Omwene wa Muluku onapatxere salini olamulela elapo ya vathi?

ITHOONYERO HEENI YESU AAHIMMA AWE

Yesu ànawèrela yawo eeraka: “muloko mmosá onotuphela muloko mukina, ni omwene mmosá onotuphele omwene mukina, ni vamapuro makina sini sikhale itetere sitokotoko, ikwerere ni etala; sini sòneye wirimu sotikiniha sowopiha ni inenero sitokwene.” (Luka 21:10, 11) Ntoko mahutte anthonyeraya epula, enneereya-tho ni itthu sineereya mahikwaano, sinnithonyera weera “Omwene wa Muluku ori vakhiviru”. Nereke itthu iya sinnakhumelela mulaponi? Moone itthu sineereya mulaponi.

1. IKHOTTO

Ovinyera eyaakha ya 1914 yaakhala ekhotto etokweene ehitonko okhala ovinyera khalayi! Anamathaliha annihima weera ovinyera eyaakha ya 1914 makhalelo a valaponi apittukhuwa, mwaha wooweera ekhotto etokweene yaapatxenre eyaakheene yeele. Saapatxenraya watxeereya ovareliwa muteko itthu ntoko iya: itanqui sa ekhotto; ovonyiwa wa ibomba sowopiha; imetralhadora; agáxi oowiva ni itthu ikina ntoko akapwitthi amooro. Yattharana ni ekhotto ya naaveli etokwene ekhotto yapatxerinhe akapwitthi atokweene. Atthu yaapatxeriha ikhotto mittetthe ni mittetthe sikina ovinyera eyaakha ya 1914, ni ikhotto iya, sowiiva atthu imiliyawu sintxipale.

2. OTTIKINYEYA WA ETTHAYA

Mwa iyaakha sootheene, sineereya itetere soweraka 100, sinanarihaka itthu sintxipale ntoko “danos substanciais” enthaliha encyclopediya Britannica. Miteko sa Geológico sa we Estados Unidos sinnihima seeraka “itthu solempwa sithalihiwe (ovinyera eyaakha ya 1.900). Nave ninnaweherera itetere siniphiyera 16 mwaiyaakha sootheene”. Atthu akina pooti ehimaka nthowanaya, maxi itetere sitokotoko inoovira itepaka watxerereya mulaponi mootheene sitannyeraka ohaawa ni anookhwa antxipale.

3.OTHOWA WA YOOTXA

Mwaha wa ikhotto, ohikhala exariya, othowa woolimawo ohiwehawehiwa nnene muteko woolima, oohirerela mapuro oolima, oxupa wa epula ni waatta wa makare itthu iya sinnitanyera othowa yootxa. Ovinyera eyaakha ya 2018, eprograma enwehaweha sootxa elapo yootheene, “ennakhulela” weera: elapo yootheene atthu amphiyera imiliyawu 821, annavoliwa etala. Nave atthu akina ankwana 124 mil aapwahereraxa ohitxa sootxa soorerela, nto mwaha wa yeeyo enneeriha okhwa anamwane imiliyawu sintxipale iyaakha sootheene. Eyaakha ya 2011 yaakhwa anamwane ophiyera 45% mwa elapo yootheene mwaha woohitxa nnene.

4. IRETTA

Ebuukhu ya mareherero a ekumi ya elapo yootheene, enahima weera: “eseekulu 21 samukhumelela iretta sintxipale ntoko — koolera, praga amarelo, opwexa erutthu, nave sohaatxerereya tho iretta ikina ntoko — SARS, okothomola, MERS, Eebola ni Zika.” Ekhaikhai weera masientista ni mamediko annoonelela iretta sintxipale, mene awo khiyaanono owera woomaliha naari olamiha iretta sootheene.

5. MUTEKO WOOLALEERA ONIVARIWA ELAPO YOOTHEENE

Yesu emaara aarawe elapo ya vathi, aathaliha weera: “Evanjelyo ela ya omwene enelaleiwe elapo yothene ntoko onamona wa amalapo othene. Nomalá enerwe emalihero.” (Matheyo 24:14) Naari elapo yootheene eriki otepa okhumelela itthu soowopiha, atthu anipwaha 8.000 annalaleya mitthenka sooreera sa Omwene wa Muluku ilapo siniphiyera 240 ni evarelaka muteko muulumo aniphiyera 1.000. Etthu yootikiniha mwaha wooweera eyo khenanto okhumelela epattuxiwakaru atthu.

ETHONYERO ELA ENTAPHULELA EHEENI WA HIYO?

Ithonyero seiyo Yesu ahimmawe sinneereya mahikwano. Mwaha wa heeni ontthuneyaya osuwela itthu iyo? Mwaha wooweera Yesu aahimme ha: “Ehuhu munéranyu móne seiyo sikhumelelaka, musuweleke wi omwene wa Muluku ori vakhiviru.” Luka 21: 31.

Ineneero Yesu avanhaawe ni soohimwa sa mBiblyani, sinnanikhavihera wiiwexexa weera okhuma eyaakha ya 1914.a Muluku ootikithera omwene awe wiirimu. Eyaakheene yeeyo Muluku anvara omwene Yesu Kristu. (Nsalmu 2:2, 4,6-9) Omwene wa Muluku wapatxeraru olamulela elapo ya vathi, onrowa onyaanya imwene sikhanle. Nto onootxentxa elapo ela weera ekhale eparadiso, nave weera tho atthu ekhalekemo mahiku ootheene.

Moohipisa masu a nivekelo Yesu axuttinhawe enaasa okwaniheriwa “Omwen’á orwe, otthuna wá opankiwe siso wirimu ntoko vathi vava.” (Matheyo 6:10)Eheeni omwene wa Muluku opankaya okhuma eyaakha ya 1914, opatxenraya olamulela? Ni eheeni nikhanlaahu ooweherera wapatxera olamulela elapo ela ya vathi?