Yehova aahuuluma ni Samuweli

Namakeya mutokweene Eli, aahaayara anamwane eeli yaawo yiitthaniwa Hofini ni Pineya. Awosa khayaamwiiwelela Yehova ni yaari atthu oonanara murima vantxipale. Emaara ana a Israeli yaarowaya otapernaakulu, oroiha soovaha saya wa Yehova, Hofini ni Pineya yaannakuxa iparte saya sootthuneya. Eli aasuwela eyo ni khaapanke etthu. Ankhanto Yehova, neereke owo-tho khaarowa opaka etthu?

Samuweli eera areene mwaana, ni anamwaane wannaasivela waatakiha atthu atokotoko. Menento Samuweli, khaamutakinhe Hofini ni Pineya. Menento Yehova aahoona eyo ni aahakalala nuuwo. Ekwaha emoha Samuweli akonaka, aahiiwa nsu niitthanaka nsina nawe. Owo aavinya ni aatthimakela aaraawewo Eli. Mene Eli aamweerela khaamwiitthanne mutthu ni aaheera weera atthikele aakonaawewo. Eyo yaaheereya ikwaha iraru. Ekwaha ya naararu Eli saamweetta isimu weera aari Yehova eerera wuuluma ni Samuweli. Eli aamuleela weera, Samuweli iiwa veeli nsu nne, waakhula eere ha: ‘Yehova, miyo murumeyi aa kinniiwa, pooti muulumeke.’

Emaara aatthikenlaawe vakaamani, nsu nne naahiitthana veeli nsina nawe. Owo aahaakhula ntoko Eli aamulenlaawe. Nto Yehova aamuleela: ‘Omuleele Eli ni emusi awe weera khenrowa osepa nttaruxo. Mwaha wooweera Eli oosuwela weera, Hofini ni Pineya toonanara murima, mene khapankevo etthu eri poothe. Nihiku naattharelana Samuweli aavinya oxeexelo, ni aarowa ohula milako sa otapernaakulu. Ntoko owo aapakaawe mahiku ootheene. Owo annoova omuleela Eli itthu sootheene aleelinwaawe ni Yehova. Nto Eli anvekela weera amuleele. Avinyaka Samuweli aamuleela itthu sootheene.

Samuweli anninnuwa, ni Yehova annavirelela okhala nthamwene awe. Atthu ootheene a wIsraeli yaasuwela weera Yehova aamuthanla Samuweli weera akhale mprofeti ni mphuki.