Daniyeli mulittini mwa akharamu

Mwene mukina oBabilonia iitthaniwa Dario. Dario aasuwela weera Daniyeli aari mutthu oothanleya. Mwaha wa yeeyo, aamweeriha Daniyeli okhala mutokweene aasilopwana ootthuneya oBabilonia. Asilopwana ale yannamukhalela nrima Daniyeli ni khayaamutthuna. Awo yaasuwela weera Daniyeli annanvekela Yehova ikwaha 3 vanihikuni. Nto, awo yaarowa wuuluma ni mwene: ‘Mwene Dario, mukumihere nlamulo nooweera atthu ootheene yookokhorelekeni nyuwo paahi pwiya. Ole aneera anvekeleke muluku mukina ariheliweke mulittini mwa akharamu.’ Dario saamusivela miruku iye ni aakumihera nlamulo.

Daniyeli asuwelakaru eyo, aarowa owannyawe. Owo aakokhora ohoolo wa exanela aahunlaawe ni aahinvekela Yehova. Nto, amwiittani a Daniyeli yaavolowa mpani mwawe emaara yeeyo owo aavekelaawe. Avinyaka, awo yaatthimaka enarowa omuleela mwene Dario: ‘Daniyeli khawiiwelenle! Owo onnanvekela Muluku awe ikwaha 3 vanihikuni.’ Ni Dario annamusivela vantxipale Daniyeli ni khaatthuna weera owo akhwe. Dario aamaliha nihiku nimoha uupuwelelaka moota wonvuluxa Daniyeli. Mene khayaakhanlevo etempu. Owo aakumiha nlamulo ni khiwaawereya otxentxa. Nto, owo wannatthuneya waaruma asilopwana awe, weera envonyere Daniyeli mulittini mwa akharamu oowoopiha.

Ohiyu ene yoole, Dario aaxupeya ni Daniyeli mpaka ohiphwanya ikhove. Oxeexelo, owo aatthimaka akelaka olittini ni aakhuwela: ‘Daniyeli, Muluku aa ohoovuluxa?’

Etthu yaamutikhininhe Dario, Daniyeli aahaakhula: ‘Miyo kiri nnene! Nlaika na Yehova naahiwa niwala iyano sa akharamu!’ Dario aahakalala vantxipale ni aahaaruma asilopwana awe omukumiha Daniyeli mulittini. Daniyeli khaatinwe! Nto, mwene aalamula weera asilopwana ale yaamukhalela nrima Daniyeli evonyeriwe mulittini. Asilopwana ale yaahaakheleliwa ni akharamu ehimorenleru mulittini.

Sivirakaru itthu sootheene iye, Dario aahaaleela atthu weera:‘Atthu ootheene entthuneya omukokhorelaka Muluku a Daniyeli.Owo onvuluxa Daniyeli mulittini mwa akharamu.’

Munoonela hayi omutakiha Daniyeli nionvekela Yehova mahiku ootheene?