Samuweli a Nenli

17 Ahitofeli aahimuhimeerya Absalomi wiira: “Xontte, mukihiye kaathanle alopwana 12.000 wiira kimoomole Davidi ohiyu yoola. 2 Kinoomutuphela okhulumunwe ene ni ooceyale ene.+ Nave kinoomututuxerya, nto okathi atthu ootheene anrowa aya omutthyawa, kinoomwiiva mwene paahi.+ 3 Nuumala-vo, kinimooruuhelani atthu ootheene. Vakhala wiira mulopwana onimwaavya anyu onimookhwa, atthu ootheene animootthikelani ni anookhalana murettele”. 4 Miruku iye saahimusivela Absalomi ni makhulupale ootheene a wIsarayeli.

5 Masi, Absalomi aahihimya wiira: “Xontte iihaniwe Huxayi+ a wAriki, wiira nimwiiwe etthu enrowa awe onileela”. 6 Nto, Huxayi aahirowa wa Absalomi. Vano Absalomi aahimuhimeerya wiira: “Iya miruku Ahitofeli ovanhe awe. Nitthareke miruku sawe? Sahaakhalenle munileele”. 7 Siiso, Huxayi aahimuhimeerya Absalomi wiira: “Ekwaha ela, miruku Ahitofeli ovanhe awe khasilonke!”+

8 Huxayi aahihimya-tho wiira: “Nyuwo moosuwela wiira paapa anyu ni anakhotto awe toowerya,+ nave aananariwa vanceene ntoko mwaamunama oniihaniwa ursu orimeeliwe anaawe mutakhwani.+ Ohiya-vo, paapa anyu nakhotto ootupa,+ nave khonrowa okhala ni atthu ohiyu ola. 9 Okathi ola paapa anyu ohiipitha munikhukuni* aahiiso opuro mukina.+ Akhala wiira onoopacerya onituphela, ale anrowa wiiwa eyo anoohimya wiira: ‘Atthu yaamukhaliherya Absalomi aaxinttiwa!’ 10 Hata mutthu oolipa murima ntoko kharamu+ moohaanyiherya onoothukumela ni woova, okhala wiira aisarayeli ootheene annisuwela wiira paapa anyu mulopwana oowerya,+ nave anakhotto awe toolipa murima. 11 Miruku saka tiiya: Mwaathukumanye alopwana ootheene a Isarayeli, okhuma oDani mpakha oBeri-Xeba,+ ekhale oowaatta ntoko mihaava sa mphareya+ nave nyuwo mwaahooleleke okhottoni. 12 Hiyo ninrowa omutuphela khula opuro onrowa awe okhala, nave ninrowa omutuphela ni anakhotto oowaatta ntoko okame onimorela vatthayani, nto khuuvo onrowa woopowa, nnakhala owo hata anakhotto awe. 13 Vakhala wiira onrowa wiipitha epooma emosa, hiyo ni aisarayeli ootheene nnoopwetexa epooma eyo, nave nnoopurula ni mikhoyi, maluku a epooma eyo mpakha omuro. Khaninrowa ohala nnakhala nluku nimosa naamukhaani mpooma-mmo”.

14 Moottharelana, Absalomi ni alopwana ootheene a Isarayeli yaahihimya wiira: “Miruku sa Huxayi a wAriki ti sootepa oreera,+ ovikana miruku sa Ahitofeli! Tthiri Yehova aahilakela* ohonona miruku sa Ahitofeli”.+ Yehova aahipaka eyo wiira omukumiherye ehasara Absalomi.+

15 Muhoolo mwaya, Huxayi aahaaleela anamukuttho, Sadoki ni Abiyatari+ oriki: “Ahitofeli onvaha miruku iya Absalomi ni makhulupale a wIsarayeli, nto miyo konvaha miruku iya. 16 Vano, mwaakuveke, mwaarume atthu yamuleele Davidi wiira: ‘Ohiyu ola muhikhale mapuro anilapuwa aya atthu* waattamela woothakoni, ohiya-vo, mulapuwe muro, wiira mwene ni atthu awe ahiiviwe’”.+

17 Yonathani+ ni Ahimaasi+ yaahanle wEni-Rogeli.+ Nto murumeyi muthiyana aahirowa waaleela, vano awo yaahirowa omuleela mwene Davidi, okhala wiira yaanoova wooniwa akelaka mpooma. 18 Masi, mmiravo mmosa aahaaweha, onarowa omuleela Absalomi. Nto oowanli aya yaahikhuma vowaakuveya arowa owannyawe mulopwana mmosa a oBahurimi,+ yoowo arina ehime vate vawe. Alopwana awo yaahikela mweehimeni-mmo. 19 Vano, mwaarawe mulopwana ole aahikhuneela ehime eyo ni ekuwo, aaneya ephepa ya etiriku vasulu vaya. Nto khuuvo aasuwela etthu ele. 20 Arumeyi awe Absalomi yaahirowa owannyawe muthiyana ole anamukoha wiira: “Ahimaasi ni Yonathani ari vaava?” Muthiyana owo aahiwaakhula oriki: “Avinre vaava arowaka omuro”.+ Moottharelana alopwana awo yaahirowa owaavya, masi khiyaaphwannye, nuumala-vo yaahitthikela oYerusalemu.

21 Nuumala alopwana ale orowa, oowanli aya yaahikhuma mweehimeni-mme anarowa omuleela mwene Davidi miruku Ahitofeli aavanhe awe wiira otupheliwe. Awo yaahihimya wiira: “Mwaakuveke, nvenye, mulapuwe muro”.+ 22 Moowaakuveya Davidi ni atthu ootheene arina awe, yaahivenya alapuwa muro Yordani. Oxaka, atthu ootheene yiira alapuwale ene muro Yordani.

23 Okathi Ahitofeli aawenhe awe wiira miruku sawe khisaatthariwe, aahimulokiherya puuru awe onarowa owannyawe, epooma awe.+ Vaaphiyale awe aahaavaha malakiheryo atthu a etthoko awe,+ nuumala-vo aahiihopha.+ Siiso Ahitofeli aahikhwa, ovithiwa mahiye a amuhavinre awe.

24 Vano, Davidi aahirowa oMahanayimi,+ nave Absalomi aahilapuwa muro Yordani ni alopwana ootheene a Isarayeli. 25 Absalomi aahimuhela Amasa+ nipuro na Yowabi+ wiira aahooleleke anakhotto. Amasa aari mwaana a mulopwana a wIsarayeli iihaniwa Itira, yoowo aarumpe ni Abigayili+ mwaana a Nahaxi, murokorawe Seruwiya, maama awe Yowabi. 26 Absalomi ni atthu a Isarayeli yaahimaka elapo ya oXileyaadi.+

27 Davidi ophiyaka-ru oMahanayimi, Xobi mwaana a Nahaxi, a oRaba+ wa atthu a wAmoni, ni Makiri+ mwaana a Amiyeli a oLo-Debari, ni Barizilayi+ muxileyaadi a oRogelimi, 28 yaahiruuha ikhaama, ipasiya, miyaapu, etiriku, esevaata, otthu,* ipyo soowaarikiwa, namakotto, lentiilya,* ipyo soowuumihiwa, 29 oravo, manteeka, ipwittipwitthi, ni ekeexo. Awo yaahimuruuhela itthu iya sootheene Davidi ni atthu aarina awe wiira alye,+ maana yaanihimya wiira: “Atthu aavoliwa etala, ntthona, nave aakhulumuwa woothakoni”.+