YOOSOMA 10
Yookhala ettiini yeekhaikhai?
1. Neereke eri ettiini emoha paahi yeekhaikhai?
“Mwisuwelele ni maprofeti òwotha.” — MATHEYO 7:15.
Aani. Ettiini yeekhaikhai tiyeele Yesu axuttinhaawe. Owo alikanyinhe neephiro. Nave-tho, anaatxerera eeraka weera atthu yaampwanya ephirweene yeeyo, mene era atthareke woohihiyerera, ampwanya ekumi yoohimala. (Matheyo 7:14) Ale entthuna omuhakalaliha Muluku, entthuneya otthara masu eri mBiblyani. Nave-tho anamakokhorela ekhaikhai, ennathukumana ni ennaakhulela etthu emoharu. — Mmusome Yohani 4:23, 24; 14:6; Aefeso 4:4, 5.
2. Vano, neereke ittiini sootheene se ekristu sinnixuttiha ekhaikhai?
“Yawo ennihima weera ennimusivela Muluku, koma ni sopanka saya ennimukhotta.” — TITO 1:16.
Hooye. Yesu ahuuluma sa maprofeti owootha yaawo enxuttiha ithiru. Onooweereya okhala antoko empaka yootthuna ya Muluku, yiixotothaka omutthara Yesu. Mene onnatthuneya osuwela waari weera ekhaikhai kapena hooye. Moota heeni? Ontthuneya owehexexa waari weera ennapaka ele ahimmaawe Yesu. — Mmusome Matheyo 7:13-23.
3. Munasuwele hayi ettiini yeekhaikhai?
Moone itthu ithanu atthu ekhaikhai empakaaya:
Ennaroromela weera Biblya masu a Muluku. Atthu ekhaikhai, ennilipihera otthara miruku siri mBiblyani. Nto ittiini sintxipale, sintthara malamulo aatthu. (Matheyo 15:7-9) Mene ale entthara ettiini yeekhaikhai empaka ni enxuttiha ele Biblya onahimaawe. — Mmusome Yohani 17:17; 2 Timotheyo 3:16, 17.
Anitthaneliwa ni ennaaxuttiha atthu akina nsina na Yehova. Yesu annattittimiha nsina na Muluku ni annonihera weera nsina nno ti nootthuneya. Mene aaxuttiha voohima sa Yehova ni nivekelo na tiithi ori wirimu, “nsina ná nttelihiwe.” (Matheyo 6:9) Vano, neereke mwannante owoona naari waasuwela atthu enaxuttiha nsina na Yehova? — Mmusome Yohani 17:26; Aroma 10:13, 14.
Ennalaleya omwene wa Muluku. Yesu annalaleya omwene wa Muluku, ni itthu sooreera oneeraya opake omwene owo. Nave-tho omwene owo, toneera okhale murette wa maxupo ootheene atthu, ahéé tiyeyo yaamwerihe Yesu wuuluma sa omwene owo mpaka nihiku akhwiiyawe. (Luka 4:43; 8:1; 23:42, 43) Yesu ahaaruma ooxuttheraawe weera elaleyeke omwene wa Muluku. Neereke munnasuwela ettini enilaleya omwene wa Muluku? — Mmusome Matheyo 24:14.
Khenkhavihera itthu sa elapo ela ya Satana. Akristu a ekhaikhai khenkhavihera nnyaha sa ipolitica naari ikhotto. (Yohani 17:16; 18:36) Nave, awo khaneera itthu soonanara seiyo sineereya mahikwano elapo yoottheene. — Mmusome Yakobe 4:4.
Ennasivelana mukina ni mukwaawe. Ale ari ettiini yeekhaikhai annaxuttera mBiblyani waattittimiha atthu akina. Ittini sowottha sinnakhavihera ikhottho sa elapo ela. Mene ettiini yeekhaikhai khenkhavihera itthu iyo Muluku oniittawe. (Mikeya 4:1-3) Akristu eekhaikhai annaveleela musurukhu ni ehuhu aya weera yaakhavihere akwaaya. — Mmusome Yohani 13:34, 35; 1 Yohani 4:20.
4. Moowera woonelela ettiini yeekhaikhai?
Ettiini heeni enitthaneliwa nsina na Muluku ni entthara sooxuttiha sa mBiblyani? Ettiini heeni enlaleya omwene onrowa omaliha maxupo atthu ootheene? Nave ettiini heeni ehiinvolela ikhotto ni enasivelana mukina ni mukhaawe? Neereke nyuwo moosuwela? — Mmusome 1 Yohani 3:10-12.