1-3. Makoho heeni atthu anipakaaya mwaha wa alipa ookhwa? Ni ittiini sinnakhula hayi makoheene yaala?

BIBLYA onahima weera muhoolo “okhwa khorwa okhala.” (Apokalise 21:4) Muru wa  5 nisommaahu ottuli, nooxuttera weera Yesu ohookhwa weera anivahe eparakha ya okhalano ekumi ehimmala. Naari vareene hiiho, atthu anootepa okhwa. (Koheleti 9:5) Nto ninnakhumelela nikoho nootepa otthuneya: Nnakela woowini nakhwavale?

² Akhwavale ole nnimusivela ahu, ikwaha sintxipale ninnatthuna wiiwa waakhuliwa wa nikoho nna. Nto pooti okoha weera, ole okhwiiye ori woowini? Neereke alipa ookhwa anninoona naari anoowera onikhavihera? Neereke alipa ookhwa, nnoonane tho vanihikuni?

³ Ittiini sintxipale sinnaakhula nikoho nna moovirikana. Ikina sinxuttiha weera atthu ooreera murima anrowa wiirimu, ale oonanara murima anrowa omooroni. Nave ikina sinaxuttiha weera mutthu onakhala munepa ni onnaakanyerana ni amusi ale ekhwiiye khalai. Nave akina tho anaxuttiha weera, mutthu akhwa vale onnatxentxeya onakhala mwaamunama naari onnayariwa elapo ekina.

4. Ittiini sintxipale sinxuttiha eheeni voohima sa alipa ookhwa?

⁴ Ittiini sintxipale sinnaxuttiha itthu soovirikana voohima sa nookhwa. Mene sootheene sinakhala weera sinhima etthu emoha-moha. Etthu heeni? Ittiini iyo sinxuttiha weera erutthu pahi tenikhwa, mene mutthu owo ninlelo mukumi. Neereke ekhaikhai?

NNIKELA WOOWINI NAKHWAVALE?

5, 6. Eheeni eneereya nakhwa vale?

⁵ Yehova onnasuwela etthu eneereya ni atthu akhwiiye. Owo onahima weera, ekumi ennammalela mutthu akhwa vale. Okhwa ohikhalano ekumi. Nto mutthu akhwa vale, soowupuwela sawe ni moonelo awe sinnammalela.a Alipa ookhwa khaaniwa ni khaanupuwela etthu.

⁶ Mwene Salomoni ahimme weera “nto anamakhwa khansuwela etthu.” Atthu akhwiiye khansuwela etthu, ‘sothesene ntata ná nnavaraya wera sipankiwe, opanke ni ikuru sá sothene, niwoko omahiye onnerawe orowe, khophwanya muteko, nari osuwela nari miruku.’ (Mmusome Koheleti 9:5, 6, 10.) Nave Nsalmu 146:4, Biblya onahima weera mutthu akhwa vale “nihiku nene nle sini sikomowe miteko sawe”.

YESU AAHIMME EHEENI SA NOOKHWA

7. Yesu alikanxere okhwa ni eheeni?

⁷ Emaara nthamwenaawe Yesu eeriwa Lazaro akhwiiyaawe, Yesu ahaalela oohuserawe weera: “Lazaro, nthamwen’ahu, onookona.” Mene Lazaro khahiyono weera aamukona .Vano Yesu axiripula eheeni? Nxiripulo nne naatthuna ohima weera: “Lazaro òhokhwa”. (Yohani 11:11-14) Yesu aalikanxera okhwa ni okona ikhove. Nto owo khaahimme weera Lazaro aari wirimu naari ni amusi awe yaakhwiye khalayi. Nave Yesu khahimme weera Lazaro avonyeriwa omooroni, naari weera owo aya oyariwa elapo ekina ni erutthu ekina. Ekhaikhai tiyoowera, Lazaro aakhala ntoko aamukona ikhove. Malepa makina a mBiblyani, annaxiripula okhwa ni okona ikhove. Biblya onahima weera emaara aaiviwawe Stefano, aakhala ntoko “aamukona mookhwani” (Miteko 7:60 NM) Murummwa Paulo aalepa eeraka, akristu akina “yaamukona mookhwani.” — 1 Akorinto 15:6 NM.

