Samuweli a Nenli
7 Mwene aahikhala owannyawe,*+ nave Yehova ahinvaha murettele omwaakiheryaka awanani awe ootheene. 2 Vano mwene aahimuhimeerya profeta Natani+ wiira: “Miyo kinikhala empa etekiwe ni matera a eseeturu,+ vano Nivuku na Nivarihano na Muluku eekeekhai nri mutentani”.*+ 3 Natani aahimwaakhula mwene oriki: “Muroweke, mwapakeke ele eniphavela murima anyu, okhala wiira Yehova ori ni nyuwo”.+
4 Ohiyu ene yoole, Yehova aahimuleela Natani wiira: 5 “Murowe mwamuleele murumeyi aka Davidi wiira: ‘Etthu onihimya awe Yehova, tiila: “Kiireke nyuwo munookitekela empa wiira kikhaleke?+ 6 Nkinakhale mpaani okhuma nihiku kaakuminhe aka atthu a Isarayeli wExiitu mpakha olelo,+ masi okathi kinithaama aka, kinikhala mutentani ni mutentani mwa muthukumano.+ 7 Okathi wootheene kaari aka ni aisarayeli* ootheene, nkitonko omukoha nnakhala muhooleli mmosa a mahimo a atthu a Isarayeli, yoowo kimuthanlale aka wiira oweettiheke atthu aka aisarayeli, kiriki: ‘Xeeni muhikitekenle anyu empa ya miri siniihaniwa eseeturu?’”’* 8 Vano mwamuleele murumeyi aka Davidi wiira: ‘Etthu onihimya awe Yehova a anakhotto, tiila: “Miyo kihookumihani opuro mwaari anyu makampusi, weiwo mwaakhapelela anyu ipwittipwitthi+ wiira mukhale muhooleli a atthu aka aisarayeli.+ 9 Nave kinrowa okhala ni nyuwo opuro wootheene munrowa anyu,+ ni kinimwaamala-maliha* awanani anyu ohoolo wanyu,+ nsina nanyu kinookhaliha nuulupale+ ntoko masina a mamwene a mulaponi. 10 Kinimwaathanlela atthu aka aisarayeli opuro wiira akhaleke-mo, awo anrowa okhalaka memmo, nave khuuvo onrowa waahaaxaka. Atthu ootakhala khanrowa-tho waapuherya ntoko yiira aya khalai,+ 11 okhuma nihiku kaathanlale aka makhulupale+ wiira yaalamuleleke atthu aka aisarayeli. Kinimoovahani murettele kiwaakiheryakani awanani anyu ootheene.+
“‘“Nave, Yehova ohooleelani wiira Yehova onimootekelani empa.+ 12 Vanrowa aya omala mahiku anyu,+ okathi munrowa anyu omumula ni amuhavinre anyu, kinookumiherya osuulu anyu, eyo piiyo, mwaninyu. Miyo kinoolipiha omwene awe.+ 13 Owo tonrowa oteka empa enrowa ovuwiha nsina naka,+ nave miyo kinoolipiha ehice ya omwene awe mahiku ootheene.+ 14 Miyo kinookhala paapa awe, nave owo onrowa okhala mwanaka.+ Apaka etthu yoohiloka, kinoomuttaruxa ni ekopo ya atthu, nave kinommana ni ekopo ya anamwane a apinaatamu.*+ 15 Nkinrowa ohiya omooniherya ophenta waka woororomeleya ntoko kaahiyale aka omooniherya Sawuli,+ yoowo kaamoomonle aka ohoolo wanyu. 16 Etthoko anyu ni omwene anyu onrowa okhalaka woovareleleya mahiku ootheene eriyari anyu. Ehice anyu enrowa okhala yoolipihiwa mahiku ootheene”’”.+
17 Natani aahimuleela Davidi moolumo ootheene ni itthu sootheene ooniheriwe awe ni Muluku.+
18 Mwene Davidi aahikilaathi ohoolo wa Yehova onamukoha oriki: “Khoo Pwiya Muulupalexa Yehova, miyo ka pani? Nave amusi* aka pani, wiira mukivuwihe siisa?+ 19 Pwiya Muulupalexa Yehova, nyuwo mwaahoona wiira itthu iya nlelo saari vakhaani, nave munnihimya wiira etthoko ya murumeyi anyu enrowa okhalaka mahiku manceene ohoolo. Pwiya Muulupalexa Yehova, nla nlamulo na apinaatamu ootheene. 20 Pwiya Muulupalexa Yehova, exeeni miyo murumeyi anyu Davidi kikhanle aka oowoohimeeryani? Nyuwo munnikisuwela saana.+ 21 Mwaha wa moolumo anyu, moovarihana ni ele eniphavela anyu, moopaka itthu suulupale, nave moomusuweliha itthu iyo murumeyi anyu.+ 22 Tivonto muri anyu muulupalexa,+ nyuwo Pwiya Muulupalexa Yehova. Khuuvo onlikana ni nyuwo,+ nave khuuvo Muluku muhikhanle nyuwo.+ Itthu sootheene niiwale ahu ni maaru ahu ala, sihooniherya eyo. 23 Nloko xeeni mulaponi ninlikana ni atthu anyu aisarayeli?+ Muluku oowoopola atthu awe,+ osuwelihaka nsina nawe+ mwaha woopaka itthu suulupale ni soowoopiha wiira aaphwanyihe mureerelo.+ Moowoomola atthu a maloko makina ni amuluku aya, mwaha wa atthu anyu, yaawo nwooponle anyu wExiitu. 24 Nyuwo muhaakhaliha atthu a Isarayeli ntoko atthu anyu mahiku ootheene.+ Nave nyuwo Yehova, mwa Muluku aya.+
25 “Vano, khoo Yehova Muluku, mmaliherye itthu mmuleihenrye anyu murumeyi anyu ni atthu a etthoko awe mahiku ootheene. Nave mwiire siiso ntoko muleihenrye anyu.+ 26 Nsina nanyu nivuwihiwe mahiku ootheene+ wiira atthu ahimyeke wiira: ‘Yehova a anakhotto, Muluku onaalamulela aisarayeli’, ni wiira etthoko ya murumeyi anyu Davidi elipihiwe ohoolo wanyu.+ 27 Tivonto, nyuwo Yehova a anakhotto, Muluku a Isarayeli, muhiixooniherya wa murumeyi anyu muriki: ‘Kinimootekelani empa’.+ Ti nthowa naya murumeyi anyu olimpe awe murima oovekelakani siisa. 28 Nyuwo Pwiya Muulupalexa Yehova, mwa Muluku eekeekhai, nave moolumo anyu teekeekhai,+ moomuleiherya murumeyi anyu itthu iya sooloka. 29 Mwiire ntoko muniphavela anyu mureelihaka etthoko ya murumeyi anyu, wiira ekhaleke mahiku ootheene ohoolo wanyu.+ Nyuwo Pwiya Muulupalexa Yehova, mooleiherya wiira etthoko ya murumeyi anyu, enimwaakhela mareeliho anyu mahiku ootheene”.+