Asinna amiravo— mmutakiheke Marko ni Timotheyo

1-2. Maxupo heeni yaarowa omootxeeliha Marko ni Timotheyo waavarela atthu akina?

ASINNA amiravo, neereke munnatthuna waatxeerera onvarela wanyu Yehova, ni waakhavihera asinna ni asirokora a mmulokoni? Moohihovela, nyuwo munnatthuna. Ti woohakalaliha owoona asinna antxipale amiravo ekhalaka oolikaneene waakhavihera asinna ni asirokora! (Nsal. 110:3) Menento nyuwo pooti okumanano maxupo. Neereke nyuwo munnoova waatxeerera muteko anyu woolaleera mwaha wooweera khamunsuwela nipuro munrowaanyu olaleeraka? Neereke nyuwo mootoko okhootta eparakha yoowaatxeerera muteko anyu woolaleera muupuwelaka weera khamwaarowa owera okwanihera? Wakhala weera ti hiiho, nyuwo khaiyene toopatxera wuupuwela hiiho.

² Marko ni Timotheyo yaaviriha maxupo mamoharu. Mene awo khiyaakhulenle weera woova waya mapuro yaarowaaya olaleeraka naari ohikhalano waya sookumanano sintxipale mweekumini, owootxeelihe waavarela atthu akina. Pooti weeraka emaara Barnaba ni murummwa Paulo yanwompaaya Marko weera yeetteke vamoha mukwaha aya wa omisiyonaariyu, apaale Marko eera akhalaka ni ameyawe empa aya yooreera. (Mit. 12:12, 13, 25) Marko aakhuma owannyawe weera aatxeerere muteko anvarelaawe Muluku. Ekwaha yoopatxera, owo aathaamela wAntiyokiya. Ni muhoolo mwaya, aamuhoola Paulo ni Barnaba mapuro oorakamelana ni owannyawe. (Mit. 13:1-5) Etthu emoha-moharu-tho, onooneya weera, emaara Paulo anwompaawe Timotheyo weera yeetteke vamoha mmutekoni moolaleera, Timotheyo eera akhalaka ni asipapawe. Mwaha wookhala mmiravo ni ohikhalano sookumanano sintxipale mweekumini, owo aamwaakhulela weera woova omootxeelihe orowa vahoolo. (Mulikanxere ni 1 Akorinto 16:10, 11 ni 1 Timotheyo 4:12.) Menento owo aahaakhulela nwopelo wa Paulo, mwaha wa yeeyo, aahaakhela mareeliho mantxipale. — Mit. 16:3-5.

3. (a) Paulo aamoonela hayi Marko ni Timotheyo? (2 Timotheyo 4:6, 9, 11) (Nwehe efootu.) (b) Makoho heeni ninrowaahu othokorora mwa yoosoma ene yeela?

³ Moovira etempu, Marko ni Timotheyo yaakhalano sookumanano sa mweekumini sootepa otthuneya ni yaaxuttera waakhulela miritti itokweene nlelo ereene amiravo. Paulo annawoona amiravo ala eeli okhala ootepa otthuneya, mpaka emaara yeeyo owo aahalelaawe okhwa, aawiitthana weera ekhale ni yoowo. (Mmusome 2 Timotheyo 4:6, 9, 11.) Mikhalelo heeni saamweerinhe Marko ni Timotheyo okhala ootepa otthuneya vamaithoni va Paulo? Moota heeni amiravo enrowaaya omutakiha Marko ni Timotheyo? Ni moota heeni amiravo enrowaaya ottottela mureerelo miruku Paulo aavanhaawe amiravo ale ntoko anamwane awe?

MMUTAKIHE MARKO — MUKHALE OOLIKANEENE WAAVARELA ATTHU AKINA

4-5. Moota heeni Marko oonihenraawe weera aari oolikaneene waavarela atthu akina?

