Davidi ni Goliyathi

Evinreene etempu, Yehova aamuleela Samuweli weera arowe empa ya mulopwana mmoha iitthaniwa Yese. Mmoha anamwane awe aarowa okhala mwene oottharelana a wIsraeli. Samuweli aphiyakaru iwe aamoona mwanawe oopatxera ni aahuupuwelela weera aarowa okhala mwene oottharelana. Mene Yehova aamuleenle ha: ‘Khaiyene ti yoowo kimuthanliyaaka. Miyo nkinweha ekhove ya mutthu. Wa miyo etthu yootepa otthuneya ori murima wa mutthu.’

Nto, Yese aahaawiiha namwane awe akina 6. Mene Yehova khaavo amuthanliyaawe mwa mmoha a yaawo. Samuweli aamukoha waari weera Yese aakhalano anamwane akina. Yese aahaakhula: ‘Miyo kookhalano mmoha yoowo oniitthaniwa Davidi, yoowo ori oomalihera. Owo onkosoopa iputtiputthi.’ Nto, Yese aalamula oroweliwa Davidi. Emaara aaphiñyaawe Davidi, Yehova aamuleela Samuweli weera aari owo amuthanliyaawe! Samuweli aahikuxa makhura ni aahela mmuru mwa Davidi ooniheraka weera owo aarowa okhala mwene oottharelana a wIsraeli.

Evinreene etempu, Afilisti yaarowa owana ni ana a Israeli. Aakhalawo nakhotto mmoha ootepa orakama iitthaniwa Goliyathi. Mahiku ootheene owo aannaatheya ana a Israeli eeraka: ‘Kinnahovela omphwanya mutthu anaawane ni miyo! Wakhala weera nyuwo momphwanya mutthu owo ni akiwina, hiyo ninrowa okhala akaporo anyu. Menento miyo kawina, nyuwo munrowa okhala akaporo ahu.’

Nihiku nimoha, Davidi aarowa waavaha yootxa asinnawe variyari va anakhotto. Owo aamwiiwa Goliyathi atannyaka ana a Israeli ni owo aaheera weera aamurowa owana nuuwo. Menento Sawuli aaheera weera eyo khiyaarowa owereya mwaha wooweera Davidi aari mmiravo. Davidi aahaakhula: ‘Muhixupeye. Yehova anookikhavihera.’

Sawuli aamwinnya Davidi ikaruma sa ekhotto weera aware. Mene Davidi aatthikiha, mwaha wooweera sannamulemela vantxipale. Menento Davidi, aahittotta maluku 5 ni aahela mpastani. Amukuxa fiska ni aatthimaka akelaka aari Goliyathi. Goliyathi aaheera: ‘Nkawa va mukhuveya, miyo kinoowiiva ni erutthu aa kinimwaavonyera asinama weera ekhuure.’

Menento Davidi khonve. Ni owo aahaakhula: ‘Weyo onwa owana ni miyo ororomelaka nivaka ni ekatana. Mene miyo kinrowa owana ni weyo kimuroromelaka Yehova. Weyo onuupuwela weera onwana ni hiyo? Weyo onwana ni Yehova. Atthu ootheene eri va anrowa woona weera Yehova ta ikuru opwaha ikaruma sootheene sa ikhotto. Owo onrowa onikhavihera woowinani!’ Davidi aahela nluku nimoha va fiskani ni aavonya ni ikuru sawe sootheene. Yehova aaheeriha weera nimmane Goliyathi vayuutxini vawe. Owo aamorela vathi ni aahookhwa. Afilisti yaakhuma iwe etthawaka. Mohoona moota Davidi aamuroromenlawe Yehova? Neereke nyuwo-tho munnamuroromela Yehova?