Esteri

7 Siiso, mwene ni Hamani+ yaahirowa opuro pwiyamwene Esteri aalokihenrye awe yoolya. 2 Nihiku na nenli, okathi yaawurya aya eviinyu, mwene aahimukoha-tho Esteri wiira: “Pwiyamwene Esteri, exeeni muniphavela anyu? Miyo kinimoovahani. Muniphavela oveka exeeni? Hata nimeya na omwene aka, miyo kinimoovahani!”+ 3 Pwiyamwene Esteri aahaakhula wiira: “Mwene eemererya ni oona oreerela, kinveka wiira kihiiviwe, nave kiniphavela wiira yoopoliwe atthu aka.+ 4 Tthiri miyo ni atthu aka nootumihiwa+ wiira nimala-malihiwe, niiviwe ni nipwetexiwe.+ Vaakhanle wiira nitumihiwe wiira nikhale ipottha soolopwana ni soothiyana, miyo nkaarowa olavula etthu. Masi ehasara ela eheemereriwe, okhala wiira enoomukumiherya mixankiho mwene”.

5 Moottharelana, mwene Asuwero aahimukoha pwiyamwene Esteri wiira: “Ti pani opanke etthu eyo? Ori vai mulopwana uupuwenle opaka etthu siisa?” 6 Esteri aahaakhula wiira: “Nwanani ahu ti mulopwana ola ootakhala Hamani”.

Nto Hamani aahimoova vanceene mwene ni pwiyamwene. 7 Mwene aahivenya onanariwe ene, okhuma opuro ole waawuriwa eviinyu, onarowa oxarti wa opalaasio. Masi Hamani aaheemela, onamuxonttela pwiyamwene Esteri wiira ohiiviwe, okhala wiira aahisuwela wiira mwene ammuhukhumu. 8 Mwene aahitthika oxarti wa opalaasio otthikelaka empa yaawuriwa eviinyu, omoona Hamani omorenle ene ekhatera yooreera yeeyo aari awe Esteri. Mwene aahikoha wiira: “Niireke omphavela omutuphela pwiyamwene vatthokoni vaka vaava?” Nuumala mwene olavula moolumo ala, Hamani aahikhuneeliwa owiitho. 9 Haribona,+ mukhulupale mmosa a etthoko ya mwene, aahihimya wiira: “Nave-tho Hamani oolokiherya mwiri para Mordekayi,+ mulopwana yoowo ooponle okumi wa mwene ni itthu aahimmye awe.+ Mwiri owo weemexiwe owannyawe Hamani, nave orina imeeturu 22* orakamela wawe osulu”. Nuumala-vo, mwene aahihimya wiira: “Othomeiwe vaavo Hamani”. 10 Siiso, Hamani aahithomeiwa vamwirini aalokihenrye awe para Mordekayi, nto mwene waahimmalela onanariwa wawe.