Muttheka mutokweene wa mBiblyani ori Omwene wa Muluku. Yehova onkela ovarela muteko Omwene owo weera atatuxe elapo ela okhala eparadiso. Omwene heeni yoowo? Ni ninsuwela hayi weera onnalamulela? Eheeni owenraaya opaka? Ni eheeni onkelaaya opaka muhoolo? Yoosoma ela ni yoosoma enttharelana enoorowa waakhula makoho ala.

1. Omwene wa Muluku ti heeni ni taani ori mwene a Omweneene yoowo?

Omwene wa Muluku olamulelo Yehova opankaawe wiirimu. Yesu kristu, onlamulela areene wiirimu. (Matheyo 4:17; Yohani 18:36) Biblya onhima weera Yesu “omwen’awe . . . khorwa omala.” (Luka 1:32, 33) Mwaha wookhala mwene a Omwene wa Muluku onkela waalamulelaka atthu a elapo yootheene ya vathi.

2. Taani ankela olamulela vamoha ni Yesu?

Yesu khankela olamulelaka meekhaawe. ‘Atthu a nihimo ni mulumo ni maloko a elapo yootheene, anrowa olamulela ni yoowo.’ (Apokalise 5:9, 10) Atthu akavi ankela olamulela ni Kristu? Okhuma ehuhu Yesu aaraawe elapo ya vathi atthu antxipale yaakhala makristu. Neereke makristu ootheene ankela olamulelaka ni Yesu? Hooye. Atthu okwana 144.000 ankela olamulelaka ni Yesu wiirimu. (Mmusome Apokalise 14:1-4.) Makristu makina, ankela weerela empari ya emusi ya Muluku vathi vaava.—Nsalmu 37:29.

3. Mwaha wa heeni Omwene wa Muluku oraaya wootepa ontthuneya opwaha olamulelo wa atthu?

Nnaamweera anamalamulela yeereraka opaka itthu sooreera, awo khayaanono owera woopaka itthu sootheene antthunaaya. Ni ennaphiyera emaara etxentxiwe ni omwene mukina, mwaha wooweera khaanaapwattha atthu ntoko entthuneyaaya. Mene mwene a Omwene wa Muluku, Yesu. Yoowo ohinkela otxentxiwa ni mwene mukina. ‘Muluku a wirimu anavinyererihe omwene ohinkela opwexiwa wa mahiku othene.’ (Daniyeli 2:44) Yesu onkela olamulelaka elapo yootheene. Nto aneereke waapwattha atthu ootheene nave khamusamaraka mutthu mmoha nnene opwaha mukina. Owo tansivelo, tooreera murima ni ta xariya ni aneereke waaxuttiha atthu othokororana mukina ni mukhwaawe mwa nsivelo, ni mooreera murima ni exariya.—Mmusome Yesaya 11:9.

4. Omwene wa Muluku onkela olamulelaka elapo yootheene

Olamulela wa Omwene wa Yesu ti wootthuneya opwaha olamulelo wootheene onkhanle. Mmusome Matheyo 28:18. Avinyaka mutthekule ni epontu enttharelana:

• Owera wa Yesu ohiyane moota heeni ni owera wa atthu?

Anamalamulela a mulaponi annatxentxa moowaakuveya, ootheene awo anlamula empari vakhaani ya elapo paahi. Ankha nto voohima sa Omwene wa Muluku? Mmusome Daniyeli 7:14. Avinyaka mutthekule ni ipontu sinttharelana:

• Mwaha wa heeni oraaya wooreera osuwela weera Omwene wa Muluku ‘khonkela opwaxiwa ni omwene mukina’?

• Mwaha wa heeni oraaya wooreera osuwela weera omwene wa Muluku onkela olamulela elapo yootheene?

5. Anamalamulela aatthu annatthuneya otxentxiwa

Mwaha wa heeni Omwene wa Muluku oneeraaya otxentxe omwene wa atthu? Moone EVIIDIYU. Avinyaka mutthekule ni epontu enttharelana.

