Ovinyererihiwa wa Yesu

Yesu akhwaakaru, mulopwana mmoha a muhakhu iitthaniwa Yosefe aarowa onvekela Pilatu ovenxavo erutthu ya Yesu vamwirini. Nto Yosefe aavitikelela erutthu ya Yesu ni ekuwo ni attikitthela makhura oowinkhela ni aahela erutthu ya Yesu munihiyeni nyowani nave aawala vamulako ni nluku ntokweene. Moottharelana, asitokweene aanamakeya yaarowa wuuluma ni Pilatu: ‘Ninnoova weera atthareli a Yesu enoorowa okumiha erutthu ya Yesu ni ohima weera oovinyerera. Aani, niwale mulako wa nihiye nne ni naahelevo makwaarta weera ewehaweheke.’

Evirakaru mahiku mararu oxeexelo aya, Maria Madalena ni asithiyana akina yaarowa omahiye. Ephiyakaru yaahoona weera ookhala aavenxale nluku naari vamulako. Evolowakaru munihiyeni yaahoona nlaika. Ni nlaika nno naaheera: ‘Muhoove, Yesu oovinyererihiwa! Mpwaheke mwaaleele atthareli weera erowe oGalileya yakumane nuuwo.’

Maria Madalena aapwaha atthimakaka orowa omwaasa Pedru ni Yohani ni aaheera: ‘Ookhala okunxe erutthu ya Yesu!’ Pedru ni Yohani yaarowa omahiye moowaakuveya. Ephiyakaru iwe yaaphwannye nihiye nne, nihikhanlemo etthu. Nto awosa yaatthikela owaani.

Maria atthikelakaru omahiye iwe, aahoona malaika meeli mmahiye mmwe. Owo aahaaleela weera khonne erutthu ya Yesu yaaroihinwaayawo. Avinyaka, aamoona mulopwana mmoha ni aahuupuwela weera aari mulopwana aarehera ejardi. Maria aaheera: ‘Txontte okileele, waaroihale woowiini Apwiyaka Yesu?’ Mulopwana ole aamwiitthanela Maria nsina nawe. Yaari etempu ene yeeyo aamusuwenlaawe weera aari Yesu ni annatthuna omukhupaarela. Yesu aamuruma Maria weera aaleele atthareli awe etthu yeereñye. Nto owo aarowa atthimakaka ni aahaaleela atthareli awe, weera aamoona Yesu.

Moottharelana, atthareli eeli yaakela nipuro naitthaniwa Emausi. Avinyaka, mulopwana mmoha aapatxera weetta naawo ni aahaakoha etthu yuulumaaya. Awo yaaheera: ‘Nyuwo khamusuwenle? Mahiku mararu a mutthuli asitokweene aanamakeya, yaaruma wiiviwa Yesu. Vano asithiyana akina anhima weera owo mukumi.’ ‘Nyuwo khamunaaroromela maprofeta, awo yaahima weera Yesu aamookhwa ni aamurowa ovinyerera.’ Mulopwana ole aavirelela owiiwanyeiha masu a Muluku alopwana ale. Nto awo yaarowa otxa vamoha. Ehinaakuveene otxa epaawu, mulopwana ole aapaka nivekelo. Ewooreene yeele atthareli yaasuwela weera aari Yesu. Mene mootutuxera aalakaseya!

Atthareli ale eeli yaarowa oYerusalemu etthimakaka, ni yaahaaleele arumeyi etthu ele yereeñye. Mootutuxera, Yesu aakhumelela empa ele yaaraayamo. Awo khayaaroromela weera mwekhaikhai aari Yesu. Mene Yesu aahuuluma: ‘Nwehe matata aka ni mukivare. Masu a Muluku yaahima weera Kristu aamookhwa ni anvinyerera.’