Neereke Muluku onnaiwa mavekelo

1, 2. Mwaha wa heeni nneeraahu weera, nivekelo yoovaha etokweene ninvahiwaahu ni Yehova? Ni heeni ontthuneyaaya osuwela moonelo wa Biblya voohima sa nivekelo?

YEHOVA oopattuxa elapo ni itthu sootheene siri mwemmo. Vano nailikanxera ni elapo Yehova opankaawe, hiyo nootepa oyeva. Biblya onahima weera atthu ootheene anakhala elapo ya vathi tootepa oyeva, ni anlikana ni nttoyi na maahi. (Nsalmu 115:15; Yesaya 40:15) Naari vareene hiiho, Muluku onnatthuna wiiwa mavekelo ahu. Nsalmu 145:18, 19 nnahima weera: “Yahvéh ori vakhiviru ni yale othene anamwìtthana, anyi, ni yale othene anamwìtthana mororomelani. Muluku onnàkhulela sowinlela sa yale anamòva, onnìwa sowikhupanyera saya ni onnàvuluxa.” Aani, moone weera Yehova oowera sootheene, owo onnitthuna wiiwa mavekelo anyu ni ontthuna weera mukhale nthamwene awe. Nivekelo yoovaha etokweene ninvahiwaahu ni Yehova.

² Onnatthuneya osuwela moonelo wa Biblya voohima sa nivekelo. Mwaha wooweera, Yehova onrowa wiiwa mavekelo ahu wakhala weera ninnavekela ntoko Muluku ontthunaawe. Muhoolo mmo, ninrowa woona moota woovekela weera nimusiveliheke Muluku.

MWAHA WA HEENI NIVEKELO NRAAYA NOOTTHUNEYA?

3. Mwaha wa heeni ontthuneyaaya onvekela Yehova?

³ Yehova ontthuna weera munvekeleke. Moone moota onoowopaaweni va Afilipi 4:6, 7. (Mmusome). Mpattuxa a elapo yootheene ontthuna weera mmuleeleke sooxupa sanyu ni itthu murimaanyu onuupuwelaya.

4. Mwaha wa heeni ovekela onlipihaaya onthamwene anyu ni Yehova?

⁴ Mwanvekelaka Yehova emaara yootheene, munoolipiha othamwenaanyu nuuwo. (Yakobe 4:8) Heeni ontthuneyaaya ovekela emaara yootheene? Mwaha wooweera onthamwene wa atthu eeli, onlipa yaavirihaka ehuhu yiitxipale etthekulaka, eleelanaka miruku, maxupo ni itthu anuupuwelaaya. Onoolikana ni onthamwene nraahuno ni Yehova. Munivekeloni, hiyo ninnuuluma ni Yehova, nave ontthuneya omuleela itthu sootheene nnuupuwelaahu. Mwaamusomaka Biblya, nyuwo munoosuwela moota Yehova onuupuwelaawe, ni itthu onrowaawe opaka muhoolo.

NIPAKEKE EHEENI WEERA MULUKU IIWEKE MAVEKELO AHU?

5. Biblya oonihenre hayi weera Yehova khaniiwa mavekelo ootheene?

⁵ Nto neereke Muluku onniwa mavekelo atthu ootheene? Hooye, owo khaniiwa mavekelo ootheene. Emaara ya mprofeti Yesaya, Yohova ahaleela ana a israeli weera: “Yàtteru mavekelo anyu, nkinrowa wàkhulela. Matat’anyu àsareya ephome.” (Yesaya 1:15) Eyo enoonihera weera naapakaka itthu sinamunanara Muluku, mavekelo ahu khanrowa waakhuliwa.

6. (a) Mwaha wa heeni wiiwelela oraaya wootthuneya? (b) Nnoonihere hayi weera ninniiwelela?

⁶ Ti wootthuneya wiiwelela, weera Muluku aakhuleke mavekelo ahu. (Marko 11:24) Nto murummwa Paulo, ohimme weera: “Mene ohikhanle wiwelela, konawereya omusiveliha Muluku, wona wi ole onamwàttamela Muluku, onnaphwanela wiwelela wi Muluku òkhala ni onnàlivela yale anamwàsa”. (Aheberi 11:6) Maxi khomphiyera ohima weera kookhalano wiiwelela, mwaha wooweera onnatthuneya woonihera wiiwelela wahu. Nimwiiwelelaka Yehova nihiku ti nihiku. — Mmusome Yakobe 2:26.

7. (a) Mwaha wa heeni otthuneyaaya okhala owiiyeviha ni a nttittimiho naapakaka mavekelo? (b) Ninrowa opakaka moota heeni mavekelo ni murima wootheene?