8. Eheeni enoonihera weera Muluku khanipakenle weera nikhweeke?

⁸ Neereke Muluku aapanke Adamu ni Heva weera ekhaleke ehuhu vakhaneene, yaavinyaka ekhweeke? Hooye! Yehova aapanke weera ekhaleke mahiku ootheene. Nave yaapakiwe ni ekumi yoohittheka. Atthu ootheene annatthuna okhala wa mahiku ootheene, khaavo ontthuna okhwa. (Koheleti 3:11) Mwaha wa yeeyo ninnawera woona weera khanaapakiwe weera nikhweeke. Neereke ookhala tiithi ontthuna weera mwanawe avoreiweke naari okhwa? Naari, vamoharu, Yehova khommusivela aawonaka atthu ekhwaaka. Pooti weera mookhalano nikoho nikina, vano, heeni ninkhwaahu?

NINKHWELA HEENI?

9. Mwaha wa heeni nlamulo Yehova aavanhaiye Adamu ni Heva, nahaakhanlaaya noovila wiiwelela?

⁹ Ematta ya wEdeni Yehova aamulela Adamu: “otxa ontxawe otxeke sowima sa miri sothene siri mmathatuni, nto sowima sa mwiri wosuweliha yorera ni yonanara, hoye, ohitxe sowima saya, niwoko nihiku onrowawe otxa sowima saya, okhwa onimokhwa.” (Ephattuwelo 2:9, 16, 17) Nlamulo nna, khanaavinle wiiwelela. Mwaha wooweera yaavahiwa miri mikina yeeraaya etxeeke. Mene Yehova aakhalano othaphuwa woowalela Adamu ni Heva etthu yoorera naari yoonanara. Yaamwiiwelenle, yaamonihera weera yannittittimiha otokweene wa Muluku. Nave yamoonihera weera ennera asantte wa soothesene Muluku aapakenla awe.

10, 11. (a) Satana awoonke hayi Adamu ni Heva? (b) Heeni ohikhanlayavo omukhupanya Muluku wa yeele Adamu ni Heva yaapankaaya?

¹⁰ Mooripiha murima, Adamu ni Heva khiyamwiiwelenle Muluku. Satana aamweerela Heva: “Ti etthwitthu wi Muluku ènre: Muhitxeke sowima sa miri sothene sa ematta?” Heva ahakhula: “Hoye, hiyo ninnemihèriwa otxa sowima sa miri sa mmatta, koma sa sowima sa mwiri ole onkhala eriyari ya ematta, Muluku ènre: “Hoye, muhitxe sowima saya nari mwihivareru: onyonya okhwa.” — Ephattuwelo 3:1-3.

¹¹ Satana aahera tho: “Hoye, okhwa khamukhwa, niwoko Muluku onnasuwela wi nihiku munrowanyu otxa sowima saya, maitho anyu eni ehuleye ni muni mukhale sawasawa Muluku, musuwelaka yorera ni yonanara.” (Ephattuwelo 3:4-6) Satana aatthuna weera Heva uupuweleke weera anwera othanla meekhaawe yoorera ni yoonanara. Nave ahawoka wa etthu yeera ekhumelele yaahimwiiwelele Muluku. Satana aamuleela Heva weera hanrowa okhwa yatxavale mwiri wookhottihiwa. Mene Heva aatxa ni aanvaha iyawe anatxa yoowima ele. Hokhanlevo okhupanya, mwaha wooweera Yehova ahaalela weera ehitxe yoowiima ele. Naamwi yaalelinweene, awo yaathanla ohimwiiwelela Muluku. Mene etxaakaru yahonihera ohimuttittimiha Yehova tiithaya!

