YOOSOMA 49
Moota heeni muneeraanyu mukhaleno etthoko yoohakalaliha?—Eparte 1
Ale ethelanne vaanano ennatthuneya weera evireleleke ohakalala ntoko nihuku yaathelannaaya, weera ntheli naya nikhale mpaka khalayi. Ni eyo pooti weereya. Makristu athelanne khalayi ni aniilipihera ovarela muteko miruku sa mBiblyani, anhoonelela weera onnawereya ohakalala ntoko nihuku yaathelannaaya.
1. Miruku heeni Yehova onaavahaawe alopwana oothela?
Yehova oomuthanla mulopwana oothela weera akhale muru wa emusi. (Mmusome Aefeso 5:23.) Owo onweherera weera soothanla sa mulopwana saakhavihereke amusi ootheene. Moone ele Biblya onaaleelaawe alopwana: “Nyuwo, alopwana, mwàsivele asar’inyu.” (Aefeso 5:25) Eyo entaphulela heeni? Mulopwana ansivelo onnaathokorora ni waattittimiha amwariye, areene owannyawe naari areene ni atthu akina. Ni onnapaka ele onweraawe weera othokorore soohaawela saweerutthuni saamwariye. (1 Timotheyo 5:8) Ni opwaha mwa sootheene owo onnaakosoopa soohaawela saya soomunepani. (Matheyo 4:4) Mwa ntakihero, owo pooti ovekela ni omusoma Biblya vamoha ni amwaariye. Mulopwana onaathokorora amwariye mwa nsivelo onnalipiha onthamwene awe ni Yehova.—Mmusome 1 Pedru 3:7.
2. Miruku heeni Biblya onaavahaawe athiyana ootheliwa?
Masu a Muluku annaaleela athiyana ooheliwa yeeraka ‘nyuwo athiyana nwoveke asiiyanyu ni nwonihereke nttittimiho.’ (Aefeso 5:33) Vano athiyana awo ankela opaka hayi eyo? Awo pooti opaka eyo, ehelaka mwiitti mikhalelo sa asiiyaya ni mwaha woowiilipihera waathokorora anaaya. Nave awo-tho pooti woonihera weera annaattittimiha asiiyaya ekhaviheraka soothanla ampakaaya. Ni wuuluma mooreerela murima, nnaamweera awo ehikhanle makristu. Athiyana tho khanwuuluma moohireerela naari mweemwaano-mwaano asiiyaya yaaleelaka atthu akina.
3. Anamathelana ankela olipiha hayi ntheli naya?
Biblya onnaaleela atthu ethenle eeraka: ‘Oweli aya ari erutthu emoha.’ (Matheyo 19:5) Eyo entaphulela weera, ootheene antthuneya opaka ele anweraaya, weera nsivelo anooniheranaaya nihivukuwe. Emaara ekina evirihaka ehuhu ootheene etthekulaka moororomeleya, nave yooniheranaka nsivelo na moota enuupuwelaaya ni enoonelaaya itthu. Mutthu oopatxera omusivela akhaleke Yehova—ni mutthu anaaveli ootepa ontthuneya mweekumini—ekhaleke aiyawe naari amwaariye. Opwaha wa atthu ala, ahikhale mutthu mukina aneera akhale ootepa otthuneya. Ni anniithokorora weera ehuulume masu enkela woonihera weera enisiveliwa ni mutthu mukina ahikhanle iyaya naari mwaaraya.
WEERA MUXUTTERE SINTXIPALE
Moone moota miruku sa mBiblyani sineeraaya silipihe ntheli nanyu.
4. Mulopwana oothela ontthuneya—waasivela amwariye ni waathokorora
Biblya onhima weera “Siso onnaphwanela alopwana wàsivela asar’aya, ntoko erutthu aya.” (Aefeso 5:28, 29) Eyo entaphulela heeni? Moone EVIIDIYU. Avinyaka mutthekule ni epontu enttharelana.
Mwa mukhalelo moota heeni mulopwana oothela onooniheraawe weera onnaasivela amwariye ni waathokorora?
Mmusome Akolosi 3:12. Avinyaka mutthekule ni epontu enttharelana.
