Yookhala yooweherera wa atthu akhwiiye?

1. Mitthenka heeni sooreera sa Muluku wa alipa ookhwa?

Lazaro ni asirokoriye Marta ni Mariya, yaamanke waattamela oYerusalemu. Emara Yesu aphiyaalawe nipuro yaakhalaya asirokoriye Lazaro, yaavira mahiku maxexe Lazaro akhwiyene. Yesu vamoha Marta ni Mariya, yaavenya erowaka omahiye avithiwaawewo Lazaro, nave yaatthariwa ni atthu antxipale. Mene Yesu anvinyereriha Lazaro! Nkupuwelani ohakalala yaraayano, omoona Lazaro avinyerenrene. — Mmusome Yohani 11:21-24, 38-44.

Marta aasuwela mitthenka sooreera sa Muluku, voohima sa alipa ookhwa. Aani, Yehova onimwaatthikihera okumi alipa ookhwa, weera ekhaleke elapo ya vathi mahiku oohima. — Mmusome Yobi 14:14, 15.

2. Eheeni eneereya mutthu akhwa vale?

Okhwa ohikhalano ekumi, mwa yeyo, nakhwa vale khanavovo nipuro na erutthu nnahala nivaraka muteko. Mwaha woowera Yehova onipanke ni ntthupi na etthaya. Nave hiyo atthu a erutthu ni ephome. (Ephattuwelo 2:7; 3:19) Alipa ookhwa khenoona, khaaniwa ni soowupuwela saya soomala. Nave tiyeyo yamweerenle Lazaro, owo atthikelakaru okhala mukumi, khahimme etthu eneereya mookhwaani. — Mmusome Nsalmu 146:4; Koheleti 9:5, 6, 10.

Apaale mohinto wiiwa weera Muluku onnahisa atthu omooroni? Mwaiwaleene, eyo ethiru! Biblya onaxuttiha weera, alipa ookhwa khanoona ovoreya, nakhala khanupuwela etthu. Yooxutthiha ya ohisiwa omooroni ethiru, nave eyo yaarowa othonyeraka weera Muluku toonanara murima. Mene Muluku khanaahisa atthu, nave owo ennamunanara ni yoohima ene yeeyo. — Mmusome Yeremiya 7:31.

3. Alipa ookhwa anniweera wuuluma na atthu akumi?

Alipa okhwa khaaniiwa ni khaanuuluma. (Nsalmu 115:17) Ettitthu weera aakhala malaika ohiwelela anuluma na atthu, yisoneihaka ntoko atthu yaale akhwiye. (2 Pedru 2:4) Nave Yehova onahima weera niherereke wuuluma na alipa ookhwa. — Mmusome Olaleya 18:10, 11.

4. Taani anrowa otthikiheriwa ekumi?

Atthu antxipale akhwiye, anootthikiheriwa ekumi. Ni ale oottheene akhwiye ehimusuwenle Muluku ni ale apanke soonanara ehisuwelaka, anootthikiheriwa ekumi. — Mmusome Luka 23:43; Miteko 24:15.

Ootheene yaale anrowa ovinyerera, anoorowa oxuttera ekhaikhai ya Muluku. Nave awo animoonihera nroromelo emwiiwelelaka Yesu. (Apokalise 20:11-13) Yamwiiwelela vale, anookhalano oreeriwa wookhala mahiku oottheene elapo ya vathi. — Mmusome Yohani 5:28, 29.

5. Ovinyerera waatthu ekhwiye, enthonyihera eheeni wa Yehova?

Alipa ookhwa enoovinyerera, mwaha woowera Yehova aamurumiha mwanawe weera anikhwele. Aani, ovinyerera wa alipa ookhwa enoonihera weera, Yehova okhalano nsivelo naatthu. Wa atthu ootheene eneera evinyerere, taani mwatthunanyu opatxera omoona? — Mmusome Yohani 3:16; Aroma 6:23.