Muupuweleleke ipontu sootthuneya

Neereke nyuwo onnooxupani wuupuwelela ele munsomaanyu? Ikwaha sintxipale eyo enneereya ni ootheene hiyo. Etthu heeni muntthuneyaanyu opaka? Muupuweleleke ipontu sootthuneya.

Emaara munsomaanyu, mweemeleke weera muupuweleleke ipontu sootthuneya. Moone moota murummwa Paulo aakhavihenraawe ale yaasoma ekaarta awe opaka eyo vaavo aalempaawe eeraka: “Vano muru wa seiyo sihimmwe, t’ola.” (Aheb. 8:1) Ni masu ala, owo aahaakhavihera ale yaamwiiwelela wiiwexexa etthu aahimaawe ni wuupuwelela moota yeele eri epontu yaavarihanaaya ni muru uulumaawe.

Mwamaliha osoma, nyuwo pooti wiihiyera etempu, apaale iminuutu 10 weera mphimelele ipontu sootthuneya musommaanyu. Wakhala weera nyuwo khamunwera wuupuwelela, nwehe veeli miru naari musome masu oopatxera a nyaha munsomaanyu weera wookhweeleni wuupuwelela. Wakhala weera mooxuttera etthu enyowani, mweerere wiiwanyeiha ni masu anyu. Vaavo nyuwo munuupuwelelaanyu ipontu sootthuneya, ohiya paahi munrowa wuupuwelela ele musommaanyu, mene-tho munimoona nnene sene moota mwaha owo onvareleyaaya muteko mweekumini mwanyu.