Yehova onnanilaihera weera elapo enookhala eparaisu

1. Mitthenka heeni Yesaya aalepenlaawe ana Israeli?

MPROFETI Yesaya aahima weera Yehova “Muluku eekhaikhai.” Masu ala ooweera “ekhaikhai” entaphulela “amem.” (Yes. 65:16, enoota.) Ni “amem” entaphulela “ohiye seereye” naari “ekhaikhai.” Vaavo masu ooweera “amem” envariheliwaaya muteko mBiblyani weera uulume woohima sa Yehova naari Yesu, muroromeleke weera etthu eyo ti ya ekhaikhai. Nto mwaha wa yeeyo mitthenka Yesaya aalenlaawe ana Israeli saari seekhaikhai, moohihovela ekhaikhai ti yooweera Yehova onnakwanihera itthu sootheene onlaiheraawe.

2. Mwaha wa heeni nintthuneyaahu ororomelaka soolaihera sa Yehova sa muhoolo, ni makoho heeni ninrowaahu waakhula mwa yoosoma ene yeela?

² Neereke hiyo pooti ororomela soolaihera sa Yehova sa muhoolo weera sinookwanela? Iyaakha 800 sa muttuli noomala etempu ya Yesaya, murummwa Paulo aahiwanyeiha weera hiyo pooti ororomela weera soolaihera sa Muluku sinookwanela. Paulo ohimme ha: “Muluku khanootha.” (Aheb. 6:18) Hiihaale ntoko ehime ehinkhumaaya maahi oosiva etempu emoharu oohisiva, vamoha-moharu Yehova ehime ya ekhaikhai, nto owo khanootha. Mwa yeeyo hiyo pooti ororomela itthu sootheene Yehova onhimaawe ohela mpuwa soolaihera owo apankaawe sa muhoolo. Mwa yoosoma ene yeela hiyo nnoorowa waakhula makoho meeli aneera: Eheeni Yehova olaihenraawe muhoolo? Ni nroromelo heeni Yehova onivanhaawe weera itthu iyo sinimweereya?

YEHOVA ONILAIHENRE EHEENI?

3. (a) Yoolaihera heeni ya Yehova eri yootepa othanleya wa hiyo? (Apokalise 21:3, 4) (b) Atthu akina enoonela hayi nuulumaka woohima sa yoolaihera eyo?

³ Nrowe noone yoolaihera yeeyo eri yootepa otthuneya wa atthu ootheene. (Mmusome Apokalise 21:3, 4.) Yehova oohima weera muhoolo “okhwa khorwa okhala veeli naari winla naari wiikhupanyera naari ovoreya.” Antxipale a hiyo ninnaasomela atthu iversu iya soothanleya woolalerani weera naamaalihe naari owoonihera moota ekumi enrowaaya okhala eparaisu. Menento atthu akina enoonela hayi masu ala? Apaale atthu awo ennahima ha: “Masu ala tootepa oreera ehimphwanelaaya okhala eekhaikhai.”

4. (a) Vaavo Yehova aalaihenraawe eparaisu, eheeni aasuwenlaawe weera yaamweereya? (b) Ohiya paahi opaka yoolaihera eyo, etthu heeni ekina Yehova opankaawe?

⁴ Vaavo Yehova aamuupuxenraawe murummwa Yohani olepa woohima sa yoolaihera ya eparaisu, owo annasuwela weera hiyo olelo va naamurowa ovarihela muteko iversu iya vaavo nnaalaleeraahu atthu woohima sa mitthenka sooreera sa Omwene wa Muluku. Yehova aasuwela tho weera atthu antxipale waamwaaxupa waakhulela weera itthu sinootxentxa muhoolo. (Yes. 42:9; 60:2; 2 Akor. 4:3, 4) Vanonto ninrowa waakhavihera moota heeni atthu akina waakhulela weera soolaihera siri va Apokalise 21:3, 4 sinoorowa okwanela? Nave moota heeni ninrowaahu olipiha nroromelo nahu ni Yehova ni soolaihera sawe? Yehova oonivaha itthu sinrowa onikhavihera waakhulela weera soolaihera sawe sinookwanela. Itthu heeni?

