Silempwale ni Luka
19 Yesu aahiphiya oYeriko, aviraka epooma ele. 2 Vano, aahikhala weiwo mulopwana mmosa thaaciri, aihaniwa Zakeyo. Owo aari mukhulupale mmosa a alipa-ooliviha mpoosito. 3 Nto, owo aaniphavela vanceene onweha Yesu, masi khaawerya, mwaha woowi aari ookhuveya. Nave waahikhala muttitthi waamurukurenrye Yesu. 4 Siiso, Zakeyo aahitthimakela ohoolo, owela mwiri wa ifiiku wiira onwehe Yesu, maana owo aarowa ovira ephiro yeele. 5 Okathi Yesu aaphiyale awe opuro ole, aahiweha osulu, onamuhimeerya wiira: “Zakeyo, mwaakuve mukhuruwe, maana olelo kihaana omaka vatthokoni vanyu”. 6 Nto, owo aahikhuruwa moowaakuveya, khimwaakhela Yesu, otteeliwe ene murima. 7 Nuumala atthu ootheene oweha ele yiiraneya, yaahipacerya waapa, ariki: “Oronwe omaka vatthokoni va natampi”.+ 8 Vano Zakeyo aaheemela, onamuhimeerya Yesu, wiira: “Pwiya, mwiiweke! Kinookawanya eriyari mireerelo saka sootheene, kaavahe alipa-oohaawa. Nave yakhala etthu kimwiiyenrye aka mutthu, kinoomuttikiherya ikwaha xexe”.+ 9 Yesu aahihimya wiira: “Olelo, woopowa woophiya etthoko ela, okhala wiira nave ola mwaana a Abrahamu. 10 Veekeekhai, Mwaana a Mutthu orwenle owaavya ni owoopola ale yaarimenle”.+
11 Okathi awiixutti yaawiriyana aya itthu Yesu aalavula awe, aahaahimeerya nlikanyiho nikina, okhala wiira awiixutti yuupuwela wiira yaphiya oYerusalemu, Omwene wa Muluku waarowa okhumelela voohipisa.+ 12 Tivonto, Yesu aahihimya wiira: “Mulopwana mmosa a etthoko ya mwene, aahiilokiherya wiira orowe elapo yoorakamela+ wiira akhalihiwe mwene, nuumala-vo, otthikeke. 13 Vano, aahiwiihana arumeyi 10, aavaha imiina* 10, onaahimeerya wiira: ‘Mmweetteke nakoso musurukhu ola mpakha miyo otthika’.+ 14 Vano, atthu a elapo awe, yaanimunyokha, nto yaahaaruma anamuhupi ottuli wawe ohimya wiira: ‘Khanimphavela wiira mulopwana ola okhale mwene ahu’.
15 “Nuumala okhalihiwa mwene, owo aahiwiihana arumeyi awe, yaale aavahale awe musurukhu.* Aaphavela osuwela etthu yaaphwannye aya nuumala omweetta nakoso.+ 16 Tivo, aahirwa murumeyi oopacerya onahimya wiira: ‘Pwiya, emiina anyu emosa, koophwanya sikina 10’.+ 17 Mulopwana ole aahimuhimeerya wiira: ‘Muhiira saana, murumeyi ooloka! Okhala wiira moororomeleya ni itthu saamukhaani, mulamuleleke ipooma 10’.+ 18 Aahirwa a nenli, onahimya wiira: ‘Pwiya, emiina anyu emosa, koophwanya sikina thanu’.+ 19 Nto pwiya awe aahimuhimeerya wiira: ‘Ni nyuwo-tho mulamuleleke ipooma thanu’. 20 Vano aahirwa mukina, onahimya wiira: ‘Pwiya, mukuxeke emiina anyu ela, kaasunke aka vakuwoni. 21 Tthiri, koopaka eyo mwaha woowi kanwoovani, maana nyuwo mwa mutthu ootakhala’.+ 22 Nto pwiya awe aahimuhimeerya wiira: ‘Kinnoophukelani ni moolumo anyu, nyuwo murumeyi ootakhala. Nyuwo mwaanisuwela wiira miyo ka mutthu ootakhala.+ Kinnikuxa etthu ehisunke aka, nave kinnihepha etthu kihaalale aka, 23 vano xeeni mwahaapweha anyu musurukhu aka* opanko, wiira kaatthikaka kiphwanye wuncereriwe ene?’
