Mikeya
4 Mahiku ookiserya,
Mwaako eri aya empa ya Yehova,+
Onrowa okhala woorakama ovikana miyaako sikina ni onrowa olipihiwa saana.
Owo onrowa okhala woorakama ovikana mattumuxa,
Nto atthu a maloko ootheene, anoorowaka vaavo.+
2 Nave, atthu a maloko manceene anoorowaka ahimyeke wiira:
“Murwe, nawele vamwaako va Yehova,
Empa ya Muluku a Yakobe.+
Owo onrowa oniixuttiha iphiro sawe,
Nave hiyo nnimweettaka mphironi mwawe”.
Nlamulo na Muluku nnoolaleiwa* okhuma oSiyoni,
Nave nuulumo na Yehova nnoolaleiwa okhuma oYerusalemu.
3 Muluku onrowa okhala mulipa-oophuka milattu sa atthu anceene,+
Nave onrowa olokiherya myaha sinivarihana ni maloko oowerya a ottaiwene.
Nloko nimosa khaninrowa orumeela espaata wiira niwane ni nloko nikina,
Nave-tho, atthu awo khanrowa wiixuttihiwa owana ekhotto.+
4 Khula mmosa a yaawo onookilaathi* vamuuttutthini wa mwiri awe wa ewuuva ni wa efiiku,+
Nave khuuvo mutthu onrowa owoopopihaka,+
Okhala wiira Yehova a anakhotto* tohimmye.
5 Atthu ootheene anrowa omwiiwelelaka muluku aya,
Masi hiyo ninrowa omwiiwelelaka Yehova Muluku ahu+ mahiku ootheene.
6 Yehova onihimya wiira: “Nihiku nlo,
“Kinimwaathukumanya ale yaatuthunya,
Nave kinimwaathukumanya ale yaamwara-mwareyale,+
Vamosa ni ale kaahukhummu aka.
7 Kinimwaapenuxa* ale yaatuthunya,+
Ale yaaroihiwe ottaiwene kinimwaakhaliha nloko noowerya,+
Nave Yehova onimwaalamulelaka ntoko mwene aya omwaako Siyoni,
Okhuma olelo-va mpakha mahiku ootheene.
8 Vano nyuwo, empa yoorakamela osulu yoolipihiwa enikhapelela ipwittipwitthi,
Mwaako wa mwaana mwaamuthiyana a oSiyoni,+
Owerya woopacerya onootthika, tthiri onimootthikelani,+
Omwene wa mwaana mwaamuthiyana a oYerusalemu.+
9 Vano xeeni munikhuwela anyu?
Khamurina mwene?
Mulipa onoovahani miruku orimookhwa?
Niireke ti yeeyo eniwiirihani woona owereya ntoko muthiyana oniyara?+
10 Nyuwo mwaana mwaamuthiyana a oSiyoni, mootoroweke ni mwiipuleleke mwaha wa owereya,
Ntoko muthiyana oniyara,
Okhala wiira vano munookhuma opooma, munrowa okhalaka omatta.
11 Maloko manceene anrowa othukumana wiira yootupheleni,
Awo anoohimya wiira: ‘Mmuhiye Siyoni uulihihiwe muru,
Nave eyo yiiraneye niwehaka ni maitho ahu’.
12 Masi, awo khanisuwela miyuupuwelo sa Yehova,
Nnakhala khaniiwexexa yoolakela awe,*
Okhala wiira owo onrowa waathukumanya ntoko mavisi* a ipyo sithikiliwe niinaano opuro oneepetthiwa ipyo.
13 Nyuwo mwaana mwaamuthiyana a oSiyoni,+ nvenye ni mweepetthe ipyo.
Kinootatuxa manyaka anyu wiira akhale manyaka a eyuuma,
Nave kinootatuxa ilipwi sanyu wiira sikhale ilipwi sa ekoopiri.
Nto munimwaanyakatta atthu anceene.+
Munonvaha Yehova eluukuru ya ohiroromeleya waya,
Nave itthu saya munonvaha Pwiya eekeekhai a elapo yootheene”.+