MWAHA ONTHOKORORIWA 26
ETXIPO 123 Nimwiiweleleke Yehova ni Mutthenkeso Awe
Mwaakhuleleke moowiiyeviha weera sookhala itthu muhisuwenlaanyu
“Hiyo ninnòtxela omphwanya [Nanwera Sootheene].” — YOBI 37:23.
ELE NINKELA AHU OXUTTERA
Ninrowa woona moota ninrowaahu ovirihaka maxupo niwehexexaka itthu nsuwenlaahu, nave nimuroromelaka Yehova nnaamweera nihisuwenleene itthu sootheene sinrowa weereya.
1. Owera heeni Yehova onivanhaawe ni mwaha wa heeni?
YEHOVA oonipaka ni mukhalelo woowera wuupuwelela, oxuttera itthu inyowani ni ovarihela muteko itthu iyo ninxutteraahu. Mwaha wa heeni Yehova onipankaawe hiiho? Oonipaka hiiho weera niwereke ‘ophwanya osuwela wa Muluku’ ni weera ninvareleke nivarihelaka muteko osuwela wahu. — Mir. 2:1-5; Arom. 12:1.
2. (a) Ekhaikhai heeni nintthuneyaahu osuwela? (Yobi 37:23, 24) (Nwehe-tho efootu.) (b) Mwaha wa heeni eyo eraaya yooreera wa hiyo?
2 Ekhaikhai weera Yehova onipanke ni mukhalelo woowera oxuttera itthu, mene ekhaikhai ti yooweera sookhala itthu sintxipale nihisuwenlaahu. (Mmusome Yobi 37:23, 24.) Moone ntakihero na Yobi. Yehova ampakela makoho mantxipale yaawo yoonihera weera saakhala itthu sintxipale Yobi ahaasuwenlaawe. Ovaanela nno waamukhavihera Yobi waatxeerera wiiyeviha wawe ni oreherera moota uupuwelaawe. (Yobi 42:3-6) Moolikana niiyo, ti wooreera hiyo okhala atthu oowiiyeviha ni waakhulela weera khansuwenle itthu sootheene. Napaka eyo, nneereke ororomela weera ikwaha sootheene Yehova oneereke onleela itthu mweekhaikhai nintthuneyaahu osuwela weera nipake soothanla sooreera. — Mir. 2:6.
Osuwela weera khansuwenle itthu sootheene ti wooreera wa hiyo hiihaale ntoko waaraaya wooreera wa Yobi (Nwehe eparagrafu 2)
3. Eheeni ninrowaahu woona mwa yoosoma ene yeela?
3 Mwa yoosoma ene yeela, nnoorowa woona itthu ikina nihisuwenlaahu ni maxupo apaale ninrowaahu ovirihaka mwaha woohisuwela itthu iyo. Nave-tho nnoorowa woona mwaha wa heeni oraaya wooreera ohisuwela itthu sootheene. Osoma mwaha ola, onoorowa olipiha ororomela wahu weera Yehova yoowo ‘osuwenle itthu sootheene’, onnanleela itthu nintthuneyaahu osuwela. — Yobi 37:16.
KHANSUWENLE LIINI ELAPO ELA ENROWAAYA OMALA
4. Moovarihana ni Matheyo 24:36, etthu heeni nihisuwenlaahu?
4 Mmusome Matheyo 24:36. Hiyo khansuwenle liini elapo ela yoonanara enrowaaya omala. Naari Yesu emaara aaraawe elapo ela ya vathi owo khaasuwenle woohima sa “nihiku nno ni ewoora ene.”a Muhoolo mwaya, owo aahaaleela arummwa awe weera Yehova mwaneene etempu, “moweryani [mwawe]” oosuwela nihiku itthu sootheene sinrowaaya weereya. (Mit. 1:6, 7) Yehova oothanla nihiku enrowaaya omala elapo ela yoonanara, menento hiyo khansuwenle nihiku itthu iyo sinrowaaya weereya.
