Ana a Israeli yaavinya omwaako Sinayi ni yaaheetta munikareni. Ephiyakaru nipuro niitthaniwa oKatexi, Yehova aamweerela Mose weera aathanle alopwana 12 a mahimo ana a Israeli, weera yahottele elapo ya oKanani. Mose aaweerela ha alopwana ale 12: ‘Murowe oKanani mwahottele elapo eyo yaareene yooreera olima. Moone moota isidade siraaya, ni mwawoone atthu a wuuwu yaareene oolipa naari ootteettheya.’ Nto anamahottela ale 12 yaarowa oKanani.

Evirakaru mahiku 40, anamahottela ale yaatthika, yaawiiha ifiiku, irooma ni iwuuva. Nave awo yaahaaleela ana a Israeli itthu iye yonnaaya yeeraka: ‘Elapo eyo ti yooreera, mene atthu ankhala elapo eyo, toolipa, nave isidade saya sookhalano ixiri soorakama.’ Nto Kalebi mmoha aanamahottela ale, aaheera: ‘Nnaamweera vareene hiiho, hiyo pooti owera waawina awo. Vanonto nrowe viinaano vaava’! Mwaha wa heeni Kalebi aahimmaawe hiiho? Mwaha wooweera annamuroromela vantxipale Yehova ni namahottela mukina iitthaniwa Yehoxuwa. Nto anamahottela akina 10 yaaheera: ‘Hiyo khanneera eyo, woona weera aKanani toowunnuwa onipwaha hiyo, aani atthu aiwo toorakamaxa nawaattamela vale ninkhala ntoko misoope.’

Ana a Israeli yiiwakaru eyo, yaawoova vantxipale aKanani. Ni awosa yaapatxera wiikhupanyera yeeraka: ‘Phataari otthikela wExipitu.’ Mene Yehoxuwa ni Kalebi yaaheerera waamaaliha ana a Israeli yeeraka: ‘Hiyo khontthuneya owoova awo, mwaha wooweera Yehova onoonikosoopa.’ Mene ana a Israeli khayaatthuna wiiwa, ni yannatthuna omwiiva Yehoxuwa ni Kalebi!

Nto Yehova oonenle hayi itthu iye? Owo aamuleela Mose eeraka: ‘Miyo kohaapakela itthu sintxipale ana a Israeli, menento nnaamweera vareene hiiho, awo khentthuna okiiwelela. Mwa yeeyo, awo enoorowa okhalaka munikareni mwa iyaakha 40, ni ti weiwo enrowaaya okhwelawo. Enrowa ovolowa oKanani ti Yehoxuwa, Kalebi ni anamwane a ana a Israeli.’

Noovira etempu, nlelo ana a Israeli ereene onikareni yaakhala alopwana oohiiwelela. Awosa khayatthuna omwiiwelela Mose. Alopwana awo yiitthaniwa Kora, Datani ni Abirami, ni alopwana 250 yaakhala naawosa. Nave awosa yaamweerela Mose: ‘Hiyo nookhulumuwa ni nyuwosa! Mwaha wa heeni nyuwosa munoonaanyu weera munoowera onlamulela? Ni mwaha wa heeni Aharoni meekhawe aneeraawe akhale namakeya? Yehova khakhanle ni nyuwosa meekhanyu, ori ni hiyo-tho.’ Yehova khaasivelinwe ni etthu ele. Wa Yehova alopwana ale yoonihera ohiiwelela wa yoowo.

Mose aamwaakhula Kora ni asilopwana akina yaari ni yowo eeraka: ‘Nwe omaalo opeweni ni mwaawaaka muruuhe erupani weera nihise. Yehova onoomonihera taani omuthanlalaawe.’

Nihiku naattharelana Kora ni alopwana 250, yaahoowa okumana ni Mose opeweni ekunxeene erupani ni yaapatxera ohisa. Mene anamakeya yaaphwanela opaka eyo. Nto, Yehova aamweerela Mose ni Aharoni: ‘Mwiirakamelihe ni Kora ni asinthamwene awe.’

Vano Datani ni Abirami, yeera ereene vaheemani vaya. Awo khayamwiiwelenle Mose ni khayaaronwe opeweni. Avinyaka Yehova aahuluma wa muloko wootheene weera wiirakamelihe iheema sa Kora, Datani ni Abirami. Muloko wootheene waapaka eyo omuhiya Abirami, Datani ni imusi saya. Mootutuxera, Yehova aahula nlitti ntokotoko ni aaweeriha atthu ale oohiiwelela omorela mulittini mmwe. Muhoolo mwaha Yehova aaheeriha omora mooro wiirimu ni yaamuhisa Kora ni alopwana 250 yaari opeweni.

Moottharelana Yehova aamweerela Mose: ‘Okawe mittootto 12 ni okawele emoha-emoha miloko sa ana a Israeli. Olepe vakoponi nsina na mwene a nihimo. Wa muttootto wa nihimo na alevi, olepe nsina na Aharoni ni wahiye ikopo iyo mpeweni. Ni kinoophuwiha makukhu muttootto yoowo kineeraaka kithanle weera akhale namakeya.’

Nihiku naattharelana, Mose aarowa opeweni okuxa mittootto iye. Moosuwela etthu yeereñye? Yaahunnuwa makukhu mmuttoottoni mwa Aharoni. Mose aawonihera mittootto iye alopwana ootepa otthuneya wa mahimo ootheene. Mene, muloko wootheene waaroromela weera Yehova, aamuthanla Aharoni weera akhale namakeya.