Nwuupuweleke amwaarawe Lothi

Lothi aakhala ni atiiyu awe Abrahamu elapo ya oKanani. Noovira etempu, Abrahamu ni Lothi yaakhalano inama sintxipale, menento awo khiwaawereya okhala vamoha. Mwaha wa yeeyo, Abrahamu amweerela Lothi: ‘Khonwereya okhala nipuro nimoha ooweeli hiyo. Eparte heeni oneeraawe okelewo? Pooti othanla. Wakela moono woolopwana miyo kinaakele moono woothiyana.’ Abrahamu aamuhiyera Lothi opatxera othanla. Owo aamonihera nsivelo, keera?

Menento Lothi, aahoona eparte emoha ya oKanani yootepa oreera, yeeyo yaariwowo esidade emoha yiithaniwa Sodoma. Naari nipuro noowaatta maahi ni malaxi. Menento Lothi aathanla othaamelawo ni emusi awe.

Mene atthu oSodoma yaari oonanara murima, ntoko hiihaale atthu oGomora, esidade yaari waattamela oSodoma. Mweekhaikhai, yaari atthu ootepa onanara murima mpaka Yehova olakela onyaanya isidade iye piili. Menento Yehova aatthuna onvuluxa Lothi ni emusi awe. Mwaha wa yeeyo, Muluku aarumiha malaika meeli weera yamuleele Lothi weera: ‘Waakuveke! Okhume va, mwaha wooweera Muluku onoonyaanya esidade ela.’

Lothi khaakhu me moowakuveya, owo annapisa. Menento malaika ale yaahinvarela moono Lothi, amwaarawe ni anamwane awe eeli asithiyana, ni yaahaakuxa moowaakuveya yaakumiheraka vaate va esidade ele. Malaika ale yaakhuwela: ‘Mutthimakeke! Nvuluxe ikumi sanyu! Muhiwehe ottuli! Mwaweha vale ottuli munimookhwa!’

Etempu Lothi ni emusi awe yaaphiñyaaya esidade yiitthaniwa Zowari, Yehova aheeriha weera emore maralala a mooro esidade ya oSodoma ni oGomora. Isidade soopiili saanyaanyiwa moomalela. Menento amwaarawe Lothi khiyaamwiiwelenle Yehova ni yaaweha ottuli. Moosuwela etthu yeereñye? Yaathatuwa nluku na maakha! Mwa yeeyo, Lothi ni anamwanaawe yaariipiwa murima. Mohoona moota oraaya wooreera omwiiwelela Yehova?