5. Okhala weera khansuwenle nihiku enrowaaya omala elapo ela, moota heeni eyo enrowaaya onivoleela?
5 Moovarihana ni ele Yesu ohimmaawe, hiyo khansuwenle etempu ekavi enrowa ovira niwehereraka omala wa elapo ela yoonanara. Mwaha wa yeeyo, hiyo pooti oyeleela opixa murima naari pooti okhulumuwa, otepaxa wene wakhala weera nipatxenre khalayi oweherera nihiku na Yehova. Nave-tho pooti okhala wooxupa vaavo amusi ahu naari atthu akina ennitheyaaya mwaha wooweera nlelo elapo ela khemmala. (2 Ped. 3:3, 4) Apaale hiyo pooti wuupuwelaka weera waamurowa okhala wookhweya okhala oopixa murima ni ovilela itthu soonanara atthu akina enuulumaaya waakhanle weera noosuwela nihiku elapo ela enrowaaya omala.
6. Mwaha wa heeni oraaya wooreera ohisuwela nihiku enrowaaya omala elapo ela?
6 Vekhaikhai, mwaha woohinleela liini elapo ela enrowaaya omala, Yehova onnanivaha eparakha yoowoonihera weera hiyo nnanvarela owo mwaha wooweera ninnamusivela ni ninnamuroromela. Nroromelo nahu khinaanoono elimite. Mwa yeeyo, khannanvarela Yehova nuupuwelaka nihiku nawe. Ohiya owehexexa liini “nihiku na Muluku” ninrowaaya ophiya, etthu yooreera opaka, ori wuupuwelela itthu sooreera sinrowa okhumelela nihiku nno naphiya. Napaka eyo, nnoorowa ovirelela omwaattamela Yehova ni waatxeerera omuroromela wahu ni opaka etthu eri poothe ninweraahu weera nimusivelihe. — 2 Ped. 3:11, 12.
7. Itthu heeni nsuwenlaahu?
7 Hiyo nintthuneya owehexexaka itthu nsuwenlaahu, weera mahiku oomalihera epatxenre eyaakha ya 1914. Yehova oonivaha Biblya mwemmo siraayamo iprofesiya, ohiya paahi sinoonihera eyaakha epatxenraaya mahiku oomalihera, mene-tho sinoonihera moota elapo yaarowaaya okhala ovinyera eyaakha ya 1914. Mwa yeeyo, ninnaroromela weera “[ninnaattamela] nihiku ntokotoko na Yahvéh.” (Sof. 1:14) Nave hiyo noosuwela muteko heeni Yehova ontthunaawe weera nivareke, ori waalaleera “mitthenka sooreera sa Omwene” atthu ootheene. (Math. 24:14) Mitthenka iyo sinnalaleiwa ilapo soophiyeraka 240 ni muulumo oopwahaka 1.000. Weera hiyo nipake ele ninweraahu mmutekoni mmo wootepa otthuneya, hiyo khontthuneya osuwela woohima sa “nihiku nno ni ewoora ene.”
KHANSUWENLE MOOTA YEHOVA ONROWAAWE OPAKA ITTHU
8. Entthuna ohima eheeni masu ooweera “muteko wa Muluku”? (Koheleti 11:5)
8 Hiyo khaninsuwela “muteko wa Muluku” ikwaha sootheene. (Mmusome Koheleti 11:5.) Masu ala entthuna ohima itthu Yehova ompakaawe naari etthu Yehova onaakhulelaawe weereya weera akwanihere yootthuna awe. Hiyo khansuwenle mathowa emmweeriha Yehova waakhulela weereya etthu naari etthu onrowaawe opaka weera anikosoope. (Nsal. 37:5) Biblya onnalikanxera ohisuwela wahu moota Yehova ompakaawe itthu ni ohisuwela moota mwaana ompakeyaawe mmirimani mwa maaye. Naari masiyentista khensuwela nnene sene moota eyo eneereyaaya.
9. Etthu heeni enrowa okhumelela ni hiyo mwaha woohisuwela moota Yehova onrowaawe opaka itthu?
9 Mwaha woohisuwela moota Yehova onrowaawe opaka itthu weera anikosoope, hiyo pooti okhala ooxupeya. Pooti weeraka hiyo ninnoova opaka itthu weera naatxeerere muteko nnanvarelaahu Yehova. Mwa ntakihero, hiyo pooti woova okhweihera ekumi ahu weera nthaamele mapuro oothowa anamalaleera. Apaale hiyo pooti wuupuwelaka weera Yehova khonanreeliha mwaha wooweera khaniwenre okwanihera sooluluwanya sahu, khannoona sikhumelelaka itthu sooreera mmutekoni moolaleera naari ninnaviriha maxupo mmutekoni ninvaraahu mmarehereroni mwa Yehova.