YEHOVA ONNANROROMELIHA WEERA ONOOKWANIHERA ELE ONILAIHENRAAWE

5. Iversu heeni sinnikhavihera ororomela soolaiheera sa Muluku, ni iversu iyo sinhima eheeni?

⁵ Va Apokalise 21:5, 6a, hiyo ninnaphwanya mathowa enneeriha ororomela yoolaihera ya Yehova woohima sa eparaisu. Yoolepa ela hiyo ninsoma ha: “Vano mulipa ookilaathi veehitxeni aaheera: ‘Nkoona! kinapanka soothesene sinyowani.’ Ni aaheera tho ‘Olepe niwoko masu ala toororomeleya ni a ekhaikhai.’ Ni aakeerela tho ‘Sookhalihiwa!’ ‘miyo ka Alfa ni Omega, ephattuwelo ni emalihero.’”

6. Mwaha wa heeni masu eri va Apokalise 21:5, 6 enlipihaaya nroromelo nahu wa soolaihera sa Yehova?

⁶ Mwaha wa heeni iversu iya sa Biblya sinlipihaaya nroromelo nahu wa soolaihera sa Muluku? Liivuru Clímax de Revelação, onhima weera: “Onkhala ntoko Yehova aasinanri epaphelo emoha ya yoolaihera awe weera atthu ale oororomeleya enimwaakhela mareeliho muhoolo.”b Apokalise 21:3, 4. Onnahima eheeni Yehova alaihenraawe, mene eversu ya 5 ni 6, hiyo ninnaphwanya masu Yehova aasinanraawe yaawo enniroromeliha weera yoolaihera awe owo onookwanihera. Vano nrowe noone moota Yehova onanroromelihaawe weera hiyo nimuroromeleke.

7. Masu awani eri va eversu ya 5, ni mwaha wa heeni masu awo eraaya oothanleya?

⁷ Masu mmapatxereroni a eversu 5 enhima ha: “Vano mulipa ookilaathi aaheera.” (Apok. 21:5a) Masu ala toothanleya mwaha wooweera Yehova aahuuluma mwa ikwaha tthaaru mwa ebuukhu ene yeela. Menento khaiyene Nlaika naari Yesu oniroromelinhe, menento aari mwaneene Yehova! Eyo ennanroromeliha weera nintthuneya ororomela moomalela masu ootheene nimphwanyaahu va eversu 5. Mwaha wa heeni? Mwaha wooweera Yehova “khanootha.” (Tito 1:2) Menento nintthuneya ororomela moomalela masu nimphwanyaahu va Apokalise 21:5, 6.

“NKOONA KINAPANKA SOOTESENE SINYOWANI”

8. Masu heeni Yehova ovarihenlaawe muteko enoonihera weera yoolaiheraawe enookwanela? (Yesaya 46:10)

⁸ Masu oottharelana Yehova uulummaawe yaari “Nkoona.” (Apok. 21:5) Masu a eKereku etaphulelinwe ntoko “Nkoona” ikwaha sintxipale ennavariheliwa muteko va eliivuru ya Apokalise. Muteko mmoha wa ireferensiya onhima weera: “Masu ala ennavariheliwa muteko weera akhaviheriwe namasoma wiiwexexa itthu sinttharelana.” Vanonto eheeni Yehova ohimmaawe? Owo enre: “Kinapanka sootesene sinyowani.” Yehova onoorowa opaka matxentxo awo muhoolo nave owo onnaroromela vantxipale weera onookwanihera ele onilaihenraawe. Nave onnuuluma woohima sa matxentxo ekhalaka ntoko aakwanela. — Mmusome Yesaya 46:10.

9. (a) Entaphulela eheeni masu ooweera ‘kinapanka soothesene sinyowani?’ (b) Eheeni enkela weereya ni “erimu” ni “elapo” ekhanle olelo?

