Yehova aamwaakiha Yosafati

Yosafati aari mwene oYuda. Owo aamaliha okokhorela wa Bayali moomweneni mwawe. Yosafati aatthuna weera atthu a elapo yootheene emwiiweleleke Yehova. Nto owo aahaathanla alopwana yaasuwenle nnene sene malamulo a Yehova weera yaaxuttiheke atthu.

Maloko yaakhala vakhiviru yannoova omutuphela Yuda, mwaha woosuwela weera Yehova annakosoopa muloko awe. Maloko awo, yannakuxa soovaha weera yanvahe Yosafati. Atthu oMowabi, atthu a wAmoni, ni atthu yaakhala omwaako wa oSeyiri yaarowa owana ni Yuda. Yosafati aasuwela weera annatthuna nikhavihero na Yehova. Nto, Yosafati aahaaruma alopwana, athiyana ni anamwane ootheene orowa oYerusalemu. Ohoolo wa atthu ootheene owo aavekela: ‘Yehova, hiyo khaninrowa owera owina nihikhaviheriwaka ni nyuwo. Txontte munileele etthu nintthuneyaahu opaka.’

Nto Yehova aahakhula: ‘Muhoove, miyo kiri ni nyuwo. Khaavo onrowa otthuneya owana. Moone etthu kinroowaaka opaka.’ Etthu heeni Yehova aarowaawe opaka weera avuluxe muloko awe?

Nihiku naattharelana, Yosafati aahathanla alopwana yaawera wiipa. Atthu awo oowiipa yaatthuneya orowa ohoolo wa anakhotto, emwiipelaka Yehova moohakalala. Awo yaakhuma yeettaka okhuma oYerusalemu mpaka nipuro nenno ekhotto yaarowaaya owaniwakawo. Weiwo oniitthaniwa Tekowa.

Yiipaka hiihaale, Yehova aapaka etthu yootikhiniha. Owo aaweeriha atthu oMowabi ni a wAmoni owana yaaworu. Nto ootheene awo yaahookhwa. Mene Yehova aakosoopa muloko awe, ntoko hiihaale owo aalaihenraawe. Maloko yaakhala vakhiviru ni oYuda, yaasuwela etthu Yehova aapankaawe, ni yaahoona weera nlelo owo onnaakiha muloko awe. Mohoona keera? Yehova onnaasaasera moota woovuluxa muloko awe. Nave weera apake eyo, owo khantthuna nikhavihero naatthu akina!