12. Neereke Yehova waamuttela murima emaara Adamu ni Heva yahamwiiwelenlaya?

¹² Yehova waamuriipa murima vantxi, mwaha woohiwelela wa Adamu ni Heva. Etthu yaapanka aya yaari yoonanara ni yoonihera weera hiyaamuttittimiha mpattuxaaya. Nkuupuwelani weera mwatiithi muniilipihera vantxi weera mwahuwe anamwaniinyu eeli muthiyana ni mulopwana. Nto anamwane ale toottiya maaru nave khantthuna wiiwelela opaka ele munaaruma anyu. Neereke mwaamutteliwa murima ni anamwane ale?

13. Yehova aatthuna ohima eheeni ni masu oweera ‘onotthikele vantthupini’?

¹³ Emaara Adamu ni Heva yaakhonttaaya omwiiwelela Muluku, awo yaahotxela eparakha ya okhala wa mahiku ootheene. Yehova amweerela Adamu: “weyo wá ntthupí ni mwa ntthupi oni otthikele’mo.” (Mmusome Ephattuwelo 3:19.) Eyo entthuna ohima weera Adamu aamutthikela okhala ntthupi, ni okhalaka ntoko khaapattuxiwe. (Ephattuwelo 2:7) Adamu akhwaakaru hakhanle, mwaha wooweera aattheka.

14. Mwaha wa heeni nnakhwahu?

¹⁴ Adamu ni Heva yaamwiiwelenle Muluku,  yaahereke saano ereene a kumi. Mene awo yaamutthekela Muluku, ni ahookhwasa. Atthu ootheene anniyariwa ni yoottheka, mwaha wooweera yoottheka enkhala ntoko eretta yoovalihaniwa. Nto hiyo noovala ni asitithihu. (Aroma 5:12) Mane khahiyono weera Muluku aatthuna hiiha ni atthu. Muluku khanipanke weera nikhweeke. Nave Biblya onnamwiitthana nookhwa okhala “mwittana.” — 1 Akorinto 15:26.

MUHOTOTHIWE NI SOOHIMMWA SA NOOKHWA

15. Mwaha wa heeni oraaya wooreera osuwela ekhaikhai sa alipa okhwa?

¹⁵ Ittiini sintxi sinahima weera alipa ookhwa ennikhala ni ekumi nipuro nikina, nto naapakeleke isataka. Ikwaha sintxi, atthu ennaaliva manimadore, mapadiri naari maxeehe weera epake mavekelo wa mutthu ole okhwiiye. Biblya onahima weera hiyo nihuulumeke ni alipa ookhwa, mwaha wooweera awo khanwera onikhavihera. Alipa ookhwa hanoona ovoreya naari khoonaaripa murima. Awo khaanuuluma, khannikhavihera ni khaaniweera onipakela etthu yoonanara. Mwaha wa yeeyo nihiwooveke alipa ookhwa. Moohihovela, woohosivelani osuwela ekhaikhai sa alipa ookhwa. Heeni oraaya wooreera osuwela? Mwaha wooweera ittiini ni atthu antxi, ennaawoka akhwaaya woohima sa alipa ookhwa.

16. Satana ontthuna weera atthu yuupuweleke eheeni vohima sa alipa ookhwa?

¹⁶ Satana ontthuna weera atthu yuupuweleke weera alipa ookhwa, nlelo akumi. Nto owo onvarihela muteko ittiini soowootha weera exuttiheke ithiru vohima sa alipa ookhwa. Mwa ntakihero, ittiini ikina sinhima weera erutthu ennikhwa, maxi mutthu ole onnakhalano ekumi nipuro nikina. Ankha ettiini anyu enxuttiha hayi? Neereke ettiinaanyu exuttiha hiiho, naari enxuttiha ele Biblya onahimaawe? Musuwele weera Satana onnivarela muteko sowootha iyo weera atthu emurereke ettuli Yehova.

17. Heeni oraaya onnveha Yehova, oxuttiha weera Muluku onnaahisa atthu omooroni?

¹⁷ Ikwaha sintxi, ittiini sinxuttiha itthu siri ottayi ni Biblya. Mwa nthakihero, ittiini sintxi, sinxuttiha weera atthu oonanara murima ennavonyeriwa omooroni. Nto yoowotha ela ennanveha Yehova. Owo khanante wuupuwela weera aahooxeke atthu mooteene yoowo! (Mmusome 1 Yohani 4:8.) Nyuwo mwaya woona hayi mwasuweenle naari omoona tiithi amwihisaka mwanawe vaikho? Moohihovela nyuwo mwaaya weera mutthu ole okhalano nihasu, nave toowumma murima. Mwahereke omusepa weera ahikhale nthamwenaanyu. Mene Satana ontthuna weera atthu yuupuweleke weera Yehova onnaahisa atthu omooroni!