⁹ Nrowe nthokorore masu nimphwanyaahu va Apokalise 21:5: “Kinapanka soothesene sinyowani” menento masu ala entaphulela eheeni? Mwa ekapitulu ela, masu ala entthuna ohima itthu piili Yehova onrowaawe opaka. Etthu yoopatxera tiyooweera Yehova onoorowa onyaanya elapo ela yoonanara ni yanaaveeli Yehova onooruuha elapo enyowani. Va Apokalise 21:1, oneera ha: “Veekhaikhai erimu yoopatxera ni elapo yoopatxera saavira” “erimu evinre” enaahima magovernu enhooleliwa ni Satana ni mademoniyu awe. (Math. 4:8, 9; 1 Yoh. 5:19) Masu ooweera “elapo” mBiblyani enaahima atthu enkhala elapo ela ya vathi. (Eph. 11:1; Nsal. 96:1) Menento “elapo evinre” enaahima atthu oonanara murima. Yehova khanrowa weerera oreherera “erimu” naari “elapo” ela ninkhalaahu olelo va. Ohiya opaka eyo, owo onoorowa omaliha moomalela ni onooruuha “elapo” ni “erimu” inyowani naari neere, egovernu enyowani enkela waalamulelaka atthu a exariya.

10. Moota heeni Yehova onkelaawe opaka itthu sootheene sinyowani?

¹⁰ Wa mukhalelo heeni mukina Yehova onrowaawe ‘opaka itthu soothesene sinyowani?’ (Apok. 21:5) Yehova onoorowa oreherera elapo ela ni oweeriha atthu okhala omalela. Ntoko enhimaaya eprofesiya ya Yesaya, Yehova onoorowa weeriha elapo ela okhala nipuro nooreera noolikana ni ejardim ya Edeni. Orehereriwa iwo onoorowa waatapha atthu. Yehova oolaihera omaliha iretta sootheene, atthu oohoona, oohiiwa ni ooheetta enoorowa olamihiwa mpaka atthu ekhwiiye enoorowa ovinyererihiwa. — Yes. 25:8; 35:1-7.

‘MASU ALA TOOROROMELEYA NI A EKHAIKHAI. . . . SOOKHALIHIWA!’

11. Yehova anvekenle opaka eheeni Yohani, ni nthowa heeni Yehova anvanhaawe?

¹¹ Etthu heeni ekina enniroromeliha weera Muluku anookwanihera soolaihera sawe? Yehova aamuleela murummwa Yohani oriki: ‘Olepe, Niwoko masu ala toororomeleya ni a ekhaikhai.’ (Apok. 21:5) Ohiya paahi onvekela Yohani ‘olepa,’ Yehova aahinvaha mathowa weera apake eyo. Yehova aahaatxeerera oriki: ‘Niwoko masu ala toororomeleya ni a ekhaikhai.’ Eyo entthuna ohima weera masu a Muluku toororomeleya. Hiyo ninnamuxukurela vantxipale Yohani mwaha woowiiwelela nlamulo na ‘olepa.’ Mwaha wa yeeyo, olelo hiyo nookhalano eparakha yoosoma ni ophimelela yooweherera ya eparaisu ni mareeliho enniweherera.

12. Mwaha wa heeni Yehova enraawe: ‘Sookhalihiwa?’

¹² Etthu heeni ekina Yehova ohimmaawe? Owo enre: ‘Sookhalihiwa!’ (Apok. 21:6) Eversu ela, Yehova onnuuluma soolaihera sa eparaisu ntoko weera sookwanela. Nave Yehova pooti wuulumaka hiihaawo mwaha wooweera khiyaavo etthu enrowa omukhoottihera okwanihera yootthunaawe. Nave tho, yookhala etthu ekina Yehova uulummaawe enanroromeliha weera yoolaiheraawe moohihovela enookwanela. Ti heeni?

“MIYO KIRI ALFA NI OMEGA”

13. Mwaha wa heeni Yehova enraawe: “Miyo kiri Alfa ni Omega.”?

¹³ Ntoko nihimmaahu woopatxerani, Yehova mwaneene ohuuluma ikwaha tthaaru moolohihiwani mwa Yohani. (Apok. 1:8; 21:5, 6; 22:13) Mwa ikwaha iya tthaaru, Yehova oovarihela masu ooweera: “Miyo kiri alfa ni omega.” Masu ooweera alfa, toopatxera va abecedaariyuni a eKereku ni omega toomalihera. Uulumaka weera “miyo kiri alfa ni omega,” Yehova annoonihera weera vaavo ampatxerihaawe etthu owo annapaka ele anweraawe weera akwanihere nnene sene.