⁷ Ontthuneya wiyeviha ni okhalano nttittimiho naapakaka nivekelo. Mwaha wa heeni? Nkupuwelani weera nyuwo munrowa olokolola ni mwene a elapo anyu, neereke khamwaarowa olokolela ni nttittimiho? Nave-tho, ontthuneya weera nuulumaka ni Yehova, nikhaleke owiyeviha ni a nttittimiho. Mwaha wooweera owo Muluku Oowera soothesene. (Ephattuwelo 17:1; Nsalmu 138:6) Nivekelo nahu nintthuneya weera nikhaleke na ekhaikhai ni nivekeke ni murima wootheene. Nihimaka itthu sootheene sinnivalaveliha ni nnuupuwelaahu, nto, nihitthikeleke masu mamoharu, eyo tiiyo niheereke odekorari mavekelo. — Matheyo 6:7, 8.

8. Neereke noomala opaka nivekelo, onnatthuneya wiikhuraana?

⁸ Opwaha mwa yeeyo, nanvekela Yehova, ontthuneya okhalaka naari opaka itthu moovarihana ni nivekelo nahu. Mwa ntakihero, nanvekela yootxa Yehova, ontthuneya wiilipihera wasasa eyotxa eyo. Khoontthuneya wiikhuraana nuupuwelaka weera Yehova onoopaka itthu sootheene. (Matheyo 6:11; 2 Atesalonika 3:10) Nave-tho emaara nninvekelaahu Yehova nikhavihero, weera nihiye opaka itthu soonanara ontthuneya wiiyeviha. Mene ohiya ovekela paahi, ontthuneya wiilipihera osempa opaka etthu yeera enikuxe murima weera nipake etthu yoonanara. (Akolosi 3:5) Vano ninrowa woona makoho atthu anipakaaya voohima sa mavekelo.

MAKOHO MAKINA ANIPAKIWA MWAHA WA MAVEKELO

9. (a) Taani ontthuneyaahu onvekelaka? (b) Heeni ontthuneyaahu ovekelaka mu nsina na Yesu?

⁹ Taani ontthuneyaahu onvekela? Tiithihu a wiirimu Yehova. Ni tiyeeyo Yesu aaxunttihaawe oohusera awe. (Matheyo 6:9) Nto ontthuneya onvekela Yehova paahi. Nave ontthuneya weera napakaka mavekelo, nipakeke mwa nsina na Yesu. Mwaha wooweera Yesu ahimme weera: “Miyo kiri ephiro ni ekhaikhai ni ekumi. Khavo onarwa wa Atithi, ahikhanle ekhavihero aka.” (Yohani 14:6) Weera Yehova aakhulele mavekelo ahu, ontthuneya ohela mwiitti ele Yesu opankaawe. Owo ahorwa elapo ya vathi weera anoopole mwa soottheka ni okhwa. (Yohani 3:16; Aroma 5:12) Ontthuneya tho osuwela weera, Yehova oomuthanla Yesu weera akhale Mphuki ni mulipa a makeya, weera hiyo niphwanye ekhavihero ya oleveleliwa wa soottheka sahu, ohoolo wa Muluku. Vano naavekeleka mwa nsina na Yesu, ninnoonihera weera ninniiwexexa sootheene iya sithalihiwe wopatxerani. — Yohani 5:22; Aheberi 6:20.

10. Onnatthuneya okokhora, weemela naari okilaathi naavekelaka? Muthalihe.

¹⁰ Onnatthuneya okokhora, weemela naari okilaathi navekelaka? Hooye. Biblya onahima weera hiyo pooti wuuluma ni Yehova nihikokhonre, mene ontthuneya okhalano nttittimiho paahi. Owo khanihima weera nikokhoreke, nikilaathiki naari neemeleke naavekelaka. (1 Sowereya 17:16; Nehemiya 8:6; Daniyeli 6:11 [6:10 NM]; Marko 11:25) Mwaha wooweera Yehova yootthunaawe khahiyono okokhora wahu, mene etthu nraahuno va murimani. Eyo entthuna onleela weera pooti ovekela mowiiwanyeya kapena vathi-vathi, mapuro ni ehuhu eri poothe. Aani, nroromeleke weera, naari nihiwiwaka ni atthu akina, mene Yehova onnaniiwa. — Nehemiya 2:1-6.