18. Mwaha wa heeni ohintthuneyaaya owoova alipa ookhwa?

¹⁸ Ittiini ikina sinahima weera, alipa ookhwa enthatuwa minepa soonanara ni mikina soorera murima. Nto yoohima eyo ennawoopopiha atthu, akina annasa makhalelo owiithokorora ni minepa sene seiyo. Akina tho annapaka etthu weera ehakalalihe, nave ennapaka mavekelo evekaka wa minepa weera saakhavihere. Mene hiyo noosuwela weera alipa ookhwa henoona etthu eri yootheene. Khontthuneya owoova alipa ookhwa. Nto ontthuneya onvekela ni omukokhorela Yehova yoowo ori mpattuxa a itthu sootheene. Owo ori Muluku eekhaikhai. — Apokalise 4:11.

19. Osuwela weera mutthu okhwiiye hanikhala nipuro nri poothe, onnikhavihera wiiwexexa eheeni?

¹⁹ Ntoko noonnaahu, mutthu akhwa hankhala nipuro nikina. Eyo enninikhavihera ohipwattha soowothiwa sa ittiini. Mene osuwela weera mutthu okhwiiye hankhala nipuro nikina, onnanikhavihera wiiwexexa mwaha wa heeni Yehova ommanaawe natiri okhalano ekumi yoohimala mparadiso elapo ya vathi.

20. Eheeni ninrowahu oxuttera muru wa muhoolo?

²⁰ Neereke alipa ookhwa enootthikela okhala akumi? Ehuhu ya khalayi, kaporo a Muluku eeriwa Yobi, aapaka nikoho nna: “Koma mutthu akhiwiyene onotthikela okumi tho?” (Yobi 14:14) Muru ninrowelaahu muhoolo, nnoorowa oxuttera mwahene yoowo. Mene waakhula wa Biblya ti woovara murima.

1-3. Ekadeya heeni atthu ootheene erayamo, nto Yehova onrowa opaka eheeni weera anoopole?

MUUPUWELE weera nyuwo moohulumeliwa otthukiwa mwaha wa etthu muhipankaanyu, mene munnarohiwa okadeya mpakana okhwela weeiwo. Nto khiyaavo yoopaka ohikhanle omaala oweherera nihuku nookhwa. Nto moowakuveya munnamusuwela mutthu arino owera wowovenxani mukateya mmo. Mwaaya woona hayi?

² Tivaavo, ootheenaahu noohuulumeleliwa ekadeya mootene yoowo. Ekadeya eyo nookhwa. Hiyo atthu, khanaano owera woohulowa okhwa. Mene Yehova okhalano owera woonitaphuliha mukadeya mmo. Nave oolaihera weera, “mwittana òmalihera” ori nookhwa, khonkhalatho. — 1 Akorinto 15:26.

³ Nkuupuwelani ohakalala oneera okhale avenxiwa mwiittani, eyo tiyo, okhwa. Mene Yehova onoopaka itthu sintxi ohiya paahi omaliha okhwa. Owo onahima weera onimwaavaha ekumi atthu akhwiiye. Biblya onnitthana okhala evinyerero, nave Yehova olaihera weera “alipa òkhwa á enekhale tho n’okumi”. (Yesaya 26:19) Biblya ontthuna ohima eheeni ni masu ala?

AKHWA OLE MUNAMUSIVELAANYU

4. (a) Ninrowa ophwanya woowini nimaaliho nakhweliwa ole nnimusivelaahu? (b) Taani yaari asinthamwene awe Yesu?

