13:48.

Khalayi, hiyo naawehexexa paahi moota woopatxeriha otthekula ni ovaha irevista sahu. Vano ontthuneya opaka marukunuxo a moota wootthekula ni atthu. Nintthuna woonihera nsivelo wa atthu vaavo nnuulumaahu itthu sinaavara murima. Eyo enoonihera weera nintthuneya okhala oowiisaakuviha ni wiilipihera weera niwere ohela mpuwa maxupo envirihaaya ni itthu enhaawelaaya. Ebroxura ela enkela onikhavihera moota heeni opaka eyo?

Ebroxura ela, yookhalano soosoma 12 seiyo sinoonihera mikhalelo seiyo nintthuneyaahu wunnuwihera weera noonihere nsivelo ni waapaka atthareli. Yoosoma eri poothe ennahela mpuwa soohimmwa sa mBiblyani, ehimaka mikhalelo sa Yesu naari mukristu mmoha a khalayi moota oonihenraawe mmutekoni woolaleera. Yootthuna ahu khaiyene otthikela veeli-veeli moota woopatxeriha otthekula, menento nintthuna owoonihera nsivelo atthu. Ekhaikhai weera mikhalelo iya ti sootthuneya mwa ikwaha sootheene ninlaleeraahu. Menento ninrowa woona mikhalelo iya sootepa otthuneya weera nipatxerihe otthekula, otthikela oxekura naari opakiha yoosoma ya Biblya.

Mwaapakaka yoosoma eri poothe, muupuweleleke moota nyuwo munkelaanyu woonihera mikhalelo iyo vaavo munuulumaanyu ni atthu a muttetthe munkhalaanyu. Mwaasaasereke wunnuwihera nsivelo nanyu wa Yehova ni atthu. Wa mikhalelo sootheene, nsivelo ninrowa onikhavihera okwanihera yootthuna ahu yoowaapaka atthareli.

Wa hiyo eparakha etokweene ovara vamoha ni nyuwo. (Sof. 3:9) Ninnanvekela Yehova weera avirelele oreeliha wiilipihera wanyu woonihera nsivelo wa atthu ni waapaka atthareli.