10. Mikhalelo heeni sootthuneya ninrowaahu wunnuwihera mwaha woohisuwela moota Yehova onrowaawe opaka itthu?
10 Ohisuwela moota Yehova onrowaawe opaka itthu, onnanikhavihera wunnuwihera mikhalelo sooreera, ntoko wiiyeviha ni waakhulela weera sookhala itthu nihisuwenlaahu. Ninnawera woona weera Yehova ikwaha sootheene oosuwela itthu sooreera wa hiyo. (Yes. 55:8, 9) Nave-tho ninnaatxeerera omuroromela wahu Yehova, nave ninnaxuttera waasa nikhavihero nawe weera nikhumele nnene. Vaavo itthu sinkhumelaaya nnene mmutekoni moolaleera, naari muteko ninvaraahu mmarehereroni mwa Yehova, ninnanvaha ovuwa wootheene Yehova. (Nsal. 127:1; 1 Akor. 3:7) Ni vaavo itthu sihineereyaaya ntoko naawehereraahu, nintthuneya wuupuwelelaka weera nnaamweera vareene hiiho, Yehova onnawehexexa itthu sootheene. (Yes. 26:12) Hiyo ninnapaka eparte ahu ni ninnaroromela-tho weera Yehova onoorowa opaka eparte awe. Ninnaroromela weera owo onoorowa onihoolela nnaamweera ahipakaka eyo mwa miiriira ntoko aapakaaweno khalayi. — Mit. 16:6-10.
11. Itthu heeni sootthuneya nsuwenlaahu woohima sa Yehova?
11 Hiyo noosuwela weera ikwaha sootheene Yehova tansivelo, axariya ni amiruku. Etthu ekina nsuwenlaahu ti yooweera Yehova onnavaha mwiitti vantxipale itthu sootheene nnampakelaahu ni nnaapakelaahu asinna ni asirokora. Nave ninnaroromela weera ikwaha sootheene Yehova onnaareeliha ale eri oororomeleya wa yoowo. — Aheb. 11:6.
KHANSUWENLE ETTHU ENROWA WEEREYA OMAALO
12. Ninxuttera eheeni va Yakobe 4:13, 14?
12 Mmusome Yakobe 4:13, 14. Ekhaikhai ti yooweera, hiyo khansuwenle moota ninrowaaya okhala nihiku noomaalo. Elapo ela ninkhalaahu hiyo ninnaviriha “ehuhu ni erisa.” (Koh. 9:11) Mwa yeeyo, hiyo khaninwera osuwela wakhala weera apalanu ahu enookhumela nnene naari wakhala weera nnookhala akumi weera naakwanihere apalanu awo.
13. Moota heeni ohisuwela moota itthu sinrowaaya weereya mweekumini mwahu onrowaaya onivoleela?
13 Mwaha woohisuwela itthu iya, pooti okhala wooxupa. Mwaha wa heeni? Apaale hiyo pooti okhala ooxupeyaxa ni etthu enrowa weereya omaalo mpaka hiyo oyeleela ohakalala. Ekumi ahu pooti otxentxa mootutuxera, ni eyo pooti oneeriha woona ovoreya ni oxupeya. Ni vaavo itthu sihineereyaaya ntoko naawehereraahu, hiyo pooti okhulumuwa naari pooti oxupeya. — Mir. 13:12.
14. Ohakalala wahu onlipa ni eheeni? (Nwehe-tho efootu.)
14 Vaavo ninvirihaahu maxupo, ninnakhalano eparakha yoowoonihera weera nihipwatthaka etthu enrowa okhumelela ni hiyo, ninnanvarela Yehova mwaha wa nsivelo, khaiyene mwaha wooweera yookhala nnaasaahu. Biblya onnanoonihera weera hiyo khontthuneya oweherera weera Yehova onoorowa onikosoopa wa maxupo ootheene. Nave-tho onnanoonihera weera Yehova khannuulumela ni itthu sineereya mweekumini mwahu. Yehova oosuwela weera ohakalala wahu khonlipa ni osuwela itthu sootheene sinrowa weereya muhoolo. Mene ohakalala wahu onlipa ni ohooleliwa ni Yehova ni omwiiwelela. (Yer. 10:23) Vaavo nnaasaahu nikhavihero na Yehova weera nipake soothanla, khaninrowa oxupeyaka nuupuwelelaka etthu enrowa weereya. Onkhala ntoko ninhima ha: “Muluku atthuná, nnikhale n’okumi ni nnipanke ela nari ele.” — Yak. 4:15.
