Epuuru ya Bilamu

Vaavo ana a Israeli yeettaaya munikareni mwa iyaakha 40, vano awo yaahattamela nipuro niitthaniwa Mowabi. Mwene oMowabi yoowo iitthaniwa Balaki, annoova owana ni ana a Israeli ni owiniwa. Mwa yeeyo, owo anvekela mulopwana iitthaniwa Bilamu owa oMowabi ni wuuluma itthu soonanara seiyo seera saakhumelele ana a Israeli.

Mene Yehova aamweerela Bilamu: ‘Ohirowe wuulume itthu soonanara woohima sa ana a Israeli.’ Mwa yeeyo, Bilamu khaaronwe oMowabi. Nto, mwene Balaki aamurumihela mitthenka owo eeraka: ‘Weyo wawa nno, kinnoolaihera weera kinimoovaha itthu sootheene ontthuna awe.’

Nnaamweera vareene hiiho Bilamu kharonwe oMowabi. Mene Yehova aamweerela owo eeraka: ‘Weyo pooti oroweke, wahime paahi ele kineeraaka kooleele.’ Nto Bilamu, aakuxa epuuru awe ni aaheetta ekwaha arowaka oMowabi. Menento aalakela orowa wuuluma itthu soonanara wa ana a Israeli. Mwaha wa yeeyo, mpuwa mwa mukwaha ole nlaika naamukhumelela mmuseweni. Bilamu khaawera woona nlaika nne, mene eburo awe yaawera wona, weera esepe nlaika nne, epuuru ele yaavinyamo mmuseweni nto Bilamu aahimana. Eettaleene vakhaaniini arowaka ohoolo, nlaika nne naakhumelela veeli. Emaara epuuru ele yeerenraaya otthawa veeli, yaahixeerera ni exiri ni yaahiphitihera nnaani na Bilamu vaxirini. Owo aahimana-tho veeli. Avinyaka, nlaika nne naamukhumelela-tho veeli. Nto ekwaha ela epuuru khaayaawenre osepa nlaika nne. Nto mwaha wa yeeyo epuuru ele yaahiisaatalela variyari va ephiro, nto Bilamu aahimana tho veeli epuuru ele.

Ewoora ene yeele, Yehova aheeriha epuuru ele wuuluma. Epuuru eyo yaahimukoha Bilamu: ‘Mwaha wa heeni onkimanaawe?’ Bilamu waakhula enre: ‘Mwaha wooweera weyo onnakuulihiha muru miyo, kaarinono ekatana va, kanwiiva!’ Nto epuuru yaamwaakula: ‘Ikwaha sootheene weyo onnakiruma, keera? Miyo kootoko woopakela yeela khalayi?’

Nto, Yehova aamuhiya Bilamu woona nlaika. Nlaika nne naaheera: ‘Yehova ohooleela weyo weera ohuulume itthu soonanara woohima sa ana a Israeli, khaiyene tiyeeyo?’ Bilamu aaheera: ‘Miyo koottheka. Kinootthikela owaani.’ Nlaika nne naaheera: ‘Weyo pooti orowa oMowabi. Mene wuulume paahi etthu Yehova aneeraawe ooleele.’

Neereke Bilamu aaxutteravo etthu? Hooye. Aphiyakaru oMowabi, owo aaheerera ohima weera itthu soonanara saamurowa waakhumelela ana a Israeli. Aaheerera opaka eyo ikwaha ttharu. Mene Yehova aamweeriha Bilamu ohima weera saarowa waakhumelelela itthu sooreera ana a Israeli. Avinyaka ana a Israeli erowakaru owana oMowabi, Bilamu aahookhwa. Waamurowa okhala wooreera waakhanle weera Bilamu aahiiwelela ovinyera woopatxerani, keera?