⁴ Moovarihana ni ereferensiya emoha, waavarela naari waaweha-weha atthu akina, ontaphulela wiivaherera ni yoolakela yoowaakhavihera atthu awo “mwa miruku ni woohihiyerereya.” Marko oovaha ntakihero nooreera woohima sa mwaha owo. Vaavo Paulo ahaakhulenlaawe omukuxa mpuwa mwa mukwaha awe wanaaveeli wa omisiyonaariyu, pooti weeraka Marko waamuriipa murima ni aanyoonyiwa. (Mit. 15:37, 38) Mene eyo khiyaamootxeelinhe Marko waavarela asinna ni asirokora.

⁵ Marko aahaakhulela yoothanleliwa ya ovara vamoha ni pirimu awe eeriwa Barnaba. Sivirakaru iyaakha 11, Marko aari mmoha aasinna yaamukhavihenre Paulo ekwaha yoopatxera aatthukinwaawe oRoma. (Film. 23, 24) Paulo aaxukurela vantxipale nikhavihero nne mpaka omuhima Marko okhala ‘nimaaliho ntokweene.’ — Akol. 4:10, 11.

6. Moota heeni Marko aattottenlaawe mureerelo okhala vamoha ni asinna oolipa moomunepani? (Nwehe enoota.)

⁶ Marko aattottela mureerelo wiiraana ni akristu oolipa moomunepani. Avirihakaru etempu areene oRoma ni murummwa Paulo, Marko aavinya arowaka oBabiloniya weera avareke vamoha ni murummwa Pedru. Wiiraana waya waatepa olipa mpaka Pedru ophiyera omwiitthana “Marko, mwan’aka.” (1 Ped. 5:13) Emaara yaavaraaya vamoha, pooti weeraka Pedru aamuleela Marko itthu sintxipale sootikiniha woohima sa ekumi ya Yesu ni muteko awe woolaleera, yoowo muhoolo mwaya, Marko aalempaawe mu evanjelyu awe.a

7. Moota heeni munna mmiravo oneeriwa Seung-Woo otthanraawe ntakihero na Marko? (Nwehe efootu.)

⁷ Marko aavirelela onvarela muteko Muluku ni okhala vakhiviru ni asinna oolipa moomunepani. Moota heeni nyuwo munrowaanyu omutakiha Marko? Waari weera nyuwo mooyeleela eparakha mmutekoni mwa Yehova, mwiipixereke murima muneene anyu ni mwaasaaseke mikhalelo mikina sa moota wonvarela Yehova ni muloko. Moone ntakihero na Seung-Woo yoowo vano ori mutokweene a mmulokoni. Emaara owo aaraawe mmiravo, anniilikanxera ni asinna akina yaarinono iyaakha vakhaaniini ompwaha owo. Akina a yaawo, yaahaakhela miritti owo ahinaaye. Seung-Woo oona weera oottuwaliwa, ni aahuuluma ni asinna oolipa moomunepani woohima wa mwaha owo. Mutokweene mmoha a mmulokoni, aamuleela weera apakeke ele onweraawe weera aakhavihere asinna ni asirokora nnaamweera soopaka sawe sooreera sihooniwaka ni atthu akina. Miruku iya Seung-Woo aavahinwaawe, saamweeriha wiivaherera waakhavihera atthu oowuuluvala ni ale yaahaawela nikhavihero na moota woophiya omuthukumanoni. Awehaka muttuli, owo ohimme ha: “Vano kinniiwexexa etthu entaphulelaaya waavarela atthu akina moomalela. Nave koophwanya ohakalala weiwo onkhumelela mwaha woowaapakela itthu atthu akina.”

MMUTAKIHE TIMOTHEYO — MWAAPWATTHEKE ATTHU AKINA MWA NSIVELO

8. Mwaha wa heeni Paulo aamuthanliyaawe Timotheyo weera yeetteke vamoha? (Afilipi 2:19-22)

⁸ Paulo annatthuneya okhalano asinthamwene oolipa murima vaavo aapakaawe ikwaha atthikelaka mittetthe seiyo aatthara-tthariwaawe. Woopatxerani, owo aamuthanla mukristu oolipa moomunepani iitthaniwa Sila weera amuhooleke. (Mit. 15:22, 40) Muhoolo mwaya, Paulo aamuthanla-tho Timotheyo weera eettekeno vamoha. Mwaha wa heeni Paulo aamuthanliyaawe Timotheyo? Nthowa nimoha, mwaha wooweera owo aakhalano mikhalelo sooreera. (Mit. 16:1, 2) Owo annaapwattha mwa nsivelo atthu akina. — Mmusome Afilipi 2:19-22.