⁴ Nakhweliwa ole nnamusivelaahu onnanivoreya murima vantxipale. Onkhala ntoko weera khaninwera ovilela. Nave ninnoona weera khaninwera opaka etthu weera nimutthikihere ekumi ole okhwiye. Mene Biblya onnanivaha nimaaliho neekhaikhai. (Mmusome 2 Akorinto 1:3, 4.) Mwa ntakihero, emaara Yesu araawe elapo ya vathi, aapaka etthu yoonihera weera Yehova onnatthuna waavaha ekumi alipa ookhwa. Yesu aakhovelela omuxekura Lazaro ni asirokoriye Marta ni Maria. Awo yaari asinthamwenaawe Yesu. Biblya onthaliha weera: “Yesu ànamutthuna Marta ni munn’awe ni tho Lazaro.” Nihiku nimoha, Lazaro ahookhwa. — Yohani 11:3-5.

5, 6. (a) Neereke Yesu waamuttela murima owoona amusi ni asinthamwene a Lazaro yinlaka? (b) Oriipiwa murima wa Yesu onnimaaliha hayi?

⁵ Marta asuwelakaru weera Yesu oophiya, owo amwattamela. Nto Yesu ammaaliha Marta ni Maria. Nave Marta aatteliwa murima omoona Yesu ni aheera: “Pwiya, wakhanle vava, sano ahakhwiye murokor’aka.” Marta uupuwela weera Yesu khaaya opaka etthu. Ni emaara Yesu aamoonnaawe Marta ni Maria yinlaka, owo waamuripa murima vantxipale ni aapatxera wiinla. (Yohani 11:21, 33, 35) Yesu waanvoreya murima ntoko hiyo onnivoreyaaya nakhweliwa ole nnimusivelaahu.

⁶ Yoowereya ela ennimaaliha moota heeni? Eyo ennanimaaliha mwaha wooweera ennanlela moota Yehova ni Yesu onaananaraaya okhwa. (Yohani 14:9) Ti wootteliha murima vantxipale osuwela weera Yehova ookhalano owera woomaliha okhwa. Mene tiyeeyo aneerawe apake moohipisa.

YESU ANVINYERERIHA LAZARO

7, 8. (a) Heeni Marta akhoottinhawe ohuliwa mahiye a Lazaro? (b) Yesu apanke eheeni nipirikixiwakaru nluku va mahiye?

⁷ Muttempo wa Lazaro, waavithiwe mukhukuni ni mulako wa nikhuku nne waattiyeliwa ni nluku ntokotoko. Yesu aphiyakaru omahiye ahera: “Nvinxe nluku!” Nto Marta khaatthuna weera mahiye ale ehuliwe. Mwaha wooweera yaamala mahuku maxexe Lazaro akhwiyeene. (Yohani 11:39) Marta khaasuwela weera Yesu amunvinyereriha murokoriye emaarene yeele.

⁸ Yesu aheera: “Lazaro okhumele vate!” Woohilekela Marta ni Maria yaahoona etthu yootikiniha. “Mulipa òkhwa àkhumela vate.” (Yohani 11:43, 44) Yesu anvinyereriha Lazaro! Ni owo aatthikela okhala ni amusi ni asinthamwenaawe. Atthu ootheene yanniwera onvaha mooni wa ntata ni woopano mwaha. Tthiri waari mwiirira wootikiniha ni woohakalaliha, omoona Yesu anvenxaleene Lazaro mmahiye.

“YESU ‘ANVINYERERIHA MWAAMWALI!’”

9, 10. (a) Yesu aaphwanya woowini owera woowavinyereriha atthu? (b) Mwaha wa heeni, nitthuneyaahu osuwela sa ovinyerera olempwale mBiblyani?

