Yoona
4 Masi etthu eyo khiyaamusivenle Yoona, nave yaahimunanara vanceene. 2 Vano aahinvekela Yehova ohimyaka so: “Khoo Yehova, khahiyo ti yeela yaakixankiha okathi kaari aka elapo aka? Tivo keerenrye aka otthyawela oTaarisi+ ekwaha yoopacerya, okhala wiira kaanisuwela wiira nyuwo mwa Muluku onoona othunku ni oomoriwa ikharari, oopisa onanariwa ni onooniherya vanceene ophenta woororomeleya+ ni oniriipiwa murima okathi enikhumelela aya ehasara. 3 Vano, xontte Yehova, mukihiye kikhweeke. Fataari okhwa ohiya okhala mukumi”.+
4 Yehova aahimukoha wiira: “Exeeni eniwiirihani onanariwa vanceene?”
5 Yoona aahikhuma epooma ele orowa okilaathi mpantta onikhuma nsuwa wa epooma ele. Owo aahipaka muxaxa okilaathi vamuuttutthini vaya wiira oweheke etthu yaarowa okhumelela epooma ele.+ 6 Yehova Muluku aahimeliha muraapela opuro aari awe Yoona, wunnuwa mpakha okhala muuttutthi vasulu vawe, wiira ovukule ohaawa wawe. Nto Yoona aahitteeliwa murima vanceene mwaha wa muraapela owo.
7 Nto mmeeloni mwaya nuumala nsuwa okhuma, Muluku eekeekhai aahimuruma mwaamukokho okhuura muraapela owo, vano muraapela owo aahuuma. 8 Okathi nsuwa naapacenrye aya waarya, Muluku aahikumiherya epheyo yooviha yaakhuma mpantta onikhuma nsuwa, vano nsuwa naanimpaha vanceene Yoona vamuru, onahala vakhaani otiximayari.* Owo aanivekela okhwa ohimyaka so: “Fataari kikhweeke ohiya okhala mukumi”.+
9 Muluku aahimukoha Yoona wiira: “Exeeni eniwiirihani onanariwa vanceene ni muraapela owo?”+
Vano Yoona aahaakhula wiira: “Kookhalana etireitu yoonanariwa, onanariwa vanceene mpakha kinaphavela okhwa”. 10 Masi Yehova aahimwaakhula wiira: “Nyuwo munikhupanyerya muraapela owo, muhaalale anyu nnakhala muhiirinhe anyu wunnuwa, yoowo wunnunwe ohiyu omosa onakhwa ohiyu mukina. 11 Nto miyo nkaakhanle oomorela ikharari oNiinive, epooma yuulupale,+ weiwo onikhala aya atthu anivikana 120.000 ahinsuwela ohiyaniha etthu yooloka ni etthu yootakhala, nave weiwo sikhanle inama sinceene?”+