Yesaya
1 Mahiku a Oziya,+ Yotami,+ Akhazi,+ ni Ezekiya,+ mamwene a oYuda,+ Muluku aahimooniha etthu Yesaya*+ mwaana a Amozi. Etthu eyo, enilavula sa itthu sinrowa wiiraneya oYuda ni oYerusalemu. Etthu ene tiila:
2 Nyuwo erimu, nwiriyane! Nave nyuwo elapo,+ nwiriyane oratteene,
Okhala wiira Yehova oolavula wiira:
3 Epooyi ennimusuwela ole othumme,
Puuru onnimusuwela pwiya awe oninvaha yoolya,
Masi aisarayeli khanikisuwela,*+
Atthu aka khanipaka itthu ni ankhili”.
4 Mootakhaliwa nyuwo nloko na anatampi,+
Atthu aniteexa itampi,
Nloko nootakhala, ni anamwane ootakhala murima!
5 Muhinrowa ovahiwa sai ehukhumu, nlelo mutepaka omurukunuwela?+
Muru anyu wootheene onniwereiwa,
Nave murima anyu wootheene onniwereiwa.+
6 Okhuma munawuni mpakha mmuru, khiivo elonke.
Erutthu anyu yoovulala, yookhalana makuma, ni makhwatta,
Kharapihiwe, khatthukiwe, nnakhala khaheliwe makhura.+
7 Elapo anyu yoohononeya.
Ipooma sanyu, soopahiwa ni mooro.
Atthu a ilapo sikina annoolya ohoolo wanyu, mihokorokho sa mmatta mwanyu.+
Eri ntoko elapo epwetexiwe ni awanani.+
8 Epooma ya oSiyoni, ehanle ntoko muxaxa ori ematta ya ewuuva,
Ntoko muxaxa ori ematta ya muxiri,
Ntoko epooma erukureriwe ni awanani.+
9 Vaakhanle wiira Yehova a anakhotto khonihiyenrye atthu vakhaani yooponwe,
Naarowa okhalaka ntoko epooma ya oSodoma,
Ni naarowa olikanaka ni epooma ya oGomora.+
10 Nwiriyane moolumo a Yehova, nyuwo anamalamulela a oSodoma.+
Nwiriyane oratteene nlamulo na* Muluku ahu, nyuwo atthu a oGomora.+
11 Yehova onihimya wiira: “Exeeni kiniphwanya aka ni mikuttho sanyu sinceene?”+
“Sookiphweela soovaha sanyu para opahiwa sa ipwittipwitthi*+ ni ekortuura ya axinama akina,+
Nave nkiniphavela ephome+ ya ipooyi saamukhaani soolopwana,+ ni ya ipwittipwitthi ni ya ipuri.+
12 Munrwa ohoolo waka,+
Ti pani oorummeni?
Ti pani oorummeni onyakela vate vaka?+
13 Muhitthikele-tho oruuha soovaha sanyu sa ipyo, sihirina efaita.
Nyuwo munnipaka ifesta sa wooneya wa mweeri musya,+ sa isaabadu,+ ni muthukumano munihimya anyu okhala akonkereesu.+
Miyo okinanara itthu munipaka anyu murumeelaka maxintta,+ munaphitaanya ni mithukumano iyo munoona anyu okhala sa efaita.
14 Miyo kinninyokha ifesta munipaka anyu woopaceryani wa mweeri, ni ifesta sanyu sikina.
Ifesta iyo sookiphweela.
Miyo okinanara ifesta iyo.
15 Okathi muniteexerya anyu osulu matata anyu,
Miyo kinniipithiha maitho aka.+
16 Mwiirapihe, mwiireerihe,+
Nvenxe ohoolo waka itthu sootakhala muniira anyu;
Muhiye ovara itthu sootakhala.+
17 Mwiixutteke opaka itthu sooreera, mphaveleke exariya,+
Mmuttaruxe mutthu onaahaaxa akhwaawe,
Mwaakiheryeke itireitu sa mwaana ohirina apapawe,*
Nave mwaakiheryeke itireitu sa muthiyana naamukhweli”.+
18 Yehova onihimya so:+ “Murwe nivaanele. Miyo kinimookhaliheryani ottikiherya waataana wahu”.
“Hata itampi sanyu siri ene sooxeerya ntoko ephome,
Iyo sinookhalihiwa sootteela;+
Hata siri ene sooxeerya ntoko ekottokhwa,
Iyo sinookhala sootteela ntoko nxotte.
19 Akhala wiira nyuwo munookiiwelelaka,
Munrowa olya itthu sooreera sa elapo ela.+
20 Masi, akhala wiira munookhootta okiiwelela ni munookirukunuwela,
Munrowa opwetexiwa ni espaata,*+
Ti miyo Yehova kilavunle eyo”.
21 Moota xeeni epooma yaari yoororomeleya wa Muluku,+ ekhanle aya namararuwa?+
Yaari yoosareya atthu yaavara itthu sooreera,+
Epooma eyo yaahikhala-mo exariya,+
Masi vano enikhaliwa ni anawiive.+
23 Makhulupale anyu toowiixinnuwiha ni apatthani a alatarau.+
Khula mmosa a yaawo, omusivela okunyariwa ni ovahiwa itthu.+
Awo khaniwiirela exariya anamwane ahirina paapa aya,*
Nave khaniphavela-tho ophuka mulattu wa muthiyana naamukhweli.+
24 Tivonto, Pwiya eekeekhai, Yehova a anakhotto,
Muluku Oowerya a Isarayeli, onihimya wiira:
“Nwiriyane! Kinrowa wiixaakiha awanani aka,
Nave, kinrowa owunlela ikuhu awanani aka.+
25 Kinrowa woovahani ehukhumu,
Kinrowa wooreerihani,*
Nave kinoovenxa wa nyuwo itthu sootheene soohiloka.+
26 Kinrowa woottikiheryani alipa-oophuka milattu, ntoko saari aya khalai,
Ni atthu anrowa woovahakani miruku, wiira vakhale ntoko woopaceryani.+
Nuumala-vo, nyuwo munrowa wiitthaniwaka okhala Epooma ya Xariya, Epooma Yoororomeleya.+
27 OSiyoni onimoopoliwa+ ni exariya;
Nave atthu awe atthinke mwaha wa exariya ya Muluku.
28 Atthu oohiiwelela ni anatampi anrowa opwetexiwa hoothe,+
Nave ale amuhiyale Yehova, anoopwetexiwa.+
29 Awo animuuliwa muru mwaha woowi nyuwo mookokhorela ilatarato vathi va miri suulupale mwaaphavela anyu,+
Nave vathi va ixarti muthanlale anyu.+
30 Nyuwo munrowa olikanaka ni mwiri muulupale, yoowo makukhu aya aninyaala,+
Nave munrowa okhalaka ntoko exarti ehirina maasi.
31 Mutthu oowerya, onookhala ntoko malaxi oowuuma.*
Nave muteko awe onrowa okhalaka ntoko mooro;
Iyo sinoopahiwa vamosa,
Nto khuuvo onrowa owerya ottipiherya”.