⁹ Yesu aaphwanya woowini owera woowavinyereriha atthu? Moohihovela aari Yehova anvaha owera. Yesu ahoonihera emaara anvekenlaawe Yehova ahinaakuve onvinyereriha Lazaro. (Mmusome Yohani 11:41, 42.) Lazaro khahiyono aari mutthu mmoha avinyererihiwe ni Yesu.a Mwa ntakihero, Biblya onnuuluma sa mwaarusi aakhalanne iyaakha 12, nave aavoreiwale vantxipale. Owo aari mwana mmoha a Jairo. Nto owo yaamuxera maitho ni amutxonttelela Yesu weera amulamihe mwanawe. Emaara Jairo alokolonlawe ni Yesu, yaaphiya alopwana enamwerela Jairo “Mwan’á mwamuthiyana òhòkhwa, ohimukattamihe tho Muhusiha”. Vano Yesu aamweerela Jairo, “ohòve wiwelelaru, mwana mwamuthiyana anavuluxiwe”. Nave Yesu attimula ayaaka owanyawe Jairo ni ephiyakaru, Yesu awoona atthu antxi yinlaka ni aweerela: “Muhìnle, khakhwiye mene onookona”. Asitiithi a mwaaruusi ole, yannikohana, ontthuna ohima eheeni ni masu ala! Yesu ahavekela atthu yaari mpani weera akhumele vaate. Nto ahavekela asitiithawe mwaaruusi ole weera evolowe mpaani mmwe aataleliwaawemo mwaaruusi ole. Yesu anvara ntata mwaaruusi ole, ni amwerela “mwaaruusi ovinye!” Munniwera wuupuwelela ohakalala yaarayano asitiithawe mwaaruusi ole, emaara yaamoonnaya avinyaka ni aneetta! Yesu anvinyereriha mwanaya! (Marko 5:22-24, 35-42; Luka 8:49-56) Mwaha wa yeeyo, emaara yootheene yaanwehaya mwanaya, yannuupuwelela ele Yehova aapankawe anvarelaka muteko Yesu.

¹⁰ Ekhaikhai weera atthu yaavinyererihiwe ni Yesu, awo yaari ohimalela, ni yaatthikela okhwa wanaaveeli. Nto onnatthuneya osuwela ovinyererihiwa wa atthu. Mwaha wooweera onnoonihera weera Yehova onimwatthikihera ekumi atthu akhwiiye.

YEHOVA ONIMWAVINYERERIHA ALIPA OOKHWA

11. Koheleti 9:5 onahima eheeni sa alipa ookhwa, ni enoonihera eheeni ni ele yakhumelenle ni Lazaro?

¹¹ Biblya onnahima mowiwanyeya va Koheleti 9:5 “anamakhwa khanasuwela etthu.” Eyo enoonihera weera Lazaro akhwaakaru khasuwela etthu yeereya. Ntoko Yesu ahimmaawe, aakhala ntoko Lazaro aamukona. — Yohani 11:11

12. Ninsuwela hayi weera Lazaro avinyererihiwa?

¹² Atthu antxipale yaamoona Yesu anvinyererihaka Lazaro. Mene ovinyerera wa Lazaro yaari etthu yeekhaikhai khohiyono ethiru. Mwaha wooweera Lazaro aavinya akhala mukumi. Mpaka ale yaari mamwiittani a Yesu, yaahona mwiiriira ole aapankaawe. (Yohani 11:47) Opwaha mwa yeeyo, atthu antxi yaamuxekura Lazaro, weera yoonexexe ele Yesu aapankaawe arumwaka ni Muluku. Amwiittani antxi a Yesu khayaasiveliwe ni etthu ele aapankaawe. Nto, yaanamusontta Yesu vamoha ni Lazaro weera ewiive. — Yohani 11:53; 12:9-11.

13. Heeni nnerahu nroromeleke weera Yehova onimwavinyereriha atthu akhwiye?

¹³ Yehova opanke itthu soothesene. Mwaha wa yeeyo, owo onoowera waatthikihera ekumi atthu ootheene akhwiye. Nave Yesu ahuuluma eeraka, “atthu ari mmahiyeni” anoovinyererihiwa. (Yohani 5:28) Nto eyo enoonihera weera Yehova onnawuupuwela atthu onrowaawe waavinyereriha. Neereke Muluku onoowera opaka eyo? Aani, mwaha wooweera Biblya onahima weera, Yehova oosuwela masina a itthenyeeri soothesene sa wirimu. (Mmusome Yesaya 40:26.) Okhala weera owo oosuwela masina a itthenyeeri sootheene sa wiirimu, moohihovela onoowera owuupuwelela atthu ootheene yaale aneeraawe avinyererihe.

