Mikeya
7 Kootakhaliwa! Miyo kinlikana nuule,
Oniira nuumala ohepha mihokorokho sa elimwe
Ni wuurula ewuuva yaahanle nuumala okathi woohepha,
Ohinaphwanya nnakhala eritta ya ewuuva wiira olye,
Hata efiiku yooloka oniphavelexa awe.
2 Mulaponi khuuvo-tho mutthu oororomeleya,
Eriyari ya atthu khaavo-tho mutthu a xariya.+
Atthu ootheene annimwiipithela mutthu wiira amwiive.+
Khula mmosa onnimuxaya munnawe omureyaka ntthavi.
3 Matata aya annisuwela oratteene opaka etthu yootakhala.+
Mukhulupale onnitumererya eyo,
Mulipa-oophuka oniphuka eemereryaka okunyariwa,+
Mulopwana oottittimiheya onnisuweliha etthu eniphavela awe,+
Nave awo anipaka itthu iyo ari ene vamosa.
4 Mutthu aya oolokexa onlikana ni miiwa,
Mutthu aya onooniwa okhala a xariya tootepa otakhala ovikana miiwa soowaatta.
Nnoophiya nihiku nihimmwale ni mulipa-oowehaweha ni nihiku noophukela.+
Vano awo anooxanka.+
5 Muhimukupaliki mukhwiinyu,
Nnakhala muhimuroromeleke mpatthani anyu.+
Mukhalaneke ephoole ni etthu munimuleela anyu mwaarinyu yoowo munimphenta anyu.
6 Tthiri mwaana mwaamulopwana onnimuthanya paapa awe,
Mwaana mwaamuthiyana khoniiwanana ni maama awe,+
Nave muthiyana ootheliwa khoniiwanana ni maathi awe.+
Awanani a mutthu, taale a vatthokoni vawe.+
7 Masi miyo, kinrowa owehawehaka kimulipelelaka Yehova.+
Kinrowa omulipelelaka Muluku, moopoli aka,+ kipixaka murima.
Muluku aka onookiwiriyana.+
8 Nyuwo nwanani aka, muhitteeliweke murima mwaha wa miyo.
Nnaamwi kimonre ene, miyo kinoovenya.
Nnaamwi kikhalaka mweepiphini, Yehova onrowa okhala muthuko aka.
9 Miyo kinoovilela oviruwa wa Yehova,
Okhala wiira koomutthekela,+
Mpakha owo okaakiherya mulattu aka ni okiirela exariya.
Owo onookiroiha opuro wookokola,
Nto miyo kinimoona exariya awe.
10 Nave nwanani aka onimoona eyo,
Ole onikihimeerya wiira:
“Ori vai Yehova Muluku anyu?”,+ onimuuliwa muru.
Maitho aka anonweha.
Vano owo onoonyakeliwa ntoko mattophe ari mphironi.
11 Nlo ninrowa okhala nihiku ninrowa aya otekiwa ixiri sanyu sa maluku,
Nave nihiku nno mukano wa elapo anyu onimuncereriwa.
12 Nihiku nlo awo animoorwa wa nyuwo,
Akhumaka iphiro sootheene sa wAsiiria ni ipooma sa wExiitu,
Okhuma iphiro sootheene sa wExiitu mpakha omuro Eufrate,
Okhuma ephareya emosa mpakha ephareya ekina, okhuma mwaako mmosa mpakha mwaako mukina.+
13 Nave elapo khenrowa okhaliwa, mwaha wa atthu aya,
Ni mwaha wa etthu apanke aya.
14 Mwaahooleleke atthu anyu ni ekopo, yaawo ari ntoko nikoto nvahiwe anyu ntoko etthu yoohiyeriwa,+
Naakhala mekhaya mutakhwani, eriyari ya etakhwa.
Mwaahiye alyaaka oBaxani ni oXileyaadi+ ntoko mahiku a khalai.
15 “Kinoowooniheryani itthu sootikiniha,+
Ntoko okathi kookuminhaakani elapo ya wExiitu.
16 Maloko animoona ni animuuliwa muru nnaamwi arina ene owerya wootheene.+
Awo anoottiyela eyano aya ni ntata naya,
Maaru aya anoottiyeya.
17 Awo anrowa olataka ntthupi ntoko inowa,+
Anookhuma mapuro yiipinthe aya athukumelaka ntoko inama siniipurula vathi.
18 Muluku xeeni onlikana ni nyuwo,
Onilevelela itampi ni oniliyala yoottheka+ ya atthu ohalanne awe?+
Owo khonrowa onanariwa mahiku ootheene,
Okhala wiira onnimusivela ophenta woororomeleya.+
19 Owo onootthikela-tho onimorela ikharari,+ onoomala-maliha* soottheka sahu.
Nyuwo munoorihela itampi saya sootheene mphareya moowiixa.+
20 Nyuwo munoomooniherya ororomeleya Yakobe,
Nave munoomooniherya ophenta woororomeleya Abrahamu,
Ntoko mwaaleihenrye anyu amuhavinre ahu okhuma khalai.+