24 “Nuumala-vo, aahaaruma atthu yaari vaavo, oriki: ‘Mmwaakhe emiina eyo, munvahe ole orina imiina 10’.+ 25 Atthu awo yaahimwaakhula ariki: ‘Pwiya, ola ookhalana imiina 10!’ 26 Owo aahiwaakhula oriki: ‘Kinooleelani wiira, ole orina, onimuncereriwa. Vano ole ohirina, hata ele erina awe, onimwaakhiwa.+ 27 Nave-tho, mwaaruuhe awanani aka ale yahaaphavela wiira kikhale mwene aya, nwiive ohoolo waka’”.
28 Nuumala olavula itthu iya, Yesu aahitthikela ekwaha awe orowaka oYerusalemu. 29 Okathi aattamela awe muttetthe wa oBethifaxe ni oBethania, omwaako Olivera,+ Yesu aahaaruma awiixutti awe anli,+ 30 oriki: “Murowe muttetthe ori ohoolo wanyu, mukelaka-ru munomphwanya mwaaxaana a puuru ohitonko oweliwa, otthukweleliwe ene. Mmutaphule, mukiruuhele. 31 Akhala mutthu onrowa wookohani wiira, ‘Xeeni munimutaphula anyu mwaaxaana owo a puuru?’, mmwaakhule so: ‘Apwiya tanimphavela’”. 32 Ale yaarummwale, yaahirowa aphwanya sootheene ntoko Yesu aahimenrye awe.+ 33 Okathi yaamutaphula aya mwaaxaana owo a puuru, axineene yaahaakoha, ariki: “Xeeni munimutaphula anyu mwaaxaana owo a puuru?” 34 Awo yaahaakhula wiira: “Apwiya tanimphavela”. 35 Awiixutti yaahimuroihela Yesu mwaaxaana owo a puuru, yaahaatala malaya aya a ota vasulu, vano Yesu aahinwela.+
36 Okathi Yesu eetta awe, awo yaanaatala malaya aya a ota mustaraatani.+ 37 Aattamelaka estaraata yaakhuruwa omwaako Olivera, awiixutti ootheene yaahipacerya otteeliwa murima ni omuttottopela Muluku ni nsu noowiiwanyeya, mwaha wa itthu sootheene yaawenhe aya, 38 ariki: “Ooreelihiwa tuule onirwa ntoko Mwene mwa nsina na Yehova!* Okhale murettele eriyari ya atthu ni Muluku, nave ovuwihiwe Muluku wiirimu!”+ 39 Masi, afarisi akina yaari muttitthi ole, yaahimuhimeerya Yesu wiira: “Mwiixuttihi, mwaaleele awiixutti anyu wiira amaale”.+ 40 Vano Yesu aahiwaakhula oriki: “Kinooleelani wiira, akhala wiira awo yammaala, maluku ti yaarowa okhuwelaka”.
41 Okathi Yesu aattamela awe oYerusalemu, aahiweha epooma ele ni aahinlela,+ 42 oriki: “Kaaniphavela musuwenle ene itthu saarowa wookumiheryani murettele. Masi vano, nyuwo muhiipithihiwa itthu iyo.+ 43 Anoophiya mahiku aniira aya awanani inyu yoorukureryeni ni miri suulupale soothokolowa, nave anrowa wookumiheryani maxakha.+ 44 Awo animoopwexakasani ni animwaapwetexa atthu anyu ootheene,+ nave khanrowa ohiya vaava nluku nimosa vasulu va nluku nikhwaaya,+ maana Muluku aahirwa woophukelani, masi nyuwo muhisuwela”.
45 Vano, Yesu aahikela mutemplo, onapacerya owoomola atthu yaatumiha ni yaathuma mutemplo memmo.+ 46 Nto aahaahimeerya wiira: “Voolempwa wiira: ‘Empa aka, enrowa ohimmwaka okhala empa ya mavekelo’.+ Masi nyuwo mookhaliha empa ya alatarau”.+
47 Khula nihiku, Yesu aaniixuttiha mutemplo. Masi makhulupale a anamukuttho ni alipa-oowiixuttiha nlamulo vamosa ni ahooleli a atthu, yaaniphavela omwiiva.+ 48 Masi awo khiyaasuwela moota woopaka eyo, maana atthu ootheene yaanitepa onwiriyana oratteene Yesu.+