14, 15. Masu a Yobi anixuttiha eheeni sa ovinyerera?

¹⁴ Yobi yoowo aari kaporo ooromeleya a Yehova, annaroromela weera onookhala ovinyerera. Nihiku nimoha owo amukoha Muluku: “Koma mutthu akhwiyene onotthikela okumi tho?” Yobi aamuleela Yehova: “Vavale wamukitthana ni miyo kamwàkhula, weyo wìnlelaxaka muteko wa matat’á”. Masu ala aYobi antthuna onxuttiha weera Yehova onnatthuna waavinyereriha alipa ookhwa. — Yobi 14:13-15.

¹⁵ Munoonela hayi mwiiwaka sa ovinyerera wa alipa ookhwa? Khoonosivelani osuwela weera Yehova onimwavinyereriha alipa ookhwa? Apaale munnupuwela weera amusaaka, ni asinthamwenaka anoovinyerera? Nnasa woona ele Biblya onahimaawe. Wa atthu ale eneera evinyererihiwe anrowa okhalaka woowini.

ENEEPHIYE EHUHU “ANÈRAYA YIWE NSU NAWE NI EVINYE”

16. Mwaha wa heeni ovinyerera onrowa weereya muhoolo onrowaya otepa oreera opwaha wa khalai?

¹⁶ Ehuhu yakhalai, atthu antxipale yaavinyererihiwe yaatthikela okhala naamusaaya ni asinthamwene aya, mulaponi muumu. Tiyeeyo eneera yeereye muhoolo moohilekela ni atthu eneera evinyererihiwe ni Muluku, maxi onovirikana opwaha moota yaavinyererihiwaaya atthu akhalai. Mwaha wa heeni oneeraaya ovirikane? Mwaha wooweera atthu eneera evinyererihiwe muhoolo, enookhalano eparakha yookhalano ekumi yoohimala. Nave-tho elapo eneekhale yoovirikana ni ela ninkhalaahu olelo va. Sineereke simanleene ikhotto, ikirime ni nnottiwala weera saakhala iretta mulaponi.

17. Taani anrowa ovinyererihiwa?

¹⁷ Taani eneera evinyererihiwe? Yesu ahimme weera “atthu ari mmahiyeni anèraya yìwe nsu nawe ni evinye.” (Yohani 5:28, 29) Nave Biblya onahima weera: ‘Ni ephareya yàhàhokoloxa alipa òkhwa yari’mo. Ni okhwa ni mahiye tho sàhàhokoloxa alipa òkhwa yari’wo.’ (Apokalise 20:13) Eyo enoonihera weera atthu antxipale anovinyerera. Ni murummwa Paulo ohimme weera “enekhale evinyerero ya alipa òloka ni òhiloka.” (Mmusome Miteko 24:15.) Masu oweera alipa òhiloka, anaahima taani?

18. Alipa “òloka” heeni eneera yavinyererihiwe?

¹⁸ Alipa “òloka” akaporo ororomeleya a Yehova. Akaporo ootheene oororomeleya a Yehova akhalai. Aanniheliwa mpuwa akaporo yaale yaari oororomeleya, Yesu anhinaye orwa elapo ya vathi. Mwa ntakihero, Nowe, Abrahamu, Sara, Mose, Ruthi ni Estheri. Nto nyuwo pooti osoma sa akaporo awo a Yehova ekapiitulu 11 ya Aheberi. Mene alipa “òloka” khaiyene akaporo yaale akhalai paahi, nave anna ni arokora oororomeleya anikhwa mahikwaano, aneerela empari ya “òloka” nto anoovinyererihiwa.

19. Vano taani ari alipa “òhiloka”? Nave eparakha heeni Yehova oneerawe aavahe?

¹⁹ Mukuttula wa alipa “òhiloka”, atthu yaale akhwiye ehimusuwenle Yehova. Nto owo khaattiwanle. Mene Yehova onimwavinyereriha atthu awo ni waavaha eparakha yooxuttera moota woopaka yootthunaawe.