14. (a) Yehova uulumme liini “Alfa” ni onkela wuuluma liini “Omega?” (b) Yoororomeliha heeni nimphwanyaahu va Ephattuwelo 2:1-3?

¹⁴ Yehova aapakakaru Adamu ni Heva, owo aahaaleela teevi yaari yootthunaawe wa atthu ni elapo ya vathi. Biblya oneera: ‘Muluku aahaattalisa yaawo. Noomala Muluku aaweerela: ‘Muyaraneke ni mpuhuwihaneke, musarihe elapo ni nwereke yeeyo.’’ (Eph. 1:28) Vaavo Yehova aahimaawe yootthunaawe, waakhala ntoko weera eera: “Alfa.” Yootthuna ya Yehova enoorowa okwanela vaavo osuulu wa Adamu ni Heva oneera wiiwelele onrowaaya okhala woomalela, osariha elapo ni otatuxa okhala eparaisu. Vaavo enrowaaya weereya eyo, onrowa okhalaka ntoko Yehova oneera: “Omega.” Vaavo Yehova aamalinhaawe opaka erimu, elapo ya vathi ni itthu sootheene sirimomo, owo aaroromeliha etthu. Hiyo ninnaphwanya yoororomeliha eyo va Ephattuwelo 2:1-3. (Musome.) Yehova enre nihiku nanaathanu naveeli ti nootteela. Eyo entaphulela eheeni? Eyo entaphulela weera, yootthuna ya Yehova wa atthu ni elapo ya vathi, enoorowa okwanela okhwipi wa nihiku nanaathanu naveeli.

15. Mwaha wa heeni Satana uupuwelaawe weera anwera omuhiiha Yehova okwanihera yootthunaawe?

¹⁵ Vaavo Adamu ni Heva yaahiñyaaya omwiiwelela Yehova, awo yaakhala anamattheka ni yoottheka eyo ni nookhwa ahaavaliha anamwane aya. (Arom. 5:12) Waakhala ntoko Satana aawera omootxeeliha Yehova okwanihera yootthunaawe ya waasariha atthu oomalela ni oowiiwelela elapo ela ya vathi. Nave waakhala ntoko Yehova khaarowa owera okwanihera yootthunaawe ya elapo ya vathi ni weera, “Omega.” Apaale Satana uupuwela weera vano Yehova khaarowa owera okwanihera yootthunaawe. Apaale tho owo annuupuwela weera Yehova anwiiva Adamu ni Heva ni waapaka atthu akina oomalela weera akwanihere yootthunaawe. Mene Yehova aapanke eyo, Satana aamurowa ohima weera Yehova namootha. Mwaha wa heeni? Mwaha wooweera, moovarihana ni Ephattuwelo 1:28, Yehova aahaaleela Adamu ni Heva weera anamwane aya yaamusareya mulaponi.

16. Mwaha wa heeni Satana uupuwelaawe weera ammweerela Yehova weera toohiwera?

¹⁶ Etthu heeni ekina Satana uupuwelaawe weera Yehova ampaka? Apaale owo uupuwela weera Yehova aamwaakhulela weera Adamu ni Heva ekhaleno anamwane, mene khiyaarowa okhala oomalela. (Koh. 7:20; Arom. 3:23) Mwa mukhalelo ola, moohihovela, Satana ammweerela weera Yehova khaanono owera. Mwaha wa heeni? Mwaha wooweera, Muluku khaarowa owera okwanihera yootthunaawe ya elapo ya vathi okhala eparaisu yoosareya atthu oowiiwelela ni oomalela.

17. Moota heeni Yehova oreherenraawe orukunuweliwa wawe ni Satana ni adamu ni Heva, ni okhwipi waya enrowa okhumelela eheeni? (Nwehe efootu.)