Moota heeni alopwana oothela eneeraaya yoonihereke mikhalelo iya?
5. Muthiyana ootheliwa ontthuneya—waattittimiha ni waasivela aiyawe
Biblya onnawooperera athiyana ootheliwa waattittimiha asiiyaya, nnaamweera ehikhanle makristu. Mmusome 1 Pedru 3:1, 2. Avinyaka mutthekule ni epontu enttharelana:
Wakhala weera aiyanyu khammukokhorela Yehova, mweekhaikhai nyuwo munnatthuna yaamukokhorela. Miruku heeni munoonaanyu weera sanvareleya muteko: waalaleera awo ehuhu yootheene naari okhala muthiyana a nsivelo, ooreera murima ni a nttittimiho? Mwaha wa heeni?
Mulopwana ni muthiyana vamoha, pooti opaka soothanla soorera. Nto emaara ekina muthiyana pooti ohaakhulela yoothanla yaaiyawe. Nto ekhaikhai ti yooweera muthiyana pooti ohima muupuwelo awe, moomaala murima ni nttittimiho, uupuwelaka weera Yehova onvaha mulopwana muritti woowaapakela soothanla sooreera atthu a etthoko awe. Muthiyana ontthuneya opaka ele onweraawe weera aakhavihere yoothanla ya iyawe. Muthiyana apaka eyo, onoopaka empari awe weera emusi ekhale yoohakalala. Mmusome 1 Pedru 3:3-5. Avinyaka mutthekule ni epontu enttharelana.
Yehova onoonela hayi vaavo muthiyana omuttittimihaawe iyawe?
6. Munoowera owina maxupo a va nthelini
Khanikhanle ntheli noomalela. Mwa yeeyo, matheli antthuneya ovara muteko vamoha weera ewine maxupo aya. Moone EVIIDIYU. Avinyaka mutthekule ni ipontu sinttharelana.
Nviidiyuni, eheeni yoonihera weera ntheli khanuulumihana nnene?
Eheeni awo yaapankaaya weera elipihe ntheli naya?
Mmusome 1 Akorinto 10:24 ni Akolosi 3:13. Mwasoma soolepa sootheene iya, mutthekule ni epontu enttharelana:
Moota heeni miruku iya sineeraaya silipihe ntheli nanyu?
Biblya onnanleela weera nttittimihaneke mukina ni mukhwaawe. Woonihera nttittimiho onhela mpuwa waathokorora atthu akina ni waareerela murima ni nttittimiho. Mmusome Aroma 12:10. Avinyaka mutthekule ni epontu enttharelana:
Neereke mulopwana oothela naari muthiyana ootheliwa onkela wooniherana nttittimiho wakhala weera ompatxera mmoha? Mwaha wa heeni Munhimaanyu eyo?
ATTHU AKINA ANEERA: “Itthu sootxentxa munthelini mwaka. Hiyo noohiya wuulumihana.”
Moota heeni mweeraanyu mmuleele mutthu weera Biblya pooti omukhavihera?
NYAHA SOOTTHUNEYA
Mulopwana ni muthiyana anoowera okhala oohakalala wakhala weera atthu eeli annasivelana, ottittimihana ni ovarela muteko miruku sa mBiblyani
Wuuluula
Moota heeni mulopwana oothela aneeraawe apake empari awe weera emusi awe ekhale yoohakalala?
Moota heeni muthiyana ootheliwa oneeraawe apake empari awe weera akhaleno ntheli noohakalaliha?
Wakhala weera nyuwo mootheliwa naari moothela, miruku heeni sa mBiblyani seera silipihe ntheli nanyu?
WEERA MUSUWELE ITTHU SINTXIPALE
Moone miruku sinvareleya muteko sinkela wookhaviherani okhalano ekumi yoohakalaliha.
Moone eviidiyu enhima moota woovarela muteko miruku sa Muluku voohima sa ntheli.
Moone etthu entaphulelaaya ottittimiha ohoolela wa mulopwana.
Moone moota miruku sa mBiblyani voohima sa ntheli sineeraaya saakhavihere anamathelana anviriha maxupo.