Samuweli Oopacerya
4 Vano nuulumo na Samuweli naahimwara-mwareya wIsarayeli wootheene.
Moottharelana, aisarayeli yaahirowa owana ni afilisti. Aisarayeli yaamanke wEbenezeri, nto afilisti yaamanke wAfeki. 2 Afilisti yaahithukumana wiira yawane ekhotto ni aisarayeli. Nto ekhotto khiyaareere oviha, nave aisarayeli yaahixinttiwa ni afilisti. Afilisti awo yaahiwiiva alopwana 4.000 opuro ole waawaniwa ekhotto. 3 Okathi atthu yaatthikenle aya opuro waamanke aya, ahooleli a aisarayeli yaahikoha wiira: “Xeeni Yehova ohalaka weemererya olelo wiira nixinttiwe* ni afilisti?+ Nrowe nakuxe Nivuku na Nivarihano na Yehova oSilo,+ wiira nikhale eriyari ahu, nnoopole mmatatani mwa awanani ahu”. 4 Siiso yaahaaruma alopwana oSilo, wiira yakuxe Nivuku na Nivarihano na Yehova a anakhotto, yoowo onikilaathi veehiceni vawe, vasulu* va makerubi.+ Nave-tho, anamwane anli a Eli, Hoofini ni Pineha,+ yaahirwa vamosa ni Nivuku na Nivarihano na Muluku eekeekhai.
5 Okathi Nivuku na Nivarihano na Yehova naapixiwe aya opuro waamanke aya, aisarayeli ootheene yaahikhuwela vanceene, mpakha elapo otetereya. 6 Okathi afilisti yaiwale aya okhuweliwa vanceene, yaahikoha wiira: “Xeeni omaxaxani wa aheeperi ohireere aya okhuweliwa?” Vano, yaahisuwela wiira Nivuku na Yehova, naahipixiwa opuro waamanke aya aisarayeli. 7 Afilisti yaahoova, anahimya wiira: “Muluku ohoorwa opuro omanke aya aisarayeli!”+ Nave yaanihimya wiira: “Nootakhaliwa, okhala wiira khenakhumelele etthu siisa! 8 Nootakhaliwa! Tani onrowa onoopola mmatatani mwa Muluku owo muulupalexa? Muluku owo ti yoowo aawiivale atthu a wExiitu, orumeelaka ihasara sa khula enamuna moothakoni.+ 9 Nyuwo afilisti mulipe murima ni mukhaleke ntoko alopwana, wiira muhikhale ipottha sa aheeperi, ntoko awo yaakhanle aya ipottha sanyu.+ Nwaneke ntoko alopwana!” 10 Nto afilisti yaahiwana ni aisarayeli ni yaahaaxintta.+ Aisarayeli yaahitthyawela mutentani* mwaya. Anakhotto khiyaareere wiiviwa. Nave anakhotto 30.000 a Isarayeli yeetta mwentto yaahikhwa. 11 Nave-tho Nivuku na Muluku naahikuxiwa. Ohiya-vo, anamwane oowanli a Eli, Hoofini ni Pineha, yaahikhwa.+
12 Mulopwana mmosa a nihimo na Beniyamini aahitthyawa opuro ole waawaniwa ekhotto, ophiya oSilo nihiku nenle, malaya awe akhereyale ene ni osareyale ene ntthupi mmuru mwawe.+ 13 Okathi mulopwana ole aaphiyale awe, Eli iira okilanthi ene vakhaterani vawe mukerekhere mwa estaraata, owehawehaka, okhala wiira murima awe waaninvava, mwaha wa Nivuku na Muluku eekeekhai.+ Mulopwana ole aahivolowa mpooma wiira ohimye ihapari, nto atthu ootheene a mpooma-mme yaahipacerya wunla ikuttho. 14 Okathi Eli aiwale awe ikuttho iyo, aahikoha wiira: “Xeeni atthu awo aninla aya?” Mulopwana owo aahimutthimakela Eli wiira omuleele ihapari. 15 (Eli aarina iyaakha 98, nave khaawerya woona saana.)+ 16 Mulopwana owo aahimuleela Eli wiira: “Miyo kaari opuro oniwaniwa ekhotto! Olelo paahi kiwenrye aka otthyawa okhottoni”. Eli aahimukoha wiira: “Exeeni yiiraneyale mwanaka?” 17 Siiso, mulopwana ole aaruuhale ihapari, aahihimya wiira: “Atthu a Isarayeli ahaatthyawa afilisti, nave atthu anceene ahookhwa.+ Ohiya-vo, aniinyu oowanli, Hoofini ni Pineha, ahookhwa.+ Vano Nivuku na Muluku eekeekhai nookuxiwa”.+
18 Okathi ene yoowo mulopwana owo aaromonle awe Nivuku na Muluku eekeekhai, Eli aahipittuwa vakhaterani vawe, waattamela vamukhora. Vano exiko awe yaahinteya ni aahikhwa, okhala wiira aahuuluvala ni aahineneva vanceene. Eli aahaalamulela atthu a Isarayeli iyaakha 40. 19 Muthiyana aatheliwe ni mwanawe, eyo piiyo, mwaara a Pineha, iira orupanle ene ni ohalaka vakhaani oyara. Muthiyana owo, aahiiwa wiira Nivuku na Muluku eekeekhai naahikuxiwa, ni wiira paapa awe iyawe, ni iyawe yaahikhwa. Vaiwale awe eyo, muthiyana owo aahuurama vootutuxerya, ni aahipacerya woona owereya onimphwanya muthiyana oorupala ohanle oyara, nave aahimuyara mwaana. 20 Okathi muthiyana owo aahala awe vakhaani okhwa, athiyana yaari nuuwo yaahimuhimeerya wiira: “Muhoove, okhala wiira moomuyara mwaana mwaamulopwana”. Masi owo khaakhunle etthu, nnakhala khaawiriyanne etthu. 21 Masi aahinvaha mwaana owo nsina noowi Ikabodi,*+ oriki: “Ovuwa wa atthu a Isarayeli, wooroihiwa weepotthani”.+ Owo aahihimya eyo, mwaha woowi nivuku na nivarihano na Muluku eekeekhai naahikuxiwa, ni mwaha wa ele yaamukhumelenle paapa awe iyawe, ni iyawe.+ 22 Owo aahihimya wiira: “Ovuwa wa atthu a Isarayeli wooroihiwa weepotthani, okhala wiira Nivuku na Muluku eekeekhai nookuxiwa”.+