Makoho Empakiwa Ni Ale Ansoma Irevista Sahu

Heeni makristu eekhaikhai antthuneyaaya wiikasoopa yanviyariki imensagem mwa aplikativu?

Asinna akina annavarihela muteko eteknologia weera etthekule ni asinna akina naari amusi aya. Nto makristu oowunnuwa moomunepani entthuneya yuupuweleke miruku iya: “Namiruku sinnamwètta isimu ni onnìpitha, mulolo onnapwaha, amorelaka mmurakhoni.”—Mir. 27:12.

Hiyo noosuwela weera Yehova ontthuna onikasoopa. Mwa yeeyo, hiyo ninneemexera otthekula ni atthu ankumihera okawanyeya, ekumihiwe mmulokoni naari ahiniiwelela ele Biblya onhima awe. (Arom. 16:17; 1 Akor. 5:11; 2 Yoh. 10, 11) Ohiya eyo, pooti weera atthu akina anoonela mithukumano khaaniiwelela malamulo a Yehova. (2 Tim. 2:20, 21) Onoovila waathanla nnene asinthamwenaahu naatthekulakano moorweela mwa mwaapilikatiivuni a imensagem.

Onnatthuneya wiithokorora nneene wakhala weera egrupu ya imensagem yoohaattiwa. Atthu antxipale yaavolonwe igrupu soowaatiwa ntoko iyo khayaakhumelenle nneene. Igrupu soowaattiwaxa khonwereya osuwela mikhalelo soomunepani sa atthu ootheene. Munoona weera mutthu onvolowa igrupu ntoko iyo onnikasoopa? Yoolepa ya Nsalmu 26:4 eneera: “Nkinakilathi vamosá ni alolo nari nkinàtana ni atthu a mirima mili.” Yoolepa ela enoonihera weera mutthu a miruku onnawiiviyarela imensagem yaale paahi aasuwenlaawe nnene sene.

Naamwi igrupu iyo sa imensagem sireene ikhaanene, mukristu ontthuneya wiikoha: Atthu a mugrupuni mmo anuuluma sa heeni? Kimmaliha ihuhu ikavi kinviyariki imensagem ni kitthekulaka ni atthu a mugrupuni mmo? Imensagem iyo pooti wuulumwaka itthu soovirikana, mene nyuwo khontthuneya onyesereriwa weerela empari igrupu iyo. Paulo aamulopola Timotheyo weera atthu yamukhala ‘oowaapa ni oowiivoliihera itthu sa axineene’. (1 Tim. 5:13) Etthu emoharu pooti weereya moorweela mwa eletroniku.

Khaavo mukristu oowunnuwa moomunepani eera amuulumeke moohirerela munna mukina naari ohima isiiri sawe, naari khaapwattha etthu eyo. (Nsal. 15:3; Mir. 20:19) Owo-tho, khaakhala-khala uulumaka naari otthikela sooweereya sootepihiwa naari soohisuweliwa nneene. (Aef. 4:25) Mene mu esaite ahu va jw.org ni iprograma as vamweerini sa JW Broadcasting^® sookhala itthu sintxipale voohima sa Biblya ni soohima inyowani.

Asinna akina ennaavarihela muteko aplikativu a imensagem weera yaakhavihere waavaha muteko naari itthu ikina asinna. Mene itthu iya ti sa nakoso ni khasinvarihana ni omukokhorela wahu Yehova. Vano muKristu ontthuneya okhala “oohinlela musurukhu” nave khankela omwaatxeerera munnawe wakhala weera oomukophiha naari omutumihera etthu.—Aheb. 13:5.

Neereke ti vootthekeya onvarihela muteko Aplikativu oomurumihela imensagem weera nivekele musurukhu weera naakhavihere asinna akina yaawo ephwanyiwe maxupo a ephattu? Ekhaikhai, hiyo ninnatthuna owoonihera nsivelo ni waakhavihera asinna yaawo entthuna nikhavihero. (Yak. 2:15, 16) Mene nto naamwi ntthunaka waakhavihera asinna awo naavarihelaka Aplikativu awo, mene nsuweleke weera pooti oheettihera nnene eFiliyaale naari Muloko wa ele nimpakaahu mwa Aplikativuni mmo. (1 Tim. 5:3, 4, 9, 10, 16) Mene, hiyo khanintthuneya weera noonihere weera noothanleliwa weera naakhavihereke asinna entthuneya okhaviheriwa.

Nto onnatthuneya weera itthu sootheene nimpaka ahu sinvuwiheke Yehova ohiya wiivuwiha asinneenaahu. (1 Akor. 10:31) Mwa yeeyo, nihaakunveene wiithanlela onvarihela muteko aplikativu oomurumihela imensagem naari itekonologia ikina sene, onnatthuneya wuupuwela ele eneera ekhumelele.