Emaara nnaasaasaahu miruku sa Yehova ni omwiiwelela owo, ninnakosoopeya (Nwehe eparagrafu 14-15)b
15. Etthu heeni nsuwenlaahu woohima sa muhoolo?
15 Ekhaikhai weera hiyo khansuwenle itthu sinrowa weereya muhoolo, mene noosuwela weera Yehova onlaihera ekumi yoohimala. Atthu akina enrowa waakhela ekumi ela wiirimu, mene atthu akina enrowa waakhela elapo yeela ya vathi. Nave-tho noosuwela weera Yehova khonootha, ni weera khiyaavo etthu enrowa omootxeeliha okwanihera itthu sootheene olaihenraawe. (Tito 1:2) Owo Muluku mmoha paahi “[onlaleya] sa muholo, anyi, okhuma ehuhu ya khalai itthu sihàkunve wereya.” Itthu sootheene Yehova aahimmaawe khalayi weera saamweereya, moohihovela sookwanela. Ni itthu sootheene onhimaawe weera sinoorowa weereya muhoolo, sinoorowa okwanela-tho. (Yes. 46:10) Nave hiyo ninnaroromela weera khiyaavo etthu enrowa omootxeeliha Yehova onsivela. (Arom. 8:35-39) Nihipwatthaka etthu enrowa weereya mweekumini mwahu, Yehova onoorowa onivaha miruku, nimaaliho ni ikuru ninhaawelaahu weera nivilele. Hiyo ninnaroromela weera Yehova onoorowa onikhavihera ni onreeliha. — Yer. 17:7, 8.
HIYO KHANINWERA WIIWEXEXA MOOMALELA MOOTA YEHOVA ONSUWENLAAWE
16. Ntoko ehimmwalaaya va Nsalmu 139:1-6, etthu heeni Yehova osuwenlaawe woohima sa hiyo nihinweraahu wiiwexexa moomalela?
16 Musome Nsalmu 139:1-6. Mpattuxa ahu oosuwela omutthu ahu wootheene ni mukhalelo ahu wa weerutthuni ni wa mmuupuweloni. Owo onnaniwehexexa nnene sene emaara yootheene. Ohiya paahi oniiwa emaara nnuulumaahu, owo onniiwexexa etthu heeni naatthunaahu ohima. Nave-tho Yehova onnoona itthu sootheene nimpakaahu ni oosuwela mathowa enneeriha opaka itthu. Mwene Davidi ohoonihera weera Yehova onnaniwehexexa emaara yootheene weera anikhavihere wa etthu eri poothe. Nyuwo muniisoonela hayi osuwela weera Yehova Nanwera sootheene ni Mpattuxa a erimu ni elapo onnanwehexexa mutthu ti mutthu a hiyo? Tthiri ti wootikiniha! Eyo enoolikana ni ele Davidi ohimmaawe eeraka: “Osuwela nno ti wothamaleya, ti wowunnuwaxa okipwaha miyo: khweli miyo nkinawerya wiwa’mo.” — Nsal. 139:6, enoota.
17. Mwaha wa heeni ikwaha ikina onnixupaaya waakhulela weera Yehova onsuwela nnene sene?
17 Mwaha wa mahuweliwo ahu, sookhovelela sahu naari mwaha wa itthu naaroromelaahu khalayi nihaakunveene oxuttera ekhaikhai, pooti oneeriha woona okhala wooxupa omoona Yehova ntoko Tiithi ahu a nsivelo onnipwattha. Naari hiyo pooti wuupuwelaka weera soottheka sahu ti sootepa onanara mpaka Yehova ohitthuna okhala nthamwene ahu ni weera owo ori ottayi ni hiyo. Mpaka mwene Davidi ikwaha ikina anniisoonela hiiho. (Nsal. 38:19, 22 [38:18, 21, Tradução do Novo Mundo]) Naari mutthu oniilipihera okhalano ekumi emmuhakalaliha Yehova, pooti wiikoha eeraka, ‘Wakhala weera tthiri Muluku ookisuwela, mwaha wa heeni owo ontthunaawe weera kihiye ekumi yeeyo wa miyo enkhala ntoko ti yooreera?’