¹⁷ Menento Satana khintale wuupuwelela etthu Yehova aarowaawe opaka. Yehova ooreherera itthu mwa mukhalelo wooreera weera akwanihere yootthunaawe. (Nsal. 92:6, [92:5, NM]) Yehova aahaakhulela wera Adamu ni Heva ekhaleno anamwane. Mwa mukhalelo ola, owo ohoonihera weera khahiyene namootha. Owotho aahima weera ‘osuulu’ awe waamurowa waavuluxa anamwane oowiiwelela a Adamu ni Heva, ooniheraka weera aamurowa okwanihera yootthunaawe. (Eph. 3:15; 22:18) Mwa mukhalelo ola, Yehova khaarowa wiitthaniwa okhala Muluku oohiwera. Osuulu Yehova aalaihenraawe, waamurowa ovaha ekumi awe weera owoopole atthu. Satana khuupuwelenle weera Yehova aamurowa opaka etthu ela. Mwaha wa heeni? Mwaha wooweera mukuttho, onhela mpuwa nsivelo ntokweene na Yehova. (Math. 20:28; Yoh. 3:16) Menento Satana khaanono mukhalelo ola wa nsivelo mwaha wooweera owo toowiikuxa. Vanonto, eheeni enrowa weereya mwaha wa yoowoopola? Okhwipi wa iyaakha 1.000 wa olamulelo wa Yesu, osuulu woowiiwelela ni woomalela wa Adamu ni Heva, onoorowa osariha elapo enrowa okhala eparaisu hiiha ntoko Yehova aahimmaawe weera yaamweereya. Etempu ene yeeyo, onrowa okhalaka ntoko Yehova onera: “Omega.”

NINROWA OLIPIHA HAYI NROROMELO NAHU WA SOOLAIHERA SA YEHOVA WOOHIMA SA EPARAISU?

18. Soororomeliha heeni tthaaru Yehova onnivahaawe? (Nwehe ekwaadru “Mathowa mararu enneeriha ororomela soolaihera sa Yehova.”)

¹⁸ Mwa yoosoma ene yeela, nohoona itthu sintxipale sinanroromeliha weera elapo ya vathi enookhala eparaisu. Vano, ninrowa ohima eheeni wa atthu ale enhovela waari weera eyo enimweereya? Yoopatxera, Yehova mwaneene tolaihenre. Eliivuru ya Apokalise eneera ha: ‘Mulipa ookilaathi veehitxeni aaheera: ‘Nkoona! Kinapanka soothesene sinyowani.’’ Yehova ookhalano osuwela, owera ni otthuna wookwanihera yoolaaiheraawe. Yanaaveeli, mwa moonelo wa Yehova, ele alaihenraawe enkhala ntoko yookwanela. Tivawonto owo ohimmaawe: ‘Masu ala toororomeleya ni a ekhaikhai. . . . Sookhalihiwa!’ Yanaararu, Yehova annoonihera weera vaavo ampatxerihaawe etthu owo annapaka ele anweraawe weera akwanihere nnene sene. Tivawonto wo enraawe: “Miyo kiri Alfa ni Omega.” Okhwipi waya, onoosuwanyeya weera Satana ori namootha ni oohiwera, ohiya Yehova.

19. Wakhala weera atthu akina onnaaxupa ororomela yoolaihera ya Muluku woohima sa eparaisu, etthu heeni nyuwo munrowaanyu opaka?

¹⁹ Muupuweleke: Ikwaha sootheene nyuwo munrowaanyu omuleelaka mutthu mmutekoni moolaleera weera onnatthuneya ororomela soolaihera sa Yehova, mweekhaikhai, nyuwo tho muneereke olipiha nroromelo nanyu wa soolaihera sa Yehova. Ekwaha ekina munrowaanyu osomaka woohima sa soolaihera sa eparaisu eri va Apokalise 21:4, ni mutthu oneera: “eyo tiyooreeraxa ehimphwanelaaya okhala ekhaikhai.” Nyuwo munrowa opaka eheeni? Nyuwo pooti omusomela ni omwiiwanyeiha eversu 5 ni 6, Muupuwelelaka vamoha ni mutthu owo, ni mweereraka omwiiwanyeiha weera Yehova mwaneene tonniroromeliha weera onookwanihera soolaihera iya. — Yes. 65:16.