11. Itthu heeni ontthuneyaahu weera nivekeleke?

¹¹ Nivekeke eheeni? Nivekeke itthu soothesene sinvarihana ni yootthuna ya Yehova. Biblya oneera: “Vano ororomeleya nikhanlahuno mwa Muluku ti wú: nanvekelá yowo yakhalaru mowiwanana ni otthuna wawe, onnanìwa.” (1 Yohani 5:14) Neereke onnatthuneya ovekela itthu sawerutthuni? Aani. Nivekelo nintthuneya okhala ntoko otthekula mutthu ni nthamwene awe osiveleyaxa. Hiyo pooti omuleela Yehova itthu sootheene nnuupuwelaahu ni sinnixupa. (Nsalmu 62:9 [62:8 NM]) Nivekeleke munepa wootteela eyo tiiyo ikuru sa Muluku weera onikhavihere opaka itthu sooreera. (Luka 11:13) Nave onnatthuneya oveka miruku weera niwere ovilela maxupo anniphwanya ni weera niwere opaka soothanla sooreera. (Yakobe 1:5) Mene, ontthuneya oveka weera nileveleliwe soottheka sahu. (Aefeso 1:3, 7) Onnatthuneya tho waavekelela atthu akina, waahela mpuwa amusi, muloko ni asinthamwenaahu. — Miteko 12:5; Akolosi 4:12.

12. Eheeni entthuneya ohela nipuro noopatxera munivekeloni mwahu?

¹² Eheeni entthuneya ohela nipuro noopatxera munivekeloni mwahu? Etthu yootepa otthuneya ori ovekela yootthuna ya Yehova. Nave mwaha wooweera Yehova onnanipakela itthu sootepa oreera, ontthuneya tho omuxukurela. (1 Sowereya 29:10-13) Yesu aaxuttiha mu nivekeloni na Atithihu, etthu yootepa otthuneya. (Mmusome Matheyo 6:9-13.) Vootepaxa, ontthuneya weera nivekeleke otteelihiwa wa nsina na Muluku. Nivekeke tho weera Omwene wa Muluku orwe, ni otthuna wa Muluku opakeye vathi vaava. Itthu sene tiseiya Yesu aaxunttihaawe siri sootepa otthuneya. Nto naahelaka mpuwa mwa mavekelo ahu, nnimoonihera weera Yehova ni yootthunaawe siri itthu sootthuneya mweekumini mwahu.

13. Mavekelo ahu ekhaleke orakama?

¹³ Mavekelo ahu ekhaleke oorakama? Biblya khaanono malamulo, anihima weera mavekelo ahu annatthuneya okhala orakama naari ookhuveya. Mwaha wooweera mavekelo pooti okhala oorakama naari ookhuveya. Mwa ntakihero, emaara yootxa, khoontthuneya opaka nivekelo noorakama. Nto, emaara nnavekelaahu mwaha wa omuxukhurela, omuleela itthu sinnixupa Yehova, hiyo pooti opaka nivekelo noorakama. (1 Samuweli 1:12, 15) Mene khontthuneya opaka mavekelo oorakama weera nihimmweke naatthu akina. Ntoko atthu akina yaapakaya emaara Yesu araawe elapo ya vathi. (Luka 20:46, 47) Yehova khansiveliwa ni mavekelo ntoko yaawo, ootthuna ohimmwa ni atthu akina. Mene owo ontthuna weera mpakeke mavekelo ni murima woottheene.

14. (a) Nivekeleke imaara ikavi vanihikuni? (b) Nto Yehova onniwopa opaka eheeni?

¹⁴ Nivekeleke imaara ikavi vanihikuni? Yehova oninlipihera opaka mavekelo emaara yootheene. Biblya onahima weera “vekelani”, “wa mavekelo: mulipihereke” ni “nvekeleke vohihiyerereya”. (Matheyo 26:41; Aroma 12:12; 1 Atesalonika 5:17) Nto eyo enoonihera weera Yehova ori olikaneene weera aiweke mavekelo ahu. Mene hiyo onatthuneya omuxukurela yoowo mwaha wa nsivelo nawe, oreera wawe murima ni itthu sootheene onnivahaawe nihiku ti nihiku. Nave pooti ovekela miruku, ikuru ni nimaaliho. Naiwexexa otthuneya waya nivekelo, nneereke omulela Yehova itthu sootheene sinnikhumelela.

15. Mwaha wa heeni nneeraahu “amem”, okhwipi wa nivekelo?

¹⁵ Mwaha wa heeni nneeraahu “amem”, okhwipi wa nivekelo? Masu oweera “amem”, antaphulela weera “yeereye hiiho” naari “mwekhaikhai”. Emaara ennerahu “amem”okhwipi mwa mavekelo ahu, nnoonihera weera ninnaakhulela ele evekeliwe naari nivenkaahu. (Nsalmu 41:14 [41:13 NM]) Biblya onoonihera weera emaara nnerahu “amem” ni murima wootheene napakiwa nivekelo, ninnaakhulela sootheene sihimmwale munivekeloni mmo. — 1 Sowereya 16:36; 1 Akorinto 14:16.