18. Mwaha wa heeni oraaya wooreera waakhulela weera Yehova onsuwela nnene wiipwaha asineene ahu? (Nwehe-tho efootu.)
18 Hiyo ontthuneya waakhulelaka weera Yehova onsuwela nnene wiipwaha asineene ahu, ni weera owo onoona itthu sooreera wa hiyo seiyo nihinweraahu woona. Nnaamweera owo oonaka soottheka sahu, Yehova oosuwela omutthu nniilipiheraahu okhalano ni onnansivela vantxipale. (Arom. 7:15) Vaavo nniiwexexaahu weera Yehova onoona itthu sooreera wa hiyo, eyo ennanivaha ikuru ninhaawelaahu weera nivirelele onvarela moororomeleya ni moohakalala.
Vaavo ninvirihaahu maxupo nahaawehereraahu, Yehova onnanikhavihera ovilela alipihaka nroromelo nahu wa soolaihera sawe sa muhoolo (Nwehe eparagrafu 18-19)c
19. Itthu heeni nsuwenlaahu woohima sa Yehova?
19 Hiyo noosuwela weera Yehova nsivelo. Ni hiyo ninnaakhulela eyo. (1 Yoh. 4:8) Noosuwela weera itthu sootheene owo onnivekelaawe, mwaha wooweera onnansivela ni ikwaha sootheene ontthuna mureerelo ahu. Nave-tho noosuwela weera Yehova ontthuna weera hiyo naphwanye ekumi yoohimala. Weera eyo yeereye, owo oonivaha yoowoopola. Yoowoopola eyo ennanroromeliha weera nnaamweera hiyo nreene atthu oohimalela, nnoowera omusiveliha Yehova. (Arom. 7:24, 25) Nave-tho noosuwela weera “Muluku t’ori mutokwene opwaha murim’ahu ni onnasuwela sothene.” (1 Yoh. 3:19, 20) Yehova oosuwela itthu sootheene woohima sa hiyo, nave onnanroromeliha weera hiyo nnoowera opaka itthu owo onnivekelaawe.
20. Mwaha wa heeni nihintthuneyaahu oxupeya vantxipale ni itthu nihisuwenlaahu?
20 Yehova onnanleela itthu sootheene nintthuneyaahu osuwela. Vaavo ninkhalaahu oowiiyeviha ni waakhulela eyo, hiyo khaninxupeya ni itthu nihisuwenlaahu, opwaha mwa yeeyo, hiyo ninnawehexexa etthu yeele eri yootthuneya. Napaka eyo nnimoonihera weera hiyo atthu oowiiyeviha ni weera ninnamuroromela Yehova, yoowo ori “musuweli a ekhaikhai.” (Yobi 36:4) Ekhaikhai weera viinaano va khanniiwexexa itthu ikina, mene ninnaroromela weera Yehova onoovirelela onxuttiha wa mahiku ootheene. Ni eyo ti yooreera wa hiyo, mwaha wooweera khaninrowa ohiya oxuttera itthu inyowani woohima sa Muluku ahu ootikiniha. — Koh. 3:11.
ETXIPO 104 Munepa Wootteela ti Yoovaha ya Muluku
a Yesu onoorowa ohoolela ekhotto ya omala wa elapo ela yoonanara ya Satana. Mwa yeeyo, ti wa miruku ohima weera vano Yesu oosuwela nihiku na Armagedoni, nihiku nenno onrowaawe “[owina] ekhotto.” — Apok. 6:2; 19:11-16.
b OTAPHULELIWA WA EFOOTU YA : Tiithi mmoha ni mwanawe erehereraka epasta weera emusi ekhale yoolikaneene wakhala weera enookhumelela etthu yahaawehereraaya.
c OTAPHULELIWA WA EFOOTU: Munna mmoha onviriha maxupo, onnaphimelela ohakalala onrowaawe okhalano mu elapo enyowani.