EVIIDIYU: Omwene wa Muluku ti heeni?—Empari (1:41)

• Enkhumela heeni mwaha woolamulela atthu?

Mmusome Koheleti 8:9. Avinyaka mutthekule ni ipontu sinttharelana:

• Nyuwo munoona weera Omwene wa Muluku onootxentxa olamulelo wa atthu? Mwaha wa heeni munoonaanyu hiiho?

6. Omwene wa Muluku wookhalano anamalamulela ansuwela makhalelo ahu

Mwene ahu Yesu aakhala valaponi ntoko mutthu, mwa yeeyo, owo “onnasuwela soottettheya sahu.” (Aheberi 4:15) Opwaha mwa yeeyo, Yehova ohaathanla atthu 144.000 alopwana ni athiyana oororomeleya yaayo ankela olamulela ni Yesu, atthu “a nihimo, nulumo, ni maloko othene.”—Apokalise 5:9.

• Munoonela hayi mwaha woosuwela weera Yesu ni ale ankela olamulela ni yoowo aasuwela maxupo ninvirihaahu? Mwaha wa heeni munoonaanyu hiiho?

7. Malamulo a Omwene wa Muluku tootepa ontthuneya opwaha malamulo a olamulelo waatthu

Anamalamulela ennapaka malamulo yaawo anaakhavihera atthu ni waakosoopa. Omwene wa Muluku tho wookhalano malamulo. Mmusome 1 Akorinto 6:9-11. Avinyaka mutthekule ni ipontu sinttharelana:

• Munoonela hayi waakhanle weera atthu a elapo yootheene anniwelela malamulo a Muluku?a

• Nyuwo munoona weera Yehova onnaanyesereriha atthu wiiwelela malamulo a Omwene awe? Mwaha wa heeni munoonaanyu hiiho?

• Eheeni enoonihera weera atthu ahiniiwelela malamulo a Muluku pooti otxentxa?—Moone eversu 11.

NYAHA SOOTTHUNEYA

Omwene wa Muluku omwene weekhaikhai ori wiirimu onkela olamulela elapo yootheene.

Wuuluula

• Taani ari anamalamulela a Omwene wa Muluku?

• Mwaha wa heeni Omwene wa Muluku oraaya wootepa otthuneya opwaha omwene wa atthu?

• Eheeni Yehova ontthunaawe wa atthu antthuna weerela empari Omwene awe?

WEERA MUSUWELE ITTHU SINTXIPALE

Moone etthu Yesu aahimmaawe voohima as wiirimu iwe oraayawo Omwene wa Muluku.

“Omwene wa Muluku etthu eri va murimani vahu?” (Mwaha va jw.org)

Mwaha wa heeni Anamoona a Yehova anoonaaya okhala wootthuneya okhala oororomeleya ni Omwene wa Muluku opwaha omwene wa atthu?

Wiivaherera okhavihera Omwene wa Muluku (1:43)

Moone ele Biblya onhimaawe voohima sa 144.000 atthu yaawo Yehova aathanlalaawe weera yaalamuleleke ni Yesu.

“Taani ankela wiirimu?” (Mwaha va jw.org)

Eheeni yanvanre murima muthiyana mukadeya woona weera Muluku paahi taneera awere oreherera maxupo ni ohixariya wa elapo ela?

“Waasawaka elapo yookhala exariya” (Despertai!, a Novembro a 2011)

Omwene wa Muluku opatxenre olamulela eyaakha ya 1914, yaari eyaakheene yeeyo, epatxenraaya mahuku oomalihera a olamulelo waatthu. Ninsuwela hayi? Nnoorowa woona ele Biblya onhimaawe voohima sa mwaheene yoola ni itthu heeni sinkhumelela ovinyera eyaakha ya 1914.

