Silempwale ni Yohani
14 Yesu aahincererya oriki: “Muhixanke.+ Mooniheryeke omwaamini Muluku,+ nave-tho mooniheryeke okaamini miyo. 2 Owannyawe Tiithi aka khareere mapuro ookhala. Vahaakhanle siiso, kaamoohimeeryani. Miyo kinrowa woolokiheryani opuro.+ 3 Nave-tho, karowa ni koolokiheryani opuro, miyo kinoohokolowa, kookuxeeni, wiira opuro kinrowa aka okhalaka, nyuwo-tho mwakhaleke weiwo.+ 4 Nyuwo munnisuwela ephiro ya opuro kinrowa aka”.
5 Tome+ aahimuhimeerya wiira: “Pwiya, hiyo khaninsuwela opuro munrowa anyu. Nto ninrowa osuwela sai ephiro ene?”
6 Yesu aahimuleela wiira: “Miyo ka ephiro,+ ka ekeekhai+ ni ka okumi.+ Khuuvo onwerya orowa wa Tiithi, ohikhanle mwa miyo.+ 7 Vakhala wiira nyuwo munnikisuwela, nave-tho munoomusuwela Tiithi aka. Okhuma okathi ola orowa ohoolo, nyuwo munnimusuwela. Mweekeekhai, nyuwo munninweha”.+
8 Filipe aahimuhimeerya Yesu wiira: “Pwiya, munooniherye Tiithi, eyo enooniphiyerya”.
9 Yesu aahimukoha wiira: “Filipe, hata kikhanle ene ni nyuwosa okathi munceene, nlelo khamunikisuwela? Ole okiwenhe, nave-tho ohaaweha Atiithi.+ Vano, xeeni munihimya anyu wiira: ‘Munooniherye Tiithi’? 10 Kiireke khamunikupali wiira miyo kiri ni Atiithi, nave Atiithi ari ni miyo?+ Itthu kinoohimeeryaakani, nkinikumiha mmuru mwaka,+ masi Atiithi, yaawo ari ni miyo, annivara miteko saya akirumeelaka miyo. 11 Mukupaliki ele enoohimeeryaakani wiira miyo kiri ni Tiithi, nave Tiithi ori ni miyo. Aahiiso, mukupaliki mwaha wa miteko saka.+ 12 Tthiri, kinooleelani ekeekhai wiira, ole onikaamini onoovara miteko sinivara aka ni onoovara miteko suulupale ovikana iya,+ okhala wiira miyo kinrowa wa Tiithi aka.+ 13 Nave-tho, khula etthu muniveka anyu mwa nsina naka, miyo kinoopaka, wiira Atiithi avuwihiwe mwaha wa miteko Mwaana onivara awe.+ 14 Khula etthu muniveka anyu mwa nsina naka, miyo kinoopaka.
15 “Akhala wiira munnikiphenta, munrowa weettelaka sooruma saka.+ 16 Miyo kinonvekela Tiithi aka wiira oovaheeni namakhaliherya mukina, wiira okhaleke ni nyuwo mahiku ootheene.+ 17 Namakhaliherya owo ti ikuru soowaarya,+ onisuweliha ekeekhai, yoowo olumwenku ohiniwerya aya waakhela, maana khoniwerya oweha, nnakhala khonisuwela.+ Nyuwo munnisuwela, okhala wiira ori mwa nyuwo ni onikhala ni nyuwo. 18 Nkinrowa woohiyani ntoko ikwaasuni. Miyo kinimootthikelani.+ 19 Moohipisa, olumwenku khonrowa okiweha-tho, masi nyuwo munrowa okiweha,+ mwaha woowi miyo kinnikhala, nave nyuwo munrowa okhala. 20 Nihiku nlo, munoosuwela wiira miyo kihiiraana ni Atiithi ni wiira nyuwo muhiiraana ni miyo, nave miyo kihiiraana ni nyuwo.+ 21 Ole oneemererya sooruma saka ni oniiwelela seiyo, ti yoowo onikiphenta. Ole onikiphenta, onoophentiwa ni Tiithi aka. Nave, miyo kinomphenta mutthu owo ni kinoomwiiriha okisuwela saana”.
22 Yuda+ mukina, ohiya Yuda Isikariyoti, aahimukoha Yesu oriki: “Pwiya, xeeni muniphavela anyu oniiriha woosuwelani saana, ohiya wiisuweliha wa atthu a moolumwenkuni?”
23 Yesu aahimwaakhula oriki: “Akhala mutthu onikiphenta, onimweettelaka moolumo aka.+ Vano Atiithi anomphenta owo, nto oowanli ahu nnimoorwa nikhaleke ni mutthu owo.+ 24 Ole ohinikiphenta, khoneettela moolumo aka. Moolumo muniiwa anyu khahiyo awaka, masi tawawe Tiithi okirumme.+
25 “Miyo kinnilavula itthu iya, nlelo kiri ene ni nyuwo. 26 Masi namakhaliherya owo, eyo piiyo, ikuru soowaarya, seiyo Atiithi anrowa aya oruuha mwa nsina naka, sinoowiixuttihani itthu sootheene ni sinoowuupuxeryani itthu sootheene koohimenryaakani.+ 27 Kinnoohiyeryani murettele. Kinnoovahani murettele aka.+ Murettele onoovahaakani, khonlikana ni murettele olumwenku onoovahaayani. Muhixanke aahiiso muhoove. 28 Mookiiwa kooleelakani wiira: ‘Kinoorowa, nave kinimootthikelani’. Vakhala wiira munnikiphenta tthiri, munootteeliwa murima mwaha woowi kinrowa wa Atiithi. Mweekeekhai, Atiithi taalupalexa okivikana miyo.+ 29 Niinaano-va, kihooleelani etthu ela ehinatthi okhumelela, wiira mukupali okathi enrowa aya okhumelela.+ 30 Nkinrowa olavula-tho vanceene ni nyuwo, okhala wiira namalamulela a olumwenku ola+ onnoorwa, nto owo khonikiwerya.*+ 31 Masi, wiira olumwenku osuwele wiira miyo kinnaaphenta Atiithi, kinniira siisaale Atiithi akirumme aya.+ Nvenye, nrowe nikhume opuro ola.