Isaalimu

136 Mmuxukhureleke Yehova, okhala wiira owo tooreera murima;+

Ophenta wawe woororomeleya onikhala mahiku ootheene.+

 2 Mmuxukhureleke Muluku a amuluku,+

Okhala wiira ophenta wawe woororomeleya, onikhala mahiku ootheene.

 3 Mmuxukhureleke Pwiya a mapwiya,

Okhala wiira ophenta wawe woororomeleya, onikhala mahiku ootheene.

 4 Owo paahi tonipaka itthu suulupale sootikiniha,+

Okhala wiira ophenta wawe woororomeleya, onikhala mahiku ootheene.+

 5 Owo oopaka erimu ni ankhili,+

Okhala wiira ophenta wawe woororomeleya, onikhala mahiku ootheene.

 6 Ohaatala elapo vasulu va maasi,+

Okhala wiira ophenta wawe woororomeleya, onikhala mahiku ootheene.

 7 Oopattuxa mithuko suulupale,+

Okhala wiira ophenta wawe woororomeleya, onikhala mahiku ootheene.

 8 Oopaka nsuwa wiira nimwaleeleke othana,+

Okhala wiira ophenta wawe woororomeleya, onikhala mahiku ootheene.

 9 Oopaka mweeri ni itheneeri wiira simwaleeleke ohiyu,+

Okhala wiira ophenta wawe woororomeleya, onikhala mahiku ootheene.

10 Owo aahiwiiva anamwane oopacerya oyariwa, ni inama soopacerya ototholiwa sa wExiitu,+

Okhala wiira ophenta wawe woororomeleya, onikhala mahiku ootheene.

11 Aahaakumiha aisarayeli wExiitu,+

Okhala wiira ophenta wawe woororomeleya, onikhala mahiku ootheene,

12 Aahaakumiha ni ntata nawe na ikuru+ ni ookonle ene moono awe,

Okhala wiira ophenta wawe woororomeleya, onikhala mahiku ootheene.

13 Owo aahikawanya ephareya Yooxeerya, khukhala mipantta miili,+

Okhala wiira ophenta wawe woororomeleya, onikhala mahiku ootheene.

14 Aahiwiiriha aisarayeli ovira eriyari ya ephareya eyo,+

Okhala wiira ophenta wawe woororomeleya, onikhala mahiku ootheene.

15 Aahimurihela Farawo ni anakhotto awe mphareya Yooxeerya,+

Okhala wiira ophenta wawe woororomeleya, onikhala mahiku ootheene.

16 Aahiweettiha atthu awe moothakoni,+

Okhala wiira ophenta wawe woororomeleya, onikhala mahiku ootheene.

17 Aahaaxintta mamwene oowerya,+

Okhala wiira ophenta wawe woororomeleya, onikhala mahiku ootheene.

18 Aahiwiiva mamwene oowerya,

Okhala wiira ophenta wawe woororomeleya, onikhala mahiku ootheene.

19 Aahimwiiva Sihoni,+ mwene a amori,

Okhala wiira ophenta wawe woororomeleya, onikhala mahiku ootheene.

20 Nave aahimwiiva Oogi,+ mwene a oBaxani,

Okhala wiira ophenta wawe woororomeleya, onikhala mahiku ootheene.

21 Aahaavaha elapo aya atthu awe, wiira ekhale yawaya,+

Okhala wiira ophenta wawe woororomeleya, onikhala mahiku ootheene.

22 Aahaavaha arumeyi awe aisarayeli wiira ekhale yawaya,

Okhala wiira ophenta wawe woororomeleya, onikhala mahiku ootheene.

23 Aahinuupuwela okathi naahaaxiwa ahu,*+

Okhala wiira ophenta wawe woororomeleya, onikhala mahiku ootheene.+

24 Owo aahinoopola mmatatani mwa awanani ahu,+

Okhala wiira ophenta wawe woororomeleya, onikhala mahiku ootheene.

25 Onnaavaha eyoolya atthu ootheene ni onnivaha yoolya inama sootheene,+

Okhala wiira ophenta wawe woororomeleya, onikhala mahiku ootheene.

26 Mmuxukhureleke Muluku a wiirimu,

Okhala wiira ophenta wawe woororomeleya, onikhala mahiku ootheene.