Mpuwa mwa iyaakha soothowa epula, Yehova aamuruma Eliya okhuma wIsraeli ni orowa oSarepta, mwaha wooweera muthiyana aakhala iwe aamurowa onvaha yootxa owo. Aphiyakaru, Eliya aamoona muthiyana mmoha oothoiwa attottaka ikhuuni. Aari naamukhweli ene yoowo Yehova aamuulummaawe. Eliya anvekela ephawu ni maahi vakhaaniini. Naamukhweli ole aaheera: ‘Miyo nkaanono ephawu, kirino paahi ephepa ni makhura vakhaani. Ni eyo enkiphiyera miyo ni mwanaka paahi.’ Eliya aaheera: ‘Yehova oolaihera weera, weyo wakipakelaru ephawu, onookhalano ephepa ni makhura mpaka epula orupa.’

Nto, naamukhweli ole aarowa owaani ni ampakela Eliya ephawu. Nave, hiihaale ntoko Yehova aalaihenraawe, naamukhweli ole ni mwanawe yannakhalano yootxa iyaakha sootheene yahaarupaaya epula. Mwaapu wa ephepa ni eyoopwe ya makhura khayaamala.

Mene etthu yooriipiha murima yaaheereya. Mwaana a naamukhweli ole aahivoreiwa vantxipale ni aahookhwa. Naamukhweli ole aamutxonttela Eliya weera apake etthu. Eliya aamukuxa mwaana ole mmatatani mwa ameyawe ni aamuroiha ekwaartu yeeyo yaakhala osulu wa empa. Owo aamukuha mwaana owo vakaamani ni aavekela: ‘Yehova, txontte, mmweerihe mwaana ola otthikela okhalano ekumi veeli.’ Etthu Eliya aavekenlaawe yaakhala ntoko yaari etthu yoohiwereya! Etthu yaasuwelinwe, yaari yooweera etthu eyo khayaatonko weereya iyaakha sa mutthuli. Nto naamukhweli ole ni mwanawe khaiyene yaari ana a Israeli.

Mene mwaana ole aatthikela okhalano ekumi, nto Eliya aamweerela naamukhweli ole: ‘Nkaweha! Mwanaa ola mukumi!’ Naamukhweli ole aahakalala vantxipale ni aamweerela Eliya: ‘Vano miyo koosuwela weera nyuwo pwiya mwa mulopwana a Muluku ni masu nyuwo munuulumaanyu ankhuma wa Yehova ni ta ekhaikhai!’

Exanela yoowannyawe wIzireyeli, mwene Akhabi annawera woona ematta ya mulopwana mmoha, iitthaniwa Nabothi. Akhabi annatthuna vantxipale ematta ele ni aaheerera othuma. Nabothi khaatthuna otumiha ematta ele. Mwaha wooweera nlamulo na Yehova khanaakhulela. Nabothi aapaka etthu yooreera. Nto Akhabi oonenle hayi eyo? Owo aaxupeya vantxipale ni aanyoonyiwa vantxipale mpaka ohitthuna okhumawo okwaartu ni ohitthuna otxa-tho. Yezabeli muthiyana oonanara murima a Akhabi, aaheera: ‘Akhabi, nyuwo mwene a wIsraeli. Nyuwo pooti okhalano itthu muntthunaanyu. Mukihiye kookhavihereni, miyo kinoowera ematta ele, wa nyuwo.’

Nto, Yezabeli ampaka palano oomwiiva Nabothi weera akuxe ematta ele. Owo aahaaruma alopwana ootthuneya a esidade ele, omoothera Nabothi weera anveeha Muluku. Mwaha wa yeeyo, Nabothi aahiiviwa. Nto Yezabeli aamweerela Akhabi: ‘Nabothi ohookhwa, pooti ohalekeno ematta awe.’

Nabothi khaiyene aari mutthu mmoha ooreera murima iivinwe ni Yezabeli. Owo aaruma wiiviwa atthu antxipale yaamukokhorela Yehova. Owo aakokhorela amuluku eethiru ni annapaka itthu soonanara. Nto Yehova annaweha itthu sootheene. Neereke owo khaarowa opaka etthu?

Evinreene etempu, Akhabi aahookhwa. Yorami mmoha aanamwane awe, aakhala mwene. Mwa etempu ene yeele, Yehova anvarihela mulopwana mmoha itthaniwa Yehu omwiiva Yezabeli ni amusi awe.

Yehu aawela ekaaro awe ya ekhotto ni aarowa wIsraeli. Yorami-tho aawela ekaaro awe ya ekhotto anarowa okumana ni Yehu. Ekumanakaru, Yorami aamukoha: ‘Yehu, weyo onwa ni murettele?’Yehu waakhula enre: ‘Hooye Yorami. Khaninkhala ni murettele wakhala weera ameyaa Yezabeli, anoovirelela opaka itthu soonanara.’ Avinyaka, Yorami aaheerera okuxa ekaaro awe weera atthawe. Mene Yehu aakuxa nivaka amuhoma Yorami ni owo aahookhwa.

Nto Yehu aarowa owannyawe Yezabeli. Asuwelakaru weera Yehu annawa, owo aahiipintari ni aareherera maihi awe ni annanweherera vaxanelani osulu wa empa. Yehu aphiyakaru Yezabeli aapatxera omuhasula. Avinyaka Yehu aahaakhuwelela anamuteko yaari okhwipi wawe: ‘Munvonye muthiyana ola vaxanelani!’ Anamuteko ale yaamukakhela vaxanelani Yezabeli, ni owo aamorela vathi ni aahookhwa.

Avinyaka Yehu aawiiva anamwane 70 Akhabi. Nave-tho owo aamaliha okokhoreliwa wa Bayali wIsraeli. Etthu heeni hiyo ninxutteraahu ni itthu sootheene iyo? Ninxuttera weera Yehova oosuwela itthu sootheene sineereya. Ni ewoora yooreerela owo onnaattaruxa atthu ale empaka itthu soonanara.