9. Moota heeni Timotheyo oonihenraawe weera annaapwattha asinna ni asirokora?

⁹ Timotheyo apatxerakaru ovara muteko woolaleera vamoha ni Paulo, owo annaapwattha atthu akina wiipwaha muneene awe. Mwaha wa yeeyo, Paulo aamuhiya oBereya weera aalipiheke atthareli anyowani. (Mit. 17:13, 14) Moohihovela, etempu ele Timotheyo aattottela mureerelo ntakihero na Sila yoowo aakhala oBereya. Moottharelana, Paulo aamurumiha Timotheyo meekhaawe weera arowe oTesalonika weera aalipihe akristu yaakhala muttetthe ole. (1 Ates. 3:2, enoota) Mwa iyaakha 15 saattharelana, Timotheyo aaxuttera ‘winla ni yaale yinla,’ ooniheraka wiihela nipuro na atthu ale yaaviriha maxupo. (Arom. 12:15; 2 Tim. 1:4) Moota heeni amiravo akristu enrowaaya omutakiha Timotheyo?

10. Moota heeni munna mmoha oneeriwa Woo Jae oxuttenraawe waapwattha atthu akina?

¹⁰ Mutokweene mmoha a mmulokoni oneeriwa Woo Jae, ooxuttera vantxipale waapwattha atthu akina. Emaara aaraawe mmiravo, Woo Jae wannamuxupa otthekula ni asinna ni asirokora oowunnuwela. Mwa yeeyo, samala vale mithukumano, aamweera owuulumiha nookhuma. Mutokweene mmoha a mmulokoni aahinvaha miruku Woo Jae weera apatxeriheke wuuluma ni asinna aaleelaka mikhalelo saya seiyo simmusivela. Mutokweene ole-tho aamooperera weera emaara onuulumaawe ni asinna, uupuweleleke itthu sinrowa waasivela. Woo Jae aavarihela muteko miruku iya vaavo uulumaawe ni atthu akina. Olelo va, Woo Jae mutokweene a mmulokoni, ni owo ohimme ha: “Vano onnakikhweela otthekula ni atthu a iyaakha soovirikana, kinnahakalala vaavo kinsuwelaaka itthu atthu akina envirihaaya. Eyo ennakikhavihera weera kiwere waakhavihera asinna awo.”

11. Moota heeni asinna amiravo enrowaaya waatxeerera mukhalelo woowaapwattha atthu akina mmulokoni mwaya? (Nwehe efootu.)

¹¹ Asinna amiravo, nyuwo-tho pooti oxuttera moota munrowaanyu owoonihera asinna ni asirokora weera munnaapwattha. Vaavo munkhalaanyu omithukumanoni, munnatthuneya waapwattha atthu ootheene muhipwatthaka mannuwelo aya naari mahuweliwo aya. Mwaakoheke asinna moota eraaya, ni nwiiweleleke vaavo enuulumaaya. Noovira etempu, nyuwo pooti woonelela moota munrowaanyu waakhavihera. Apaale nyuwo pooti woonelela weera nookhala ntheli nimoha noowunnuwela ninhaawela okhaviheriwa ni moota wonvarihela muteko aplikativu JW Library^®. Naari nyuwo pooti woonelela weera awo khempanke palanu ookhuma muteko woolaleera ni mutthu mukina. Neereke nyuwo pooti waakhavihera ni moota wonvarela muteko telefooni naari ompaka palanu weera mukhume naawo muteko woolaleera? Mwaapatxerihaka vale waakhavihera atthu akina, nyuwo munoovaha ntakihero nooreera wa atthu ootheene.

MUTTOTTELE MUREERELO MIRUKU SA PAULO

12. Moota heeni amiravo enrowaaya ottottela mureerelo miruku Paulo anvanhaawe Timotheyo?

¹² Paulo anvaha miruku soovareleya muteko Timotheyo weera amukhavihere mmutekoni mwawe moolaleera. (1 Tim. 1:18; 2 Tim. 4:5) Nyuwo-tho asinna amiravo, pooti ottottela mureerelo ni miruku sene seiya sa Paulo. Moota heeni? Musomeke ikaarta piili Paulo aamulepenlaawe Timotheyo ntoko mulepelinwe nyuwo, ni moone moota munrowaanyu ovarihela muteko miruku iyo mweekumini mwanyu. Nrowe noone matakihero vakhaani.

13. Eheeni enhela mpuwa omoova Yehova?

¹³ ‘Mwiitxentxerihe omoova Muluku ni moonihereke eyo.’ (1 Tim. 4:7b) Omoova Muluku ti heeni? Mutthu ommoova Yehova onnakhalano yoolakela yoopaka itthu simmuhakalaliha owo. Okhala weera hiyo khaniñyariwa ni mukhalelo owo, hiyo nintthuneya wunnuwihera. Moota heeni? Masu a ekereku ooweera ‘wiitxentxeriha mwaneene ahu,’ ikwaha sintxipale, ennavariheliwa muteko weera ehimmwe atthu ale entxentxerihiwa vantxipale weera yapake mpikisano. Atthu awo ennatthuneya wiilipihera vantxipale wunnuwihera mikhalelo seiyo sinrowa waakhavihera owina. Hiyo-tho nintthuneya okhalakano mikhalelo sooreera seiyo sinrowa onikhavihera wunnuwihera onthamwene ahu ni Yehova.

14. Vaavo nimmusomaahu Biblya, yoolakela ahu ekhaleke eheeni? Nvahe ntakihero.

¹⁴ Vaavo muniikhovelelihaanyu omusoma Biblya mahiku ootheene, muupuweleke weera yoolakela anyu ori ovirelela omwaattamela Yehova. Mwa ntakihero, etthu heeni nyuwo munxutteraanyu ni yooweereya ya mmiravo mmoha a muhakhu yoowo aakumanne ni Yesu? (Mar. 10:17-22) Mmiravo ole annaroromela weera Yesu aari Mesiya, mene khaakhanleno nroromelo weera amutthare. Nnaamweera vareene hiiho, Yesu “annamusivela.” Neereke moota Yesu uulummaawe ni mmiravo ole, onnoovarani murima? Moohihovela, Yesu aatthuna weera mmiravo ole apake yoothanla mwa miruku. Yesu-tho annuupuwelela nsivelo na Yehova wa mmiravo ole. (Yoh. 14:9) Vaavo munuupuwelelaanyu yooweereya ela ni makhalelo anyu, mwiikoheke ha, ‘Etthu heeni kintthuneyaaka opaka weera kivirelele omwaattamela Yehova ni waakhavihera atthu akina?’

15. Mwaha wa heeni amiravo oraaya wooreera woonihera ntakihero nooreera wa atthu akina? Nvahe ntakihero. (1 Timotheyo 4:12, 13)

¹⁵ “Okhale ethonyero wa atthu òwiwelela.” (Mmusome 1 Timotheyo 4:12, 13.) Paulo aamooperera Timotheyo weera unnuwihereke ohiya paahi osuwelaru osoma ni oxuttiha, mene-tho unnuwihereke mikhalelo ntoko, nsivelo, nroromelo ni nttittimiho. Mwaha wa heeni? Ntakihero nooreera, ti nootepa otthuneya opwaha masu nnuulumaahu. Nkuupuwelani weera nyuwo moothanliwa weera mwapake mwaha onuuluma woohima sa waatxeerera wiilipihera wahu mmutekoni moolaleera. Nyuwo mwaamurowa opaka mwaha owo ni murima anyu wootheene wakhala weera munniilipihera opaka ele munweraanyu mmutekoni moolaleera. Ntakihero nanyu naamurowa ottittimiheraka masu mwaarowaanyu wuulumaka. — 1 Tim. 3:13.

16. (a) Mwa mikhalelo heeni 5 amiravo makristu enrowaaya ovaha ntakihero nooreera? (b) Moota heeni mmiravo mukristu onrowaawe ovaha ntakihero nooreera emaara yeeyo ‘onuulumaawe’?

¹⁶ Ntoko enhimmwaaya va 1 Timotheyo 4:12, Paulo oohima mikhalelo 5 seiyo munna mmiravo ontthuneyaawe woonihera weera avahe ntakihero nooreera. Vaavo mumpakaanyu yoosoma ya omeekha, munoonela hayi wuupuwelela mikhalelo iya? Nkuupuwelani weera nyuwo muntthuna okhala ntakihero nooreera ni moota ‘munuulumaanyu.’ Nyuwo pooti wuupuwelela masu yaawo anrowa waalipiha atthu akina. Wakhala weera nyuwo munkhala ni makholo anyu, nyuwo pooti waaxukurela mwaha wa itthu sootheene enoopakelaayani. Samala mithukumano nyuwo pooti omuleela munna naari murokora aarinono eparte, etthu yoosivenleni wa eparte awe eyo. Nyuwo-tho pooti ovaha ikomentaariyu mmithukumanoni nvarihelaka masu anyu. Wiilipihera wanyu weera mukhale ntakihero nooreera emaara yeeyo munuulumaanyu, nnimoonihera weera munnarowa vahoolo moomunepani. — 1 Tim. 4:15.

17. Etthu heeni enrowa waakhavihera amiravo makristu okwanihera sooluluwanya saya soomunepani? (2 Timotheyo 2:22)

¹⁷ “Otthawe minlelo sa omiravo, mene otthare exariya.” (Mmusome 2 Timotheyo 2:22.) Paulo aamooperera Timotheyo weera aatthuneya owanano minlelo seiyo saarowa omootxeeliha okwanihera soolakela sawe soomunepani ni seiyo saarowa onanariha onthamwene awe ni Yehova. Mwa ntakihero, itempu ikavi munvirihaanyu munvonyaka boola, mutthekulaka ni telefooni naari nweettaka axooku a mutelefoonini? Munoonela hayi ovarihela muteko etempu eyo weera mpake itthu sa omunepani? Apaale nyuwo pooti wiivaherera weera mwakhavihere oreherera Empa ya Omwene naari okhavihera eprograma yeeyo epakinwe ya olaleera ni ekarinyu. Moohihovela, wakhala weera nyuwo munoopaka itthu iya, nyuwo munoorowa waapaka asinthamwene anyowani yaawo enrowa wookhaviherani okwanihera sooluluwanya sanyu sa omunepani.

WAAVARELA ATTHU AKINA ONNAPHWANYIHA MAREELIHO

18. Mwaha wa heeni ninhimaahu weera Marko ni Timotheyo yaakhalano ekumi yooreera ni yoohakalaliha?

¹⁸ Marko ni Timotheyo yaapaka itthu sintxipale weera ewere waavarela atthu akina ni okhalano ekumi yooreera ni yoohakalaliha. (Mit. 20:35) Weera aavarele asinna, Marko aapaka mikwaha arowaka mapuro oovirikana a mulaponi. Owo-tho oolepa evanjelyu ya ekumi ni muteko wa Yesu. Timotheyo aamukhavihera Paulo opaka miloko ni waalipiha asinna ni asirokora. Ekhaikhai ti yooweera, Yehova annahakalala ni ele Marko ni Timotheyo yaavaraaya.

19. Mwaha wa heeni asinna amiravo entthuneyaaya ovarihela muteko miruku Paulo anvanhaawe Timotheyo, ni eheeni enrowa okhumelela?

¹⁹ Nsivelo nenno Paulo aamoonihenraawe Timotheyo, ninnooneya mwa ikaarta sawe seiyo aamulepenlaawe nthamwene awe ole mmiravo. Ikaarta iyo, sinnoonihera moota Yehova onaasivelaawe amiravo. Owo ontthuna weera nyuwo amiravo mukhumeleke nnene. Mwa yeeyo, nvariheleke muteko miruku sa Paulo ni munnuwihereke yootthuna ya waavarela asinna ni asirokora. Wakhala weera nyuwo munoopaka eyo, munoorowa oreelihiwa viinaano va ni munoorowa “[ophwanya ] ekumi yekhaikhai” yeeyo ninwehereraahu. — 1 Tim. 6:18, 19.