1. Biblya aahimme heeni weera yaamweereya?

Eliivuru ya Daniyeli enninikhavihera osuwela weera Omwene wa Muluku waarowa opatxera olamulela okhwipi wa ehuhu yeeyo Biblya oniitthanaawe “ihuhu ithanu ni pili.” (Daniyeli 4:16, 17) Sivinreene iyaakha sintxipale muhoolo mwaya, Yesu aahiitthana ihuhu iyo okhala “okwaniheriwa wa ihuhu sa maloko.” Owo aaxuttiha weera ehuhu eyo khayaakunve ophiya naari neere, khaayaakunve omala. (Luka 21:24) Ihuhu ithanu ni piili saakwanenle eyaakha ya 1914.

2. Itthu heeni sineereya mulaponi ovinyera eyaakha ya 1914?

Oohusera a Yesu yaakoha: “Onlele hiyo lini sinèraya sèreye seiya, ni tho eneneero xeni ya orwa wá ni ya emalihero ya olumwenku?” (Matheyo 24:3) Moota Yesu aakhunlaawe aahima weera, saamukhumelela itthu sintxipale seiyo seera soonihereke weera owo oopatxera olamulela ntoko mwene wiirimu. Itthu ikina aahimmaawe saakela weereya tiiya: Ikhotto, othowa yootxa ni ottikinyeya wa etthaya. (Mmusome Matheyo 24:7.) Nave-tho Biblya aahima mukhalelo atthu yeeraaya ekhaleno “mahiku òmalihera” ni mwaha wa yeeyo, ekumi yaarowa okhala ‘yooxupa ovilela.’ (2 Timotheyo 3:1-5) Ovinyera eyaakha ya 1914, itthu iya sinnaatxeerereya.

3. Mwaha wa heeni Omwene wa Muluku opatxerakaru olamulela itthu sinvirelelaaya oxupa?

Evirakaru mahuku vakhaani Yesu akhanleene mwene a Omwene wa Muluku, owo aawana ekhotto ni Satana vamoha ni mademoniyu awe wiirimu. Satana aaweriwa ekhotto eyo. Biblya oneera: “yàriheliwa vathi velaponi, siso tho antxelo aya yàriheliwa vamosa ni Edrakoni.” (Apokalise 12:9, 10, 12) Satana ori ni oowali otoko-toko mwaha weera oosuwela weera orino ehuhu vakhaani weera anyaanyiwe. Nto mwaha wa yeeyo, owo onnakumihera maxupo mantxipale nto, khahiyono vasiyonvene itthu valaponi sinvirelelaaya oxupa! Mene Omwene wa Muluku onkela omaliha maxupo ootheene ankhumelela.

WEERA MUXUTTERE SINTXIPALE

4. Iprofesiya sa mBiblyani sinhima eyaakha ya 1914

EVIIDIYU: Omwene wa Muluku opatxenre olamulela eyaakha ya 1914 (5:02)

Muluku aamulohiha mwene Nabukhodonosori, a ecidade ya khalayi ya oBabilonia. Mpuwa mwa yooloheene yeela, Yehova aahoonihera etthu yaakela weereya ohoolo. Daniyeli aathaliha etthu yaataphulelaaya yooloha ela, yooloha yaannavariha ni omwene wa Nabukhodonosori ni tho Omwene wa Muluku.—Mmusome Daniyeli 4:17.a

Mmusome Daniyeli 4:20-26. Avinyaka muvarele muteko equaadru ya epaaxina 133 weera mwaakhule makoho anttharelana:

• (A) Nabukhodonosori onne eheeni mpuwa mwa yoolohaawe?—Moone eversu 20 ni 21.

• (B) Eheeni yeera ekhumelele ni mwiri?—Moone eversu 23.

• (C) Eheeni yeera ekhumelele okhwipi wa ihuhu “ithanu ni piili”?—Moone eversu 26.

Heeni yooloha ya mwiri envarihanaaya ni Omwene wa Muluku?

EPROFESIYA (Daniyeli 4:20-36)

Olamulelo

(A) Mwiri woowunnuwa

Waakela ohiya olamulela

(B) “Mùhe mwiri” mpaka ‘ovira ihuhu ithanu ni piili’

Waamutthikela olamulela

(C) “Omwená onotthikiheriwa”

Opatxera okwanela wa eprofesiya ela . . .

