Nlaika na Yehova naamukosoopa Ezekiya

Mwene a wAsiriya aakuxa omwene wa mahimo 10 a wIsraeli nave-tho aatthuna okuxa omwene wa mahimo meeli oYuda. Senakeribi, mwene a wAsiriya, aatuphela isidade sa oYuda emoha-emoha. Mene esidade owo aatthunaawexa yaari ya oYerusalemu. Nto owo khaasuwela etthu emoha. Yehova anamukosoopa Yerusalemu.

Ezekiya mwene oYuda, anvaha musurukhu muntxipale Senakeribi weera ahimutuphele Yerusalemu. Senakeribi aakuxa musurukhu, nnaamweera vareene hiiho owo aahaaruma anakhotto awe otuphela esidade ele. Nto atthu ale yaahoova vantxipale. Anakhotto a wAsiriya yanvirelela eriki mwaattamelawo. Nto, Ezekiya aahaalela atthu ale weera: ‘Muhoove. Asiriya ta ikuru, mene Yehova onoorowa onikhavihera okhala a ikuru waapwaha awosa.’

Senakeribi aamuruma namitthenka awe orowa oYerusalemu. Aphiyakaru iwe, namitthenka ole aaheemela vaate va esidade ni aapatxera otheya ekhove ya atthu oYerusalemu. Owo aakhuwela: ‘Yehova khanrowa wookhaviherani nyuwo. Ezekiya onimoowokani. Khaavo Muluku onrowa owera wookosoopani mmatatani mwahu!’

Ezekiya aamukoha Yehova etthu eeraawe apake. Yehova aamwaakhula: ‘Muhoove etthu namitthenka owo onhimaawe. Senakeribi khanrowa okuxa muttetthe wa oYerusalemu.’ Noovira etempu vakhaani, Ezekiya aahaakhela ikaarta sa Senakeribi. Ikaarta iyo saahima ha: ‘Muhiye. Yehova khanrowa woovuluxani nyuwo.’ Avinyaka, Ezekiya aavekela: ‘Txontte Yehova, munivuluxe. Vano atthu ootheene enoosuwela weera nyuwo pwiya ti Muluku eekhaikhai.’ Yehova aamwaakhula: ‘Mwene a wAsiriya khanrowa ovolowa oYerusalemu. Miyo kinookosoopa esidade eyo.’ Nto, anakhotto a wAsiriya yaahoowa ni yaamurukurera Yerusalemu.

Senakeribi annaroromela weera anwera ovolowa esidade ele. Menento moosuwela etthu yeereñye? Ohiyu omoha, Yehova aaruma nlaika nimoha orowa omukotthani, ni nlaika nne naawiiva anakhotto 185.000! Mwene Senakeribi aahaayeleela anakhotto awe ootheene ooweraxa. Ni etthu yootheene eeraawe apake waari wuuramihela muru awe vathi ni otthikela owaani. Yehova aapaka etthu aalaihenraawe ni aamukosoopa Ezekiya ni Yerusalemu. Nankha nyuwomwari oYerusalemu, neereke mwaammuroromela Yehova?