20. Atthu heeni ahinrowa ovinyererihiwa?

²⁰ Vano neereke atthu ootheene akhwiye anoovinyerera? Hooye. Mwaha wooweera Yesu, ahimme weera khoiyono atthu ootheene eneere etthikele okhala akumi. (Luka 12:5) Atthu awo tiyaale ari oonanara murima, nave enakhotta ottharuwa. Vano taani onnaathanla ale anrowa ovinyerera? Yehova tori Mphuki oomalihera, ekhaikhai weera owo oonvaha oweera Yesu weera akhale “Mphuki àtthu àkumi ni akhwiye.” (Miteko 10:42) Nto Biblya onahima weera atthu ahinrowa ovinyerera, ari ontxeheena. — Nwehe Enoota 19.

OVINYERERIHIWA WA ATTHU ANROWA WIRIMU

21, 22. (a) Atthu anrowa okhalaka wirimu, anvinyerera ni erutthu ya moota heeni? (b) Taani apatxerinhe ovinyerera weera akhaleke wirimu?

²¹ Biblya onnahima mukuttula w’atthu onrowa okhalaka wirimu. Atthu anrowa okhalaka wirimu, khanvinyerera ni erutthu yeemutthu. Mene awo anvinyerera ni erutthu ya omunepani.

²² Yesu toopatxera ovinyerera weera akhaleke wirimu. (Yohani 3:13) Emalakaru mahiku mararu Yesu akhwiyeene, Yehova anvinyereriha. (Nsalmu 16:10; Miteko 13:34, 35) Yesu khavinyererihiwe ni erutthu ya emutthu. Murummwa Paulo ahimme weera Yesu “ìviwene mwerutthuni, nto akhalihiwene veli n’okumi mmunepani.” (1 Pedru 3:18) Nto Yesu aatthikela okhalano ekumi yoomunapani yowera! (1 Akorinto 15:3-6) Mene Biblya khanhima weera aarowa okhala meekhaawe eera avinyerere ni eera akhaleke wirimu.

23, 24. Atthu akavi anrowa ovinyererihiwa weera yakhaleke wirimu?

²³ Ehalaka emaara vakaani weera Yesu iiviwe, owo ahaalela oohuserawe ororomeleya weera: “Khweli kinorowa, wera koreherereleni nipuro.” (Yohani 14:2) Eyo enoonihera weera oohusera akina a Yesu anovinyererihiwa weera yakhaleke wirimu. Mwaneene Yesu onnitthana okhala “moloko mukhani.” (Luka 12:32) Nave murummwa Yohani aahoniheriwa molohani, nummeru n’atthu awo. Owo onahima weera aamona Yesu “èmenlene vamwako siyoni ni vamosá ni yowo atthu ale milóko miloko sene milokó miloko miloko ni atthu miloko miloko miloko sene miloko milokò mixexe orwa atthu milokò milokó sene milokó mixexe (144.000), yarino nsina nawe ni nsina na Atith’awe nilepiwe vayutxini vaya.” — Apokalise 14:1.

²⁴ Vano aKristu ala oororomelaya 144.000, epatxenre ovinyerera emaara heeni? Emaara Yesu ovariwawe Omwene. (1 Akorinto 15:23) Mene Yesu mwene a wirimu, ni atthu antxipale a 144.000 ahookhwa ni aavinyererihiwa. Akina wa atthu ene yaawo nlelo akumi. Nto atthu awo yaakhwa, annavinyerera weera yakhaleke wirimu. Vano atthu ale anrowa okhalaka mparadiso elapo ya vathi, anrowa ovinyerera liini? Anrowa ovinyerera muhoolo.

25. Eheeni ninrowaahu oxuttera muru onttharelana?

²⁵ Moohilekela Yehova onrowa ommaliha nookhwa. Okhwa honrowa okhala tho! (Mmusome Yesaya 25:8.) Vano atthu ale anrowa wirimu, anrowa opakakawo eheeni? Biblya onnahimexexa weera atthu awo anrowa olamulelaka ni Yesu. Ninrowa oxuttera sa omwene owo, muru onttharelana.