MULUKU ONAKHULA HAYI MAVEKELO AHU?

16. Mwaha wa heeni ontthuneyaahu ororomela weera Yehova onimwakhula mavekelo ahu?

¹⁶ Neereke Yehova onnaakhula mavekelo ahu? Aani. Biblya onahima weera “Nyuwo munnìwa mavekelo aya”. (Nsalmu 65:3 [65:2 NM]) Mene nroromeleke weera Yehova onnaiwa mavekelo nimpakaahu ni murima wootheene. Ni onnatthuna waakhula mavekelo atthu ootheene ananvekela. Nroromeleke weera Yehova onnaakhula mavekelo anipakiwa naatthu antxipale mwa makhalelo oovirikana.

17. Yehova onaavarela hayi malaika ni arumeyi awe, weera aakhule mavekelo ahu?

¹⁷ Yehova weera aakhule mavekelo ahu, owo onanvarela muteko malaika. Nave owo onnaavarela muteko arumeyi awe a elapo ela ya vathi. (Aheberi 1:13, 14) Mwa ntakihero, yatoko weereya ikwaha sintxipale, mutthu opaka nivekelo weera amwiiwexexe Biblya ni mahiku eri meeli, Anamoona a Yehova enamulaleera. Biblya tho, onahima weera malaika annakhavihera muteko wa olaleya mitthenka sooreera elapo yootheene ya vathi. (Mmusome Apokalise 14:6.) Emaara ekina, hiyo pooti onvekela Yehova nikhavihero, moohipisa munna naari murokora anarwa onikhavihera. — Miruku 12:25; Yakobe 2:16.

18. (a) Yehova onivarela hayi muteko munepa wootteela weera aakhule mavekelo ahu? (b) Ni onanvarihela hayi muteko Biblya?

¹⁸ Yehova tho, onnaakhula mavekelo ahu anivahaka Munepa wootteela, eyo tiiyo ikuru sawe. Emaara anniphwanyaaya maxupo, hiyo pooti onvekela weera anikhavihere. Nto owo nave, onooweera onivaha munepa awe wootteela weera nikhaleno ikuru weera nivilele maxupo awo. (2 Akorinto 4:7) Yehova onnanvarela muteko Biblya weera aakhule mavekelo ahu. Emaara nimmusomaahu Biblya, nnoowera ophwanya yoolepa eneera ekhale yoonikhavihera opaka soothanla sooreera. Nave yoolepa eyo, pooti osommwa ni mutokweene a mmulokoni emaara sinipakiwaaya mithukumano. Nave pooti okhala ekomentariyu enipakiwa ni munna naari murokora omuthukumanoni yeeyo enrowa okhala waakhuliwa wa mavekelo ahu. — Agalata 6:1.

19. Mwaha wa heeni, nneeraahu nuupuweleke weera Yehova khanaakhula mavekelo ahu?

¹⁹ Ehuhu ekina, hiyo pooti wuupuwelaka weera Yehova khanaakhula mavekelo ahu. Mwaha wooweera yoovira ehuhu yintxipale nipankeene nivekelo, ni khiyaavo enakhumelela kapena kheekhumelenle ntoko naatthunahu. Etthu yootthuneya wuupuwelela tiila, Yehova oosuwela etthu nintthunaahu. Owo oosuwela ehuhu yooreerela okhanlaawe oowakhula mavekelo ahu. Onnatthuneya tho, olipihera ovekela weera noonihereke weera ninvekela ni murima wootheene ni ninnamuroromela Muluku. (Luka 11:5-10) Emaara ekina, waakhula wa Yehova, pooti ovirikana ni moota nuupuwelaahu. Mwa ntakihero, wakhala weera aaniphwanya maxupo, nnanvekela Yehova weera anikhavihere, pooti wuupuwelaka weera khanrowa omaliha maxupo awo. Opwaha mwa yeeyo, owo onoowera onivaha ikuru weera niwere ovilela maxupo awo. — Mmusome Afilipi 4:13.

20. Eheeni enrowa weereya nanvekelaka Yehova ni murima wootheene?

²⁰ Nivekelo yoovaha etokotoko. Niroromeleke weera, Yehova onimwiiwa mavekelo ahu. (Nsalmu 145:18) Emaara nnanvekelaahu Yehova ni murima wootheene, onthamwene ahu nuuwo onoovirelela olipa.