• (D) Mwiri ole waathoonyera heeni?—Moone eversu 22.

• (E) HOmwene waahiyerenre olamulela liini?—Mmusome Daniyeli 4:29-33.

• (F) Eheeni yaakhumelenle ni Nabukhodonosori okhwipi wa “ihuhu ithanu ni piili”?—Mmusome Daniyeli 4:34-36.

OPATXERA WAYA OKWANELA EPROFESIYA

Olamulelo

(D) Nabukhodonosori, mwene oBabilonia.

Waakela ohiya olamulela

(E) Evirakaru eyaakha ya 606 A.E.C., Nabukhodonosori onnathatuwa naanepa onahiyerera olamulela moovira ihuhu ithanu ni piili

Waamutthikela olamulela

(F) Nabukhodonosori onnalama ni onnatthikela olamulela veeli

Okwanela wanaaveeli wa eprofesiya ela . . .

• (G) Mwiri ole waathoonyera heeni?—Mmusome 1 Sowereya 29:23.

• (H) Yaahiyerenre olamulela liini? Ninsuwela hayi weera ehuhu Yesu aaraawe valaponi awo khayaalamulela?—Mmusome Luka 21:24.

• (I) Omwene owo opatxenre olamulela liini ni woowiini?

OKWANELA WANAAVEELI WA EPROFESIYA

Olamulelo

(G) Mamwene a wIsrayeli yaathonyera olamulela wa Muluku

Waakela ohiya olamulela

(H) Yerusalemu onnanyanyiwa ni mamwene a wIsrayeli annahiyerera olamulela mwa iyaakha 2.520

Waamutthikela olamulela

(I) Yesu onnapatxera olamulela wiirimu ntoko mwene a Omwene wa Muluku

5. Elapo ya vathi yootxentxa vantxipale ovinyera eyaakha ya 1914

Moone EVIIDIYU.

EVIIDIYU: Omwene wa Muluku opatxenre olamulela eyaakha ya 1914 (1:10)

Yesu areene valaponi aahima itthu saara sikhumeleleke mulaponi owo akhala vale mwene a Omwene wa Muluku. Mmusome Luka 21:9-11. Avinyaka mutthekule ni ipontu sinttharelana:

• Mwa itthu sene seiya, itthu heeni nyuwo munoonaanyu olelo va?

Murummwa Paulo aathaliha moota atthu yaarowaaya okhala mahuku oomalihera a olamulelo wa atthu. Mmusome 2 Timotheyo 3:1-5. Avinyaka mutthekule ni epontu enttharelana:

• Munoonela hayi, neereke atthu a mahuku ene yaala ari ntoko hiihaale murummwa Paulo aahimmaawe?

6. Hiyo nintthuna weera nikhavihereke Omwene wa Muluku

Mmusome Matheyo 24:3, 14, avinyaka mutthekule ni ipontu sinttharelana:

• Muteko heeni wootepa ontthuneya onoonihera weera Omwene wa Muluku onnalamulela?

• Nyuwo munkela weerela hayi empari muteko ola onvariwa?

Omwene wa Muluku onnalamulela nitho nihuku na olamulela elapo ya vathi ninnaattamela. Mmusome Aheberi 10:24, 25. Avinyaka mutthekule ni epontu enttharelana:

• Mutthu ti mutthu a hiyo eheeni aaneeraawe apakeke vaavo ‘onoonaawe nihuku nno naattamelaka’?

NYAHA SOOTTHUNEYA

Iprofesiya sa mBiblyani ni itthu sineereya mulaponi sinnoonihera weera Omwene wa Muluku onnalamulela. Vaavo ninlaleeraahu ni woonela mithukumano, ninoonihera weera nookhalano nroromelo.

Wuuluula

• Liivuru a Daniyeli oothaliha ihuhu ithanu ni piili. Eheeni yaakhumelenle okhwipi wa ehuhu ela?

• Eheeni enoororomelihani weera Omwene wa Muluku opatxenre olamulela eyaakha ya 1914?

• Nyuwo munkela woonihera hayi weera munnaroromela weera Omwene wa Muluku onnalamulela?

WEERA MUSUWELE ITTHU SINTXIPALE

Moone ele anamathaliha sooweereya ni atthu akina anhimaaya voohima sa itthu saakhumelenle valaponi ovinyera eyaakha ya 1914.

“Etempu mweettelo wooreera onananraaya moowaakuveya” (Despertai!, Abril a 2007)

Moone moota eprofesiya ya va Matheyo 24:14 etxentxalaaya ekumi ya mulopwana mmoha.

“Miyo wannakisivela onvonya beisebol ophwaha itthu ikina” (A Sentinela, N.º 3 a 2017)

Ninsuwela hayi weera eprofesiya ya Daniyeli ekapiitulu 4 enhima Omwene wa Muluku?

“Omwene wa Muluku Opacenrye Silini Olamulela? (Mpantta 1)” (A Sentinela, 1.º a Outubro a 2014)

Ninsuwela hayi weera “ihuhu ithanu ni piili” sihimmwale va ekapiitulu 4 ya eliivuru ya Daniyeli saakwanenle eyaakha ya 1914?

“Omwene wa Muluku Opacenrye Silini Olamulela? (Mpantta 2)” (A Sentinela, 1.º a Novembro a 2014)

Omwene wa Muluku onnalamulela wiirimu. Moohipisa, onkela opaka matxentxo valaponi. Nnoorowa woona itthu ikina sooreera Omwene wa Muluku onrowaaya opaka.

1. Moota heeni Omwene wa Muluku onrowa oruhela murettele valaponi?

Yesu, mwene a Omwene wa Muluku, onkela waanyaanya atthu oonanara murima ni anamalamulela aathu mpuwa mwa ekhotto eneeriwa Harmagedoni. (Apokalise 16:14, 16) Ekhotto eyo yeereya, enkela okwanela yoolepa ya mBiblyani yeeyo eneera: “Nlelo, ehuhu vakhaani, ni mutakhali khaphwanyaneya tho.” (Nsalmu 37:10) Moorwela mwa Omwene wa Muluku, Yesu onooruha murettele ni exariya elapo yootheene.—Mmusome Yesaya 11:4.

2. Okumi ahu onrowa okhala moota heeni vaavo yootthuna ya Muluku enkelaaya okwanela

Nkuupuwelani mukhalaka elapo yoohikhala ohaawa, elapo yootheene ekhalaka atthu a xariya ni ooreera murima, ni atthu ootheene esivelanaka ni emusivelaka Yehova! Ti hiiho onrowaaya okhala Omwene wa Muluku, mwaha wooweera “Anaxariya anrowa ohiyeriwa elapo ni okhala wa mahiku othene.” (Nsalmu 37:29) Khaavo aneera avoreiweke, atthu ootheene enkela okhalaka mahuku ootheene.

3. Eheeni Omwene wa Muluku onkelaaya opaka atthu oowuuma murima yanyanyiwa?

Atthu oowumma murima yanyanyiwa, Yesu onrowa olamulela mpuwa mwa iyaakha 1.000. Ovinyera vaavo, owo ni atthu 144.000 anrowa olamulela niyoowo anrowa waakhavihera atthu a elapo yootheene okhala oomalela. Mpuwa mwa iyaakha 1.000, elapo yootheene enkela okhala eparadiso yootepa oreera, ni atthu ootheene anrowa okhala oohakalala mwaha woooweera eneereke wiiwelela malamulo a Muluku. Nto Yesu onrowa ohokoloxera omwene wa Atithawe Yehova. Nsina na Yehova ninkela “ottelihiwa” opwaha khalayi. (Matheyo 6:9, 10) Enkela wooneya weera Yehova toori namalamulela onaapwattha atthu. Yehova onkela omunyaanya Satana, ni mademoniyu ni atthu ootheene anthanla ohimwiiwelela Muluku ni olamulelo awe. (Apokalise 20:7-10) Mwaha wa Omwene wa Muluku, ekumi enrowa okhala yoomalela mmakhaleloni mootheene, etthu eyo, enrowa okhala mahuku ootheene.

WEERA MUXUTTERE SINTXIPALE

4. Omwene wa Muluku onrowa onyaanya ni omaliha imwene saatthu

Biblya oneera: “Vavale mutthu onamulamulaiye mukh’wawe wera amuhoxe.” (Koheleti 8:9) Yehova onrowa ovarela muteko Omwene awe weera amalihe ohixariya wootheene.

Mmusome Daniyeli 2:44 ni 2 Atesalonika 1:6-8. Avinyaka mutthekule ni ipontu sinttharelana:

• Eheeni Yehova ni Yesu enrowaaya waapakela anamalamulela atthu ni ale anikhavihera olamulela owo?

• Muupuwelaka sootheene nyuwo muxuttenraanyu voohima sa Yehova ni Yesu, moota heeni nyuwo muneeraanyu muroromeleke weera othoriha waya onrowa okhala wa xariya?

5. Yesu mwene oomalela

Mwaha wookhala mwene a Omwene wa Muluku, Yesu onkela waapakela itthu sintxipale sooreera atthu a elapo yootheene. Moone EVIIDIYU. Eviidiyu enkela woonihera weera Yesu onitthuna waakhavihera atthu, ni Muluku onvaha owera woopaka eyo.

EVIIDIYU: Yesu aahoonihera etthu Omwene wa Muluku onkelaaya opaka (1:13)

Itthu Yesu aapankaawe ehuhu aaraawe elapo ya vathi, ntakihero na itthu onkelaawe opaka ntoko mwene a Omwene wa Muluku. Neereke mareeliho awo ahimmwale Khamwatthuna weera yaaphiñye vaanano? Musome soolepa sa mBiblyani sinthaliha sa mareeliho awo.

6. Omwene wa Muluku onnanivaha yooweherera yooreera

EVIIDIYU: Moone yoowoonihera emoha ya muholo yooreera (4:38)

Musome Nsalmu 145:16. Avinyaka mutthekule ni epontu entharelana:

• Munoonela hayi osuwela weera Yehova ‘onookwanihera sootthuna sa atthu ootheene’?

NYAHA SOOTTHUNEYA

Omwene onoopaka sootheene Muluku ontthunaawe. Onoorowa okhaliha elapo eparadiso, yoosareya atthu ooreera murima yaawo anrowa omukokhorelaka Yehova mahiku ootheene.

Wuuluula

• Moota heeni Omwene wa Muluku onrowaaya otteeliha nsina na Yehova?

• Mwaha wa heeni ontthuneyaaya ororomela weera Omwene wa Muluku onoorowa okwanihera soolaihera sa mBiblyani?

• Mwa itthu sootheene sooreera Omwene wa Muluku onkelaaya opaka, etthu heeni nyuwo muntthunaanyu weera yeereye?

WEERA MUSUWELA ITTHU SINTXIPALE

Moonelele Harmagedoni ti heeni?

“Ekhotto ya Harmagedoni ti heeni?” (Mwaha va jw.org)

Musome voohima sa ele enkela weereya mpuwa mwa iyaakha 1.000 alamulelaka Yesu. Musome tho voohima sa ele enkela weereya yaavira ehuhu eyo.

“Exeeni Erowa Wiiraneya Nihiku na Ophukeliwa?” (A Sentinela, 1.º a Setembro a 2012)

Moone moota amusi eneeraaya yuupuweleke ereene mparadiso.

Muupuweleke mureene mparadiso (1:50)

Va mwaha oneera “Makoho mantxipale nkaaphwanya waakhuliwa waya moone moota napolitika mmoha oohiiwelela malamulo aaphwannyaawe waakhuliwa makoho awe.

“Biblya onnatxentxa ekumi ya atthu” (A Sentinela, 1.º a Janeiro a 2012)