Sofoniya
2 Yooruma ela ehinatthi wiiraneya,
Nihinatthi ovira nihiku ntoko nlaxi ninvavihiwa ni epheyo,
Oviruwa wa Yehova ohinatthi woorweelani,+
Nihiku na oviruwa wa Yehova nihinatthi woorweelani,
3 Mumphaveleke Yehova,+ nyuwo atthu ootheene oowiiyeviha a valaponi,
Nyuwo muniiwelela sooruma sawe sa xariya.*
Mphaveleke exariya, mphaveleke okhala oowiiyeviha.
Woonasa wene munimwiipithihiwa nihiku na onanariwa wa Yehova.+
4 Tthiri oGaza enrowa okhala epooma yoonyanyaliwa,
Nave wAxikeloni khonrowa okhaliwaka.+
Axidodi onimoomoliwa othana eriyari,
Nave wEkironi onoopwetexiwa voomalela.+
5 Aatakhaliwa ale ankhala waattamela ophareya, nloko na akereti!+
Moolumo a Yehova annoovirikanyani.
Nyuwo oKanaani, elapo ya afilisti, kinimoopwetexani,
Nto khuuvo onrowa okhalaka memmo.
6 Mpantta wa ophareya onrowa okhala opuro onlyihiwa inama,
Nave sinookhala ihime para amakampusi ni masisi* a maluku para ipwittipwitthi.
7 Muttetthe owo onrowa okhala wa ale anrowa ohala a etthoko ya Yuda,+
Weiwo tanrowa aya olyaaka.
Awo anrowa orupaka ohiyu ipa sawe Axikeloni.
Okhala wiira Yehova Muluku aya onootthikela waakhapelela,
Ni onimwaattikiha ale yaakhalihiwe ipottha”.+
8 “Kihiiwa oveeha wa atthu a oMowabi+ ni oruwana wa atthu a wAmoni,+
Awo ahaaveeha atthu aka awoopopihaka voowiisoona wiira anookuxa muttetthe aya”.+
9 Yehova a anakhotto, Muluku a Isarayeli, onihimya wiira: “Tivonto, kinnilaphela okumi aka,
OMowabi onrowa olikanaka ni oSodoma,+
Nave wAmoni onrowa olikanaka ni oGomora:+
Nipuro na makukhu ooneena, ehime ya maakha, ni elapo ehinrowa otthikela okhaliwa-tho.+
Atthu aka anrowa ohala anookuxa mireerelo saya,
Nave nloko naka ninrowa ohala nnookuxa elapo aya.
10 Ela ti etthu anrowa aya waakhela mwaha wa wiixinnuwiha waya,+
Okhala wiira ahaaveeha ni ahiixinnuwiha yaavirikanyaka atthu a Yehova a anakhotto.
11 Yehova onrowa okhala oowoopiha para awo,
Owo onimwaamala-maliha amuluku ootheene valaponi,
Maloko ootheene anikhala musisironi anookokhora ohoolo wawe,*+
Khula mmosa opuro ori awe.
12 Nyuwo atthu a wEthiyopia, ni nyuwo-tho munimwiiviwa ni espaata* aka.+
13 Owo onimookolela ntata nawe onorti, nto onoopwetexa wAsiiria,
Nave onrowa ohiya oNiinive ohikhaliwaka,+ wuumale ene ntoko othako.
14 Makoto a inama animumpaathi eriyari aya, khula muthinto wa inama sa mutakhwani.
Mwaapalame onlikana ni napiphi* ni namunyoma* anoovirihaka ohiyu variyari va malipiheryo a ipilaari saya.
Onimwiiwanyeyaka wiipa wa axipalame vaxanelani.
Sinoosareya ikokhola vamukhora vaya.
Okhala wiira owo onoohiya vanlakani ithaapwa sa iseeturu.
15 Ela epooma ya atthu oowiixinnuwiha yaakhala ahoovaka etthu,
Yaawo yaahimya vamurimani vaya wiira: ‘Epooma ahu yookhalana efaita, khiivo enlikana niila’.
Vano atthu ootheene anrowa oweha epooma eyo anootikinihiwa,
Okhala wiira owo onrowa okhala opuro sinrowa aya wumpaathiki inama sa mutakhwani!
Atthu ootheene anrowa oviraka animoopa muturi ni anoottikinya muru aya”.+