Makoho Empakiwa Ni Ale Ansoma Irevista Sahu

Eheeni Yesu aatthunaawe ohima ni masu aneera: “Muhùwelepuwele wi kirwele ovonya murettele”?

Yesu aaxuttiha weera ninnatthuneya okhalano murettele mukina ni mukhwaawe. Mene yookhala etempu aaweerenlawe ha atthareli awe: “Muhùwelepuwele wi kirwele ovonya murettele elapo ya vathi, hoye nkirwenle ovonya murettele, mene [ekatana]. Vetthwitthuni kirwenle ommwalanyiha: mutthu ni atith’awe, ni mwana mwamuthiyana ni amay’awe, òtheliwa ni apwiyamwan’awe.” (Math. 10:34, 35) Eheeni Yesu aatthunaawe ohima ni masu ala?

Yesu kaatthuna okawanya imusi, mene aasuwela weera itthu iyo saamukhumelela mwaha wa ele owo aaxuttihaawe. Ni ale yaarowa othanla okhala mutthareli a Yesu ni obatiziwa yannatthuneya weera esuwele itthu apaale seera saakhumelele mwaha wa yoothanla eyo. Pooti weera amusi khayaarowa osiveliwa ni yoothanla ele ni omukhoottihera otthara sooxuttiha sa Kristu.

Biblya ohima weera nintthuneya weera ‘nikhaleke ni murettele ni atthu ootheene.’ (Arom. 12:18) Mene sooxuttiha sa Yesu pooti okhala ntoko ‘ekatana’ wa imusi ikina. Moota heeni? Eyo pooti weereya wakhala weera mutthu a veemusini onnathanla okhala mukristu, ni atthu akina a vemusini ehinaakhulela—yoothanla eyo ni enakhala—“amwiittani” mwaha wooxuttera ekhaikhai.—Math. 10:36.

Akristu ankhala etthoko yookawanyeya ittiini, pooti oviriha maxupo ooweereriwa nroromelo naya na nsivelo na Yehova ni Yesu. Mwa ntakihero, awo pooti ohaawa mwaha wa onyesereriwa otxa ifesta. Nto awo pooti othanla taani anrowaaya omuhakalaliha. Yesu eenre: “Yowo onàtthuna atithi ni amaye okipwaha miyo, khanakiphwanela miyo.” (Math. 10:37) Ekhaikhai weera Yesu khaiyene aakhoottihera ooxutteraawe waasiwela amusi aya. Ekhaikhai ti yoowera Yesu aatthuna waaxuttiha ooxutteraawe etthu antthunaaya ohela nipuro noopatxera mweekumini mwaya. Wakhala weera amusi ahu annanikhoottihera onvarela muteko Yehova, hiyo nivireleleke waasivela. Mene omusivela wahu Muluku ontthuneya weera okhaleke nipuro noopatxera mweekumini mwahu.

Mweekhaikhai pooti okhala wooxupa ovilela osonttiwa ni amusi. Naari vareene hiiho, atthareli a Yesu annatthuneya wuupuwelela masu aneera: “Yole ohinakapatta mwiraawe anakitthara ottuli waka, khanakiphwanela miyo.” (Math. 10:38) Ni masu makina, akristu anviriha maxupo a osonttiwa ni amusi aya, annaiwexexa weera maxupo aya anneerela eparte maxupo yaarowa waaphwanyaka ale ammutthara Yesu. Nave emaara emoharu, ninnaaweherera amusi awo weera etxentxe moonelo aya, yoonaka ntakihero nahu nooreera ni muhoolo exuttere ekhaikhai.